Сухапуҫ тытса

Мускавран Чӑваш кӗнеке издательстви ячӗпе телеграмма килнӗ. Ӑна яраканӗ — федерацин Пичетпе массӑллӑ коммуникаци хатӗрӗсен агентствин периодика пичечӗн, кӗнеке кӑларас ӗҫпе полиграфи управленийӗн пуҫлӑхӗ Ю.Пуля.

Телеграммӑра Чӑваш Ен кӗнекеҫисене Пӗтӗм Раҫҫейри регион тата таврапӗлӳ литературин «Кӗҫӗн тӑван ҫӗршыв» конкурсӗн «Тӑван ҫӗршыв сӑнарӗ» номинацире ҫӗнтернӗ ятпа саламланӑ.

Ҫак чыса тивӗҫнӗ кӗнеке — Г.Иванов-Орковӑн «Терентий Дверенинӑн чӑваш тӗнчи» кӗнеке-альбомӗ. Вӑл иртнӗ ҫул кун ҫути курнӑ. Терентий Дверенин тӗлӗнмелле ҫын — Сӗнтӗрвӑрри районӗнчи Ҫичӗпӳртре пурӑнакан вӑрҫӑ ветеранӗ, алӗҫ ӑсти.

Терентий Дверенинӑн тӗнчи мӗнлерех-ши? Тӑван ен, халӑх культури, йӑли-йӗрки унра мӗнле туйӑмсем ҫуратать? Пуканесем, пӗчӗк скульптурӑсем касса кӑларса вӗсене халӑх тумӗ тӑхӑнтартать, ҫӗр ӗҫне пурнӑҫлаттарать, уяв юрри юрлаттарать...

Халӑх ӑстишӗн унӑн ӗҫӗсем тетте мар, историпе ҫыхӑннӑ япаласем, пулӑмсем. Вӗсенче вӑл чӑваш пурнӑҫне курать. 90 ҫул ҫут тӗнчере пурӑннӑ май чун-чӗрине уҫса памалли сахал мар унӑн. Ҫав «сӑмахсене» пӗчӗк кӗлеткесенче тупать.

Маларах асӑннӑ ӑмӑрту пирки ҫакна палӑртса хӑвармалла: вӑл 2005 ҫултанпа иртет. Тӗллевӗ пархатарлӑ: таврапӗлӳ тытӑмӗнчи кӑсӑклӑ тӗпчевсене палӑртма пулӑшасси, ҫавӑн пекех Раҫҫей регионӗсенчи издательствӑсене хавхалантарасси. Ку енӗпе вара Чӑваш кӗнеке издательствин мухтанмалли ҫук мар. Юлашки виҫӗ ҫул хушшинче ҫеҫ тӗрлӗ конкурсра сакӑр наградӑна тивӗҫнӗ.

Надежда Смирнова

#Сӗнтӗрвӑрри районӗ, #Чӑваш кӗнеке издательстви, #Ҫичӗпӳрт, #кӗнекесем