ЧПУн чӑваш филологийӗпе культура факультечӗ Хусан университетӗнчи тутар филологийӗпе истори факультечӗпе туслӑ ҫыхӑнура пулни вӑрттӑнлӑх мар ӗнтӗ. Профессорсемпе преподавательсем пӗр-пӗрин ҫитӗнӗвӗсемпе паллашсах тӑраҫҫӗ. Ҫулсеренех иртекен конференцисенче студентсем те хастар хутшӑнаҫҫӗ. Акӑ, нумай пулмасть чӑваш студенчӗсем Хусанта конференцире пулчӗҫ. Кӑҫал ӑна тутарсен паллӑ ҫыравҫи, литературовечӗ, критикӗ, тутар литература кафедрин доценчӗ пулнӑ Мухамет Магдиев ҫуралнӑранпа 80 ҫул ҫитнине халалланӑ. 12 студент 5 секцире тухса калаҫрӗ. Вӗсем — Р. Тимофеева, Н.Блинова, С.Хвасева, Д.Ефимов, М.Паймурзина, А.Николаева, З.Флегонтова, С.Садовникова, Т.Ефремова, О.Иванова, С.Чернова, Т.Галкина.

Студентсене Хусан университечӗ епле йышӑнни те, конференци мӗнле иртни те питӗ килешрӗ. Тутар чӗлхипе «чӗррӗн» паллашма, кӳршӗри халӑхӑн наци туйӑмӗ ҫӳллӗ шайрине туйса илме пултарчӗҫ вӗсем. Хусан, удмурт студенчӗсен доклачӗсене итлесе хӑйсемшӗн нумай ҫӗнӗлӗх илчӗҫ. Кӑсӑкли те кирли чылайччӗ вӗсенче.

Кунашкал мероприятисен пӗлтерӗшӗ пысӑк. Юнашар республикӑсенчи ӑслӑлӑх лару-тӑрӑвӗпе интересленмесен пирӗн аталану пӗр енлӗ ҫеҫ пулӗччӗ. Ку, паллах, ҫӗнӗ ӳсӗмсем тума чӑрмав кӳрет. Ҫавӑнпа май пур таран ытларах пӗлме, курма, итлеме тӑрӑшмалла. Пӗр вырӑнта чарӑнса лармалла мар. Студент ҫулӗсенче пухнӑ опыт малашне те кирлӗ пулатех пире. Конференцисемпе олимпиадӑсенче пултарулӑха кӑтартни кӑна мар, тавракурӑма анлӑлатни те паха. Ҫавӑнпа студентсене ӑнӑҫу, тӳсӗмлӗх, ӗҫченлӗх, вичкӗнлӗх сунас килет. Наука ани анлӑ, унта тӗпчемелли, хакламалли кашнийӗн валлиех ҫитет.

Иванова Ольга (Австрийская), 3 курс студенчӗ.

#Чӑваш патшалӑх университечӗ, #Чӑваш филологийӗпе культура факультечӗ, #Хусан