Ҫӗртме уйӑхӗн 4-мӗшӗнче Аня Чижова ячӗллӗ фонд Шупашкарти Андриян Николаев ячӗллӗ паркра сывлӑх енчен хавшак ачасем тата вӗсен ашшӗ-амӑшӗ валли уяв ирттерме палӑртнӑ. Вӑл 11 сехетре пуҫланӗ.

Фонд "Тӗлӗнтермӗш кукӑль" конкурс ирттерӗ, парнесем парӗ. Ҫавӑн пекех пикник, ӑсталӑх класӗсем, квест пулӗҫ. Ачасемпе ашшӗ-амӑшӗ "Ковчег" зоокӗтесре пурӑнакан чӗрчунсене кӗрсе курӗҫ, вӗсене апат ҫитерӗҫ.

Уява 100 яхӑн ҫемье килмелле.

Палӑртса хӑварар: Аня Чижова ячӗллӗ фонд сипленмен чирсемпе нушаланакан ачасене пулӑшать.

ШӖМ тунӑ сӑн

Ют ҫӗршывран килнӗ икӗ ҫын Шупашкарта наркотик сутма тӑнӑшӑн суд сакки ҫине ларнӑ.

Следстви палӑртнӑ тӑрӑх, вӗсем мессенджер урлӑ следстви хальлӗхе палӑртман ҫынпа наркотик сутасси пирки калаҫса татӑлнӑ. Ӑна хӑйсем те тутанма палӑртнӑ. Лешӗн курттӑмӑн кӳрсе килмелле, кусен хутаҫсене пайласа вӑрттӑн вырӑнсене хумалла пулнӑ.

Ют ҫӗршыв ҫыннисем 118 грамм наркотик илнӗ. Пӗр пайне хутаҫсене пайласа чикнӗ. Анчах ӑна сутайман, пӗлтӗр юпа уйӑхӗнче вӗсене вӑрттӑн вырӑна хума тытӑннӑ чухне полицейскисем тытса чарнӑ.

chuvashia.sledcom.ru сӑнӳкерчӗкӗ

Кӑҫалхи пуш уйӑхӗн 24-мӗшӗнче Шупашкарти Ленинград урамӗнче вырнаҫнӑ нумай функциллӗ центрта лифт персе аннине Чӑваш халӑх сайчӗ пӗлтернӗччӗ. Аса илтерер: инкек 15 сехет ҫурӑра пулса иртнӗ. Ҫав вӑхӑтра унта никам та пулман, ҫавӑнпа ҫынсем шар курман. Лифт 8-мӗш хутран ӳкнӗ. Вӑл вӑйлах арканнӑ.

Прокуратура тӗпчевӗ палӑртнӑ тӑрӑх, лифта техника тӗлӗшӗнчен тӗрӗслеменни ҫиеле тухнӑ. Лифт хуҫи — «Ленинградская, 36» тулли мар яваплӑ общество. Организацире лифта ӗҫлеттерессишӗн яваплӑ ҫын та пур.

Халӗ яваплисен хӑйсем ӗҫлесе ҫитерейменшӗн явап тытма тивӗ. Пӑтӑрмах тӗлӗшпе пуҫиле ӗҫ пуҫарнӑ.

kostanews.ruсайтри сӑн

Шупашкарта ултавҫӑсем ҫӳреҫҫӗ. Кун пирки тӳре-шара халӑха асӑрхаттарать.

Хваттерсем тӑрӑх ҫынсем ҫӳреҫҫӗ, вентиляци тӗрӗслеҫҫӗ имӗш. Кайран куншӑн укҫа ыйтаҫҫӗ. Анчах ун пек ҫынсене укҫа памалла кӑна мар, хваттере те кӗртмелле мар.

Астӑвӑр: венитляцие управляющи компанийӗ тӗрӗслет. Кун пирки маларах пӗлтереҫҫӗ: мессенджерта е подьезд умӗнчи пӗлтерӳ хӑми ҫинче. Ку - тӳлевсӗр.

Вентиляци тӗрӗслеме килнӗ ултавҫӑсем пирки полицие шӑнкӑравласа каламалла.

rosbalt.ru сайтри сӑн

Ҫу уйӑхӗн 27-мӗшӗнче Шупашкарта пурӑнакан арҫын ҫурҫӗр иртни 1 сехетре полицие пынӑ. Киле таврӑннӑ чухне ӑна такам тапӑнса 13 пин тенкӗ тӑракан телефонне вӑрланӑ.

30 ҫулти арҫын каланӑ тӑрӑх, вӑл ҫӗрле хупахран таврӑннӑ, утса пынӑ чухне ӑна такам хыҫалтан тӗкнӗ те аллинчи телефонне вӑрласа тарнӑ.

Вӑрра тупнӑ. Ҫав ҫын та хупахра пулнӑ иккен. Шӑпах ҫавӑнта вӑл ют ҫын телефонне куҫ хывнӑ ахӑртнех. Тытса чарнӑ тӗле ун ҫумӗнче телефон пулман. Ӑна шырама тивӗ.

ШӖМ тунӑ сӑн

Ҫу уйӑхӗн 27-мӗшӗнче ҫӗрле Ҫӗнӗ Шупашкарта полицейскисем ача-пӑча велосипедне йӑтса утакан арҫынна курнӑ та ун патне пырса ыйту панӑ. Велосипедпа ӑҫта каять вӑл? Лешӗ нимех те хуавлайман.

Кайран ҫакӑ паллӑ пулнӑ. 36 ҫулти арҫын ӑна Винокуров урамӗнчи ҫуртри подьездран вӑрланӑ иккен. Тӑванӗсем патне хӑнана килнӗ те эрех ӗҫес килсе кайнӑ. Подьездра велосипед курсан ӑна йӑтса тухнӑ. Хайхискер икӗ кустӑрмаллӑ транспорта сутса эрех туянма шутланӑ иккен.

Велосипед хуҫи тепӗр кунхине полицие пынӑ. Транспорта тавӑрса панӑ, арҫыннӑн вара явап тытма тивӗ.

stihi.ru сайтри сӑн

Шупашкарта туса кӑларнӑ пельменре, «Сибирские» ятлӑскерте, антибиотик тупса палӑртнӑ. Пысӑк мар предприяти ертӳҫи хӑйех Россельхознадзор специалисчӗсене тӗрӗслеве чӗннӗ.

50 килограмм пельмен халӑх патне ҫитме ӗлкӗрнӗ. Антибиотик фарша ашпа тата салӑпа пӗрле лекме пултарнӑ. Сиенлӗ ҫимӗҫӗн пӗтӗм партине тӗп тума май килмен, ҫав вӑхӑталла пӗр пайне ҫынсем туянма ӗлкӗрнӗ.

Усламҫа административлӑ майпа явап тыттарса 50 пин тенкӗлӗх штрафланӑ. Ку предприяти пуш уйӑхӗнче пельмен туса кӑларма пӑрахнӑ. Ҫапла пӗлтерет «Чӑваш Ен» ПТРК.

"На связи" сайтри сӑн

Паян Шупашкарти кӑнтӑр-хӗвеланӑҫ районӗнче пысӑк пӑкӑ пуҫтарӑннӑ. Унта ирхине Граждан ҫавраҫула хупнӑ. Ку унта ҫула юсанипе ҫыхӑннӑ.

Паян шӑматкун пулсан та ку районта ир-ирех пысӑк пӑкӑ пуҫтарӑннӑ. Машинӑсем «Мускав» суту-илӳ центрӗ патӗнченех тӑнӑ.

Ҫул сарнине пула паянтан Граждан урамне Энтузиастсене урамӗпе ҫеҫ лекме пулать: Грасис урамӗпе кӗрсе Эльмен урамӗпе тухмалла. Икӗ ҫӗрте те машинӑсем валли икӗ енлӗ ҫул анчах. Ҫул юсанӑ вӑхӑтра общество транспорчӗ те Этунзиастсен урамӗпе ҫӳрӗ.

Яндекс.дзен сайтри сӑн

Кӑҫал кӑрлач уйӑхӗнче Шупашкарта пурӑнакан арҫын, тивӗҫлӗ канӑва тухнӑскер, ҫӗршыва лайӑхлатма пулӑшни пирки калакан рекламӑна асӑрханӑ. Вӑл ҫакна ӗненнӗ.

"Аналитик" пилӗк уйӑха яхӑн ватӑ арҫынна суйса пурӑннӑ. Унӑн счечӗ ҫинче укҫа пухӑнать имӗш. Арҫын хӑй 10 пин доллар ӗҫлесе илнине ӗненнӗ.

Анчах укҫана илме тӑрсан ӑна счет уҫма, унта пысӑк укҫа хума ыйтнӑ. Хӑй иккӗленсен те арҫын унта 465 пин тенкӗ куҫарнӑ. Анчах кайран хӑйех полицие пырса ултавҫӑ аллине лекни пирки заявлени ҫырнӑ.

Кун тӗлӗшпе пуҫиле ӗҫ пуҫарнӑ.

Шупашкарта асар-писер ҫулпа та ҫӳреме пултаракан грузовик кӑларма пуҫланӑ. Пӗрремӗш транспорта Казахстана карьерта ӗҫлеме ӑсатнӑ ӗнтӗ.

«Силант» ятлӑскер 3-8 тонна тиев ҫӗклеме пултарать. Ял хуҫалӑхӗнче кунашкал транспорт пӗр фургона, самосвала тата пӗчӗк трактора улӑштарайрать.

Ку транспортпа коммуналлӑ хуҫалӑхра та усӑ курма май пур. Шупашкарти машиностроени предприятийӗ пӗлтернӗ тӑрӑх, «Силантӑн» ют ҫӗршывсенче аналогсем пур: Германире, Италире.