Кӑҫалхи авӑн уйӑхӗнчи суйлав вӑхӑтӗнче хӑрушсӑрлӑх мерисене туллин пӑхӑнмалла. Ҫакӑн пирки Чӑваш Ен Правительствин ҫуртӗнче тунтикунхи планерка ирттернӗ чухне республика Элтеперӗн тивӗҫӗсене вӑхӑтлӑх пурнӑҫлакан Олег Николаев сӑмах хускатнӑ.

Яваплисен кӑшӑлвирус сарӑлнипе кӗрешекен республикӑри оперштабӑн эрнекунхи ларӑвӗ тӗлне сӗнӳсем хатӗрлемелле. Ҫав шутра — республикӑн Тӗп суйлав комиссийӗн те. Ҫавсене шута илсе татӑклӑ йышӑну тӑвӗҫ. Хӑрушсӑрлӑх валли хушма укҫа кирлӗ пулсан уйӑрӗҫ, суйлав комиссийӗсен пайташӗсене вӗрентмелле пулсан вӗрентӗҫ.

Аса илтерер: кӑҫалхи авӑн уйӑхӗн 13-мӗшӗнче эпир республика Элтеперне тата вырӑнти хӑй тытӑмлӑх орагнӗсен депутачӗсене суйлӑпӑр.

Чӑваш Енре кӑшӑлвируспа чирленӗ икӗ ҫын вилнӗ. Ку инкек пӗр талӑкра пулса иртнӗ.

Официаллӑ кӑтартусене шансан, пандеми пуҫланнӑ хыҫҫӑн кӑшӑлвирус диагнозӗллӗ 64 ҫын пурнӑҫран уйрӑлнӑ. Иртсе кайнӑ талӑкра вилекенсем пулман тесе Чӑваш халӑх сайчӗ ӗнер ҫеҫ пӗлтернӗччӗ. Анчах, куратпӑр ӗнтӗ, савӑнӑҫ нумая пымарӗ.

Иртсе кайнӑ талӑкра кӑшӑлвируспа чирлӗ 32 ҫынна тупса палӑртнӑ. Ҫулталӑк пуҫланнӑранпа 7042 ҫын чирленӗ. Сипленнисен йышӗ – 4312, ҫав шутра 67-ӗн – иртсе кайнӑ талӑкра.

Чӑваш Енре районти пульницӑсенче те ӳлӗмрен кӑшӑлвирусран анализ илме тытӑнӗҫ. Ун валли ятарлӑ кунсем пӑхса хӑварӗҫ. Кун пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев оперштабӑн ларӑвӗнче каланӑ.

Кӑшӑлвируспа чирлекенсен йышӗ, пӗтӗмӗшле илсен, пирӗн республикӑра ӳссех пырать. Ытахальтен мар ӗнтӗ общество транспортӗнче маска тӑхӑннине тӳре-шара тӗрӗслеме рейдсене тухать. Лавккасенче маска тӑхӑнмаллине каллех аса илтерме пуҫларӗҫ. Хӑш-пӗр суту-илӳ точкинче сӑмсапа ҫӑвара хӳтӗлекен хатӗр тӑхӑнмасан тавар сутма юраманни пирки пӗлтереҫҫӗ.

Юлашки талӑкра пирӗн тӑрӑхра COVID-19 диагнозӗллӗ 30 ҫынна тупса палӑртнӑ, 65 ҫын сывалнӑ, вилекенсем пулман.

Ҫулталӑк пуҫланнӑранпа пурӗ 7 010 ҫынна кӑшӑлвирус диагнозӗ лартнӑ. Ҫурла уйӑхӗн 8-мӗшӗ тӗлне 4 245 ҫын сывалнӑ, 2 765 ҫын чирлет.

Тӗнчере, ҫав шутра пирӗн ҫӗршывра та, кӑшӑлвирус пандемийӗ пуҫланнӑранпа Чӑваш Енре 62 ҫын вилнӗ.

Ҫурла уйӑхӗн 2-мӗшӗ тӗлне илсен пирӗн республикӑра кӑшӑлвирус диагнозӗллӗ тата тепӗр икӗ ҫын вилнӗ. Ҫапла вара ҫулталӑк пуҫланнӑранпа 56 ҫын пурнӑҫӗ татӑлнӑ. Цифрӑсене федерацин информаци центрӗ пӗлтернӗ.

Иртсе кайнӑ талӑкра Чӑваш Енре кӑшӑлвируспа чирлисене тата тепӗр 37 тӗслӗх шута илнӗ. Ҫулталӑк пуҫланнӑранпа ку амакпа 6 811 ҫын чирленӗ. Сывалнисем – 3 857 ҫын, вӗсенчен 65-шӗ юлашки талӑкра сывалнӑ.

Хальхи вӑхӑтра пирӗн республикӑра кӑшӑлвируспа 2 898 ҫын чирлет. Чир сарӑлнин индексӗ – 0,97.

Сӑмах май каласан, Раҫҫей ӗнертенпе тӑватӑ ҫӗршывпа: Турципе, Великобританипе, Абхазипе тата Танзанипе – хӑйӗн чиккине уҫрӗ. Турцие, Великобритание тата Танзание самолетсем вӗҫме тытӑнчӗҫ. Ют ҫӗршывран килекенсен килтен тухмасӑр ик эрне ларма тивмӗ.

ryazan.bezformata.com сӑнӳкерчӗкӗ

Етӗрне районӗнчи Чаканар Упинче карантин тесе йышӑннӑ. Ку хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ӗнер, ҫурла уйӑхӗн 1-мӗшӗнче, алӑ пуснӑ. Ҫапла йышӑнӑва республика ертӳҫи «Ветеринари ҫинчен» федераци саккунӗпе килӗшӳллӗн тата Чӑваш Ен Патшалӑх ветеринари службин ертӳҫи сӗннипе тунӑ.

Тискер чӗрчунсен урнӑ чирне палӑртнӑ хыҫҫӑн ял ҫыннисен выльӑх-чӗрлӗх сутса туянма юрамӗ. Асӑннӑ террриторири чӗрчунсене куравсене те илсе кайма чарнӑ.

Урнӑ чире пула йышӑннӑ карантин вӑхӑчӗ ӗнер пуҫланнӑ. Республика ертӳҫин хушӑвӗнче каланӑ тӑрӑх, чару мерисем выльӑх чирленӗ хыҫҫӑн икӗ уйӑх иртсен вӗҫленӗҫ.

Чӑваш Енре пурӑнакан кӑшӑлвирус диагнозӗллӗ тата тепӗр виҫӗ ҫын вилнӗ. Паян республикӑн Сывлӑх сыхлав министерстви официаллӑ статистикӑна пӗлтернӗ. Пурнӑҫран уйрӑлакансем хӑш тӑрӑхран тата вӗсем миҫерине, ытти мӗнле амакпа нушаланнине ҫырман. Ун пеккине тахҫанах хыпарлама пӑрахрӗҫ. Апла пӗлтерни вилнисен тӑванӗсене хурлантарать тесе шухӑшлаҫҫӗ.

Пандеми пуҫланнӑранпа пирӗн тӑрӑхра кӑшӑлвирус диагнозӗллӗ 54 ҫын пурнӑҫран уйрӑлнӑ. Иртсе кайнӑ талӑкра тата тепӗр 40 ҫын чирлине шута илнӗ. Ҫулталӑк пуҫланнӑранпа 6 734 ҫын чирленӗ.

Сывалнисен йышӗ – 3 725, ҫав шутран 45 ҫын юлашки талӑкра сывалнӑ. Хальхи вӑхӑтра 2 955 ҫын сывалнӑ.

Чир сарӑлнин индексӗ текен кӑтарту та пур тухтӑрсен. Пирӗн республикӑра ҫав цифра – 0,98.

Кӑшӑлвируспа чирлекенсене тата тепӗр 44 ҫын чирленӗ. Ҫулталӑк пуҫланнӑранпа пирӗн республикӑра 6 653 ҫын ҫак амакпа чирленӗ. Ку цифрӑна Чӑваш Ен Сывлӑх сыхлав министерствинче паян пӗлтернӗ.

Эпидемиологи тапхӑрӗ пуҫланнӑранпа 3 647 ҫын сывалнӑ, ҫав шутра 31 ҫын — юлашки тапхӑрта. Хальхи вӑхӑтра Чӑваш Енре 2 955 ҫын чирлет.

Юлашки тапхӑрта, тавах Турра, вилекен пулман. Аса илтерер: ҫулталӑк пуҫланнӑранпа кӑшӑлвирус диагнозӗллӗ 51 ҫын вилнӗ. Хурлӑхлӑ ҫавӑн пек тӗслӗхе юлашкинчен утӑ уйӑхӗн 24-мӗшӗнче шута илнӗ.

Роспотребнадзорӑн Чӑваш Енри управленийӗнче пӗлтернӗ тӑрӑх, утӑ уйӑхӗн 28-мӗшӗ тӗлне кӑшӑлвирусран 136 188 тест тунӑ, ҫав шутра иртнӗ талӑкра – 1 069 тест.

Чӑваш Енре кӑшӑлвирус сарӑлнине хирӗҫ йышӑннӑ чару мерисен иккӗмӗш тапхӑрне куҫасси пирки калаҫаҫҫӗ-ха. Ҫав вӑхӑтрах ҫак вируспа чирлекенсем ҫав-ҫавах йышлӑ.

Официаллӑ статистикӑна ӗненсен, иртсе кайнӑ талӑкра пирӗн республикӑра кӑшӑлвирус диагнозне тата тепӗр 44 ҫынӑнне шута илнӗ. COVID-19 диагнозне пӗтӗмпе 6484 тӗслӗх тупса палӑртнӑ. Сӑмах май каласан, социаллӑ учрежденисенче те пысӑк йышпа чирлекенсем пур. Аса илтерер: Кӳкеҫри ваттисемпе сусӑрсен ҫуртӗнче 22 ҫын кӑшӑлвируспа чирленӗ, ҫав шутра 11 ҫын – ваттисен ҫуртӗнче ӗҫлекенсем.

3516 ҫын сывалнӑ, ҫав шутран 31-шӗ – юлашки тапхӑрта.

Кӑшӑлвирус 51 ҫыннӑн пурнӑҫне татнӑ. Юлашки талӑкра вилнисене шута илмен.

Кӳкеҫри ваттисемпе сусӑрсем интернат-ҫуртӗнче кӑшӑлвируспа йышлӑн чирлеҫҫӗ.

Асӑннӑ чир сарӑлассине кӗрешекен оперативлӑ штаб паян ларӑва пухӑннӑ. Роспотребнадзорӑн Чӑваш Енри управленийӗн пуҫлӑхӗ Надежда Луговская пӗлтернӗ тӑрӑх, ваттисен ҫуртӗнче COVIDпа 22 ҫын чирленӗ. Вӗсен йышӗнче учреждени ӗҫченӗсем те, пурӗ 11 ҫын, пур.

Надежда Луговская каланӑ тӑрӑх, вируса учреждени ӗҫченӗ ҫаклатнӑ, ун урлӑ ыттисене ернӗ. Ваттисен ҫуртӗнче чире сарасран кирлӗ мера вӑхӑтра йышӑнман-мӗн. Вирус ернисене уйрӑм тытмалла пулнӑ. Роспотребнадзор санитарипе эпидемие хирӗҫ мерӑсем йышӑнма, чирлисене уйрӑм тытма хушнӑ.

Ҫу уйӑхӗнче чир Кӳкеҫри сусӑр ачасен ҫуртӗнче сарӑлнӑ. Ун чухне 14 тӗслӗх шута илнӗ.

yandex.ru сӑнӳкерчӗкӗ

Чӑваш Енри пульницӑсенче хальхи вӑхӑтра вырӑнпа выртакансем патне те кӗртмеҫҫӗ. Кун пирки Маргарита Красотина журналист Фейсбукра ҫырнӑ.

«Паян кашни пульница-стационар, кашни!, крепость евӗр пулса тӑчӗ. Пульницӑра выртакан ҫывӑх ҫынни патне палатӑна кӗртмеҫҫӗ ҫеҫ мар, пульницӑн холне е коридорне те иртейместӗн. Пандеми правилисем стационарсене тата вырӑнпа выртакан чирлӗ ҫынсене пӑхакансемсӗр хӑварчӗ», — хыпарланӑ журналист.

Чӑн та, вырӑнпа выртакансене пӑхакансем пульницӑсене ахаль те ҫукчӗ. Ун пекккисене, мӗн пытармалли, ҫывӑх ҫынсемсӗр йышӑнасшӑн та марччӗ маларах. Кун пеккине ҫак йӗркесен авторӗ хӑй те курнӑччӗ. Халӗ, ав, кӗрес-пӑхас тесен те ирӗк памаҫҫӗ иккен. Хуралҫӑ тытса чарать. Мӗн тӑвас, йӗрки ҫапла. Кӑшӑлвирус...