Уйăх çийĕнчи пике

Çутă уйăх пайăрки

Кĕчĕ кантăкран.

Ачашларĕ, ак, хайхи

Шăвăнса, пуçран.

Эп вăрантăм ыйхăран

Вăл сĕртĕнсенех.

Куçсене хупмасăрах,

Выртрăм ирчченех.

Уйăх çийĕнчи пикен

Пит хитре утти.

Шывпа авăннă пекех

Унăн кĕвенти.

Умĕнчи шăрçа пуххи

Ахахпа пĕрех.

Пуçĕ çийĕнчи тухйи

Шăнкăр турĕ пек.

Чăваш хĕрĕ йăл кулса

Уçлăхран пăхать.

Ун кулли, шерпет пулса,

Çĕр çине юхать.

Çĕнĕ комментари хуш