Чи тарăн тинĕсре улмуççисем ӳсеççĕ...
Чи тарăн тинĕсре улмуççисем ӳсеççĕ,
Улмийĕсем ӳкеççĕ пĕлĕте.
Хумсен сарлакăшне çилсем чупса виçеççĕ,
Чăмса çитмешкĕн уйăх вĕрентет.
Çут кĕмĕл çиппинчен мана вĕрен явтарĕ.
Кăкарăп та хумсен кăралăхне
Хăрах вĕçне ирех хĕвел çакса антарăп
Вăлтса тăмашкăн тинĕс ырлăхне.
Улмуççисем кунта нихçан курман пек анăç —
Шыв пуллисем çӳреççĕ антăхса...
Тулли тураттисем улмисене тăкаççĕ
Сар кайăкшăн пĕрмай тунсăхласа.
Лăпланĕ тинĕс, пĕлĕт тăрĕ çепĕç —
Кунпа каçа хупатĕп кĕлете:
Сар кайăк куçĕнче панулмисем пиçеççĕ —
Чăмса татмашкăн уйăх вĕрентет.
Вулавçăсен шухăшĕ
Çĕнĕ комментари хуш
Улатимĕр (2010-02-08 19:44:52):
Чаплă!!! Мĕн чухлĕ сăнарлăх кунта.
Улькка (2018-09-05 21:48:29):
Тĕленмелле, менле пуян чăваш челхи!