Çурлапа мăлатук

Аркадий Ĕçхĕл | Сăвă | 1961 | 1 638


Манмастăп эпĕ халиччен

Пĕр хĕллехи куна:

Аттемçĕм граждан вăрçинчен

Çитсеччĕ тин кăна.

 

Пӳрте кĕрсе хывăнсанах,

Салтсан кутамккине,

Парнелĕх панăччĕ мана

Вăл хăйĕн çĕлĕкне.

 

Çиçетчĕ çăлтăр ун çинче

Ытла ытарма çук.

Çăлтăр çинче, чăн варринче —

Çурлапа Мăлатук.

 

Çавăркала пăха-пăха,

Эп тĕлĕнтĕм чунтан:

— Ку Çурлапа Мăлатука

Ма лартнă-ши кунта?

 

Атте калать хайхи мана:

— Ăнланăн-ха ӳссен...

Пуçларĕç çĕнĕ самана

Рабочипе хресчен.

 

Вĕсем тăван халь, тĕнчере

Ун пек тăванлăх çук.

Тус пулĕç ĕмĕр-емĕрех

Çурлапа Мăлатук.

 

Кунсем васкарĕç йĕркерен,

Çул выртрĕ ман ума.

Пĕр ĕмĕт тытрăм пĕчĕкрен

Эп агроном пулма.

 

Пичче вĕренчĕ тимĕрçе,

Вăл кайрĕ завода.

Яла килсеччĕ пĕринче

Канмалăх вăхăта.

 

Тек ĕнтĕ эп те ача мар,

Ман ав диплом та пур.

Пиччепеле эп юнашар

Ларатăп — пăх та кур!

 

Анне сĕт-çу илсе кĕрет,

Пылне те кăларать.

Ун умĕнче кĕрекере

«Хулапа ял» ларать.

 

Анне пире сăйланăçем:

— Аçăр кăна, — тет, — çук...

Эсир шăпах-çке, ачамсем,

Çурлапа Мăлатук.

 

Çулсем...

Кĕç тĕтĕм тĕнчепе

Хупларе хуп-хура.

Çухатрăм эпĕ пиччене

Хăрушă вăрçăра.

 

Çапах та пирĕн йăх-тăван

Пĕтмерĕ. Пĕтес çук!

Пиччен ик ывăлĕ паян —

Çурлапа Мăлатук.

 

Пĕри ĕçлет мăн хулара,

Тепри — тăван ялта.

Асилтереççĕ хамăра

Вĕсем иккĕш йăлтах.

 

Вĕсем кăна-и! Çĕршывра

Вĕсен халь шучĕ çук:

Кашни йĕркеллĕ кил-йышра —

Çурлапа Мăлатук!

 

Çапла халь пĕр кĕрекере

Ларать ялпа хула.

Чăн-чăн ылтăн кĕнекере

Çавăн çинчен вула!

 

Çав аслă туслăхăн палли

Хăмач ялав çинче.

Рабочипе хресчен алли —

Малашлăх ĕçĕнче.

 

Хăватлă, аслă туслăха

Никам аркатас çук.

Çутат мĕнпур тавралăха,

Çурлапа Мăлатук!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: