Электронлă вулавăш

Хăпартланать виçесĕр пӳ —

Хавасăм кăкăрăм тулли.

Ак сарăлса ларать Çĕрпӳ,

Ман çамрăклăх хули.

 

Пĕлӳ вучахĕ, альма матер!

Паян та эсĕ чĕрере.

Паян та сан шăпушăн хатĕр

Кĕмешкĕн эп чĕрре.

 

Иртни аса килет халь пĕтĕм.

Пĕр ирхине ача пуçпа

Çăпатапа килсе эп кĕтĕм,

Анчах та — чăрсăр шухăшпа.

 

Пулсаччĕç ĕмĕтсем хăватлă,

Шутлаттăм эпĕ савăнса:

Виç çул иртет-и е тăваттă,

Астăнăм кайĕ çуталса.

 

Пĕр эпĕ çеç-и? Пурте хăйшĕн

Веçтернĕ шухă кайăка.

Тĕнче пек пысăк ĕмĕтсемшĕн

Никам та хумĕ айăпа.

 

...Хула çине пăхса пĕр вĕçĕм

Калланчĕç шухăшсем нумай.

Çынна курнать-и манăн ĕçĕм

Е çав-çавах эп тăрнаккай?

 

Чĕреçĕм сăвăпа хĕрет-и, —

Вăл ман сăвапăм, ман савни.

Пур хам виçе, пур хамăн кредо —

Хам евĕр тĕнчене курни.

 

Сахал-и эпĕ ăшталаннă

Хам телее шыра-шыра.

Ан пултăр выçă куç, куштанлăх

Нихçан та пирĕн хушăра.

 

Сăнан пăхма эп чĕмсĕр майлă,

Чапа хăварнăн ырана,

Туятăп эп, пĕлетĕп лайăх

Поэзири хам вырăна.

 

Çӳретĕп эп хама хам маннăн

Ĕç-пуç пирки пăлханнă май.

Мухтанмалли çукрах-ха манăн.

Тумаллисем кăна нумай.

 

Салам, Çĕрпӳ, ман яшлăх килĕ.

Тĕл пулнă хыççăн санпала

Вĕрет питрен хастарлăх çилĕ,

Каллех çĕклет ман кăмăла.

 

Çĕн вăй-хăват ăшра çуралчĕ.

Илтетĕп ĕмĕт чĕннине.

Чи хаклă ĕмĕтĕм — çырасчĕ

Ман хамăн тĕп кĕнекене!

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн