Электронлă вулавăш

Эпир санпа çурма çулта

Уйрăлтăмăр, çак кун

Улатчĕ çил-тăман тулта,

Шăнса хытнăччĕ чун.

Пĕлмен, халь йывăр асăнма,

Ыйтман пĕр-пĕринчен.

— Каçар… — сăмах çеç калама

Вăхăт пулман ирччен.

Çитейрĕ уйăх хăпарса,

Сар кăшăл пек, çӳлтен,

Çак инкеке курса тăрса

Пирĕн хушша кĕмен.

Çил ачисем пӳрнисемпе

Лăсканă çӳçсене.

Вĕсем, каçхи асамçă пек,

Тустарнă пуçсене.

Яла эс юлăн, хулара

Эп пулăп ырантан, —

Вилмен вĕт-ха эпир, ара,

Сикмен вĕт çырантан…

Телей сунма, сыв пул теме

Кам чарнă-ха пире?

Тур хушнă, çырнă этеме

Кĕтмешкĕн çĕн ире.

Хĕвелĕ тухрĕ тепĕр ир,

Анчах пирĕншĕн мар.

Çуталчĕ шурă юрлă хир,

Пирĕншĕн вăл — пушар…

Ним пулман пек уйрăлтăмăр:

Вăрçман пач, хирĕçмен…

Пĕр-пĕрин урлă тăтăмăр, —

Мĕн тăвăн, тен, пӳрмен?