Чӑваш патшалӑх гуманитари ӑслӑлӑхӗсен институтӗнче паян, ҫӗртмен 17-мӗшӗнче, «Чӑваш ҫырулӑхӗ: иртнипе хальхи» ятпа тӗнчери ӑслӑлӑхпа ӗҫлӗх конференцийӗ иртрӗ. Ӑна Е.И. Рожанский ҫуралнӑранпа 270 ҫул, В.П. Вишневский ҫуралнӑранпа 175 ҫул тата ҫӗнӗ чӑваш ҫырулӑхӗ йӗркеленӗренпе 140 ҫул ҫитнине халалласа хатӗрленӗ.

Конференцие институт дирекорӗ Исаев Юрий Николаевич уҫрӗ. Пленарлӑ ларура (вӑл 10 сехетре пуҫланчӗ) Родионов Виталий Григорьевич (тӗп шухӑшӗ: Вишневскийпе Рожанскийсем пулмасан пирӗн ҫак ҫӗнӗ ҫыруллӑх та пулмӗччӗ, вӗсен тӳпине те шута илмелле), Егоров Николай Иванович тата Мукина Ираида Васильевна доклад каларӗҫ. Николай Иванович хӑйӗн сӑмахӗнче карт ҫырулӑхӗ пирки каласа пачӗ — унӑн тӗсӗсем, аталанӑвӗ, ыйтӑвӗсем. Ираида Васильевнӑн доклачӗ Иван Яковлев чӑваш халӑхне ӑс-хакӑл тӗлӗшӗнчен мӗнле ӳсӗм пани пирки пулчӗ.

12 сехетрен пуҫласа секцисем ӗҫлерӗҫ. Вӗсенче Сергеев Леонид Павлович, Хусанкай Атнер Петрович, Яковлев Юрий Васильевич, Маркова Людмила Валентиновна (Елчӗк районӗ, Энтепе шкулӗ), Доброва Надежда Васильевна, Лебедев Эдуард Евгеньевич, Дмитриева Юдит тата ыттисен доклачӗсене итлеме май пулчӗ. Конференци тӗнче шайӗнче иртрӗ — докладҫӑсем чӑвашран кӑна мар, Мускавран та, Казахстанран та пулчӗҫ.

Материалӗсене каярах электронлӑ формӑпа кӑларма палӑртнӑ — унта эсир кашни докладпа паллашайратӑр.

#ЧПГӐИ, #чӑваш чӗлхи, #конференцисем