Ҫӗнӗ Шупашкар хула пульницин йышӑну уйрӑмӗн тухтӑрне судпа айӑпласшӑн. РФ Следстви комитечӗн Чӑваш Енри следстви управленийӗн пресс-служби пӗлтернӗ тӑрӑх, ӑна пациент вилӗмӗшӗн айӑпласшӑн.

Следстви версийӗ тӑрӑх, пӗлтӗрхи ҫурла уйӑхӗн 1-мӗшӗнче ҫак тухтӑр дежурствӑра пулнӑ. Васкавлӑ медпулӑшу 56 ҫулти пациента илсе килнӗ, унӑн пневмони пулнине палӑртнӑ. Пациент ӳт температури хӑпарнине, вӑй ҫуккине, ӳслӗк пулине, ӳсӗрнӗ чухне ӳпке тӗлӗнчен ыратнине пӗлтернӗ. Тухтӑр вара ҫаксене илтсен те тӗрӗс мар диагноз лартнӑ.

Тухтӑр пациента пульницӑна вырттарман, килте сипленме сӗннӗ. Арҫын вара тепӗр кунхине килте йывӑр чире пула вилнӗ. Экспертиза та вӑл пневмоние пула сывлама пӑрахнине ҫирӗплетнӗ.

#Ҫӗнӗ Шупашкар, #пульницӑсем, #тухтӑрсем, #судсем