Ытларикун, утӑн 25-мӗшӗнче, Тутарстанра ППЭ мӗнле иртнине пӗтӗмлетнӗ. Темиҫе кун маларах Владимир Путин чӗлхесене (сӑмах республикӑсенчи вырӑс мар чӗлхесем пирки пырать) ирӗксӗрлесе вӗрентмелле марри пирки каланӑран кӳршӗре ППЭ мӗнле иртни чылайӑшне кӑсӑклантарнӑ. Сӑмах май, Тутарстанрисем Раҫҫей Президенчӗн сӑмахӗсене хӑйсем ҫине илнӗ, Йошкар-Олара вӑл имӗш шӑп та лӑп тутарсем пирки каланӑ пулать. Аса илтерер, Тутарстанра тутар чӗлхи валли шкулсенче вырӑс чӗлхи валли пекех эрнере 5-шер сехет уйӑрнӑ (пирӗн республикӑрах чӑваш чӗлхин сехечӗсем самай сахалрах). Хӑшӗ-пӗри шухӑшӗпе ҫакӑ вырӑс чӗлхине вӗренме кансӗрлет.

Тутарстанри тӳре-шара пӗлтернӗ тӑрӑх вӗренӳ программинче вӗсем нимӗн те улӑштармӗҫ, малтанхи пекех вӗрентӗҫ. ППЭ пӗтӗмлетӗвӗ те Раҫҫейри вӑтам кӑтартусенчен пӗрре те катӑкрах мар. Сӑмахран, Питӗрти шкул ачисемпе танлаштарсан, лайӑхрах та. Мускаврисенчен вара 0,03 балл кӑна кая юлса пыраҫҫӗ. Ку вара статистикӑри йӑнӑш виҫинчен иртмест.

Тутарстанӑн вӗренӳпе ӑслӑлӑх министрӗ Энгель Фаттахов журналистсене республикӑри вӗренӳ тивӗҫлӗ шайра пыни пирки каласа панӑ. Вырӑс чӗлхине пӑхсан республикӑри ачасем Сарӑту облаҫӗнчисенчен чылай лайӑхрах пӗлеҫҫӗ.

Журналистсем Энгель Фаттаховран Владимир Путин сӑмахӗсем пирки ыйтсан министр республикӑри вӗрентӳ саккунпа килӗшӳллӗн пыни пирки каланӑ: «Пирӗн Тутарстан Республикин Конституцийӗ пур, чӗлхесем пирки калакан саккун пур, вӗренӳ ҫинчен саккун пур, пирӗн икӗ патшалӑх чӗлхи — вырӑс тата тутар чӗлхисем. Патшалӑх чӗлхисене пирӗн пӗр тан калӑпӑшпа вӗренеҫҫӗ. Эпир федераллӑ стандарт тӑрӑх ӗҫлетпӗр. Ку енпе пирӗн нимӗнле йӗрке пӑсни те ҫук. Эпир кашни хамӑр ӗҫе РФ вӗренӳ министерствипе калаҫса татӑлса тӑватпӑр. Эпир ӗҫ пурнӑҫлакансем, эпир саккуна пурнӑҫлатпӑр».

#Тутарстан, #тутар чӗлхи, #Президент, #вырӑс чӗлхи, #кӳршӗре, #политика, #вӗренӳ, #экзаменсем, #ППЭ, #Раҫҫейре