2018 ҫулхи нарӑсӑн 28-мӗшӗнче Хӗрлӗ Чутай районӗнчи Кӗрлев ялӗнче 1919-мӗш ҫулхи пуш уйӑхӗн 21-мӗшӗнче ҫуралнӑ, юлашки ҫулсенче Шупашкарта пурӑннӑ виҫӗ вӑрҫӑ ветеранӗ, педагог, чылай орден-медаль кавалерӗ Яковлев Алексей Алексеевич ҫут тӗнчерен уйрӑлса кайнӑ.

Алексей Яковлев ӗмӗр тӑршшӗпех ҫамрӑксене тӑван ҫӗршыва юратма, ҫӗршывшӑн кар тӑма чӗнсе каланӑ. Штанашри 7 класлӑ шкул хыҫҫӑн 1932 ҫулта Етӗрнери педтехникума вӗренме кӗнӗ. Ун хыҫҫӑн 2 ҫул хушши Етӗрне районӗнче шкулта ӗҫленӗ. 1938 ҫултан пуҫласа 1946 ҫулччен ҫарта пулнӑ. Танкист вӑрҫӑра 4 хутчен аманнӑ, 2 хутчен ун контузи тӳсме тивнӗ, танкра чутах ҫунса кайман. Вӑрҫӑ хыҫҫӑн Ҫӗмӗрле районӗнчи Мисчӗри шкулта истори учителӗ пулса ӗҫленӗ (1946–1969), ҫав хушӑрах Шупашкарти пединститутран кӗретсӗр мелпе вӗренсе тухнӑ (1948–1953). 1969–1979-мӗш ҫулсенче вӑл Шупашкарти 33-мӗш шкулта ачасене вӗрентнӗ. Пенсие тухсан та килте ларман ветеран, Етӗрне районӗнчи Засурскинчи лаша савутӗнче тӑрӑшнӑ (1979–1990).

Вӑрҫӑ ветеранӗ хӑйӗн тӑван Кӗрлев ялне те манса кайман, ял уявне 2 хутчен килме пултарнӑ. Вӑрҫӑра ун Георгий Жуковпа тӗл пулма тивнӗ, нумаях пулмасть Владимир Путинпа та Мускаври тӗлпулура асӑнмалӑх сӑн ӳкерӗннӗ.

Вӑрҫӑ паттӑрӗсенчен пирӗн ӑрӑвӑн вӗренмелли нумай, мӗн чухлӗ йывӑрлӑх, вут-ҫулӑм витӗр тухса шӑраннӑ ҫынсем хӑйсен шӑписене пӗртте ӳпкелешмен, шав малалла тапаланнӑ та тапаланнӑ. 99 ҫула кӑштах пурӑнса ҫитеймен Алексей Алексеевич Яковлев хӑйӗн ӗмӗрӗнче мӗн чухлӗ ырӑ ӗҫ туса хӑварнӑ!

Эпир унӑн сӑнарне яланах асра тытӑпӑр.

#Кӗрлев, #ветерансем, #ҫухатусем, #Хӗрлӗ Чутай районӗ, #Етӗрне районӗ, #Штанаш, #Мисчӗ