Чӑваш Енӗн Экономика аталанӑвӗн, промышленноҫӑн тата суту-илӳ министрӗн пӗрремӗш ҫумӗ Инна Антнова тӗлӗшпе тӗрӗслев пуҫарнӑ. Ҫакӑн пирки эпир республикӑн влаҫ органӗсен официаллӑ порталӗнчи хушусем тӑрӑх пӗлтӗмӗр. Ӗҫлӗ хута регион Элтеперӗ Михаил Игнатьев ӗнер алӑ пуснӑ.

Чӑваш Енӗн влаҫ органӗсен официаллӑ порталӗнчи хушусем тӑрӑх хакласан, тӗрӗслеве ЧР вице-премьерӗ Владимир Аврелькин тӗлӗшпе те пуҫарнӑ. Ун тӗлӗшпе тӗпчевҫӗсем пуҫиле ӗҫ пуҫарнине Чӑваш халӑх сайчӗ хыпарланӑччӗ-ха. Ӑна, экономика аталанӑвӗн, промышленноҫӑн тата суту-илӳ министрне, вӑхӑтлӑха ӗҫрен хӑтарнине те эпир пӗлтернӗччӗ. Министрӑн пӗрремӗш ҫумне Инна Антоновӑна та ӗҫрен вӑхӑтлӑха сирме йышӑннӑ. Михаил Игнатьев Элтеперӗн ӗнерхи хушӑвӗнче ҫавна тӗрӗслев пынипе сӑлтавланӑ.

#Экономика министерстви, #хушусем, #Элтепер, #тӳре-шара, #пӑтӑрмахсем