tulapressa.ru сӑнӳкерчӗкӗ

Шупашкар хулинчи йӗрке хуралҫисем 46 ҫулти хӗрарӑм тӗлӗшпе пуҫиле ӗҫ пуҫарнӑ. Ӑна вӗсем ҫын укҫине тытнӑшӑн айӑпласшӑн.

Юпа уйӑхӗн 5-мӗшӗнче Шупашкар хулинчи йӗрке хуралҫисенчен 32 ҫулти арҫын пулӑшу ыйтнӑ. Вӑл вӗсене ӑнлантарнӑ тӑрӑх, Трактор тӑвакансен проспектӗнчи пӗр банкоматран 3 пин тенкӗ укҫа илес тенӗ. Анчах банк карттине илнӗ те укҫа пирки манса кайнӑ. Васканипе ҫавӑн пек пулса тухнӑ унӑн. Темиҫе минутран аса илет те, каялла ҫаврӑнса пырать. Анчах банкоматра укҫа хӑй хуҫине кӗтсе выртман.

Йӗрке хуралҫисем арҫын уйрӑлса кайнӑ хыҫҫӑн банкомат патне хӗрарӑм пынине палӑртнӑ. Шӑпах вӑл ҫын укҫине илсе чикнӗ те. Ун тӗлӗшпе «Вӑрланӑшӑн» статьяпа пуҫиле ӗҫ пуҫарнӑ.

#пӑтӑрмахсем, #ШӖМ, #Шупашкар, #укҫа-тенкӗ, #пуҫиле ӗҫсем