epp.genproc.gov.ru сӑнӳкерчӗкӗ

Шупашкар хулинче пурӑнакан 33 ҫулти хӗрарӑм пӗрле пурӑннӑ арҫынна вӗлернӗ.

Харкашу ака уйӑхӗн 5-мӗшӗнче ирхи 9 сехетре пулса иртнӗ. Ҫемье Грасис урамӗнче пурӑннӑ. Ҫав кунхине ҫамрӑк хӗрарӑм ӳсӗр пулнӑ. Пӗрле пурӑнакан 38 ҫулти арҫын киле час таврӑнман. Ҫавӑншӑн тулашнӑ хӗрарӑм арҫынпа харкашма тытӑннӑ. Тарӑхнӑскер аллине ҫӗҫӗ ярса илнӗ, унпа арҫынна кӑкӑр тӗлӗнчен пӗр хутчен чикнӗ.

Ҫӗҫӗпе чикнӗ хыҫҫӑн хӗрарӑм арҫынна пӗрремӗш пулӑшу кӳме хӑтланнӑ, хӑйех тухтӑрсене чӗнсе илнӗ. Суд ҫавна шута илнӗ — хӗрарӑма 7 ҫуллӑха пӗтӗмӗшле режимлӑ колоние ӑсатнӑ.

#пӑтӑрмахсем, #ҫемьесем, #яваплӑх, #прокуратура