Пӗрлӗх ушкӑнне кӗрекенсем

Кӗҫнерникун, акан 17-мӗшӗнче, Чӑвашкино ҫуртӗнче Чӑваш Республикинчи кино ӳкерекенсен пӗрлешӗвӗн черетлӗ пухӑвӗ иртнӗ. Унта ятарласа пӗр ыйту кӑна сӳтсе явнӑ — ҫу уйӑхӗн 19–24-мӗшӗсенче Шупашкарта иртекен кино фестивальӗнче чӑвашла киноматографине кӗртессине.

Пӗтӗм тӗнчери кино фестивальне 7 чӑваш киновне тӑратма йышӑннӑ. Хальлӗхе, вӑхӑт иртсе кайнине пула, ку ӗҫсем конкурс тулашӗнчисем пулӗҫ. Ҫак картинӑсене кӗртнӗ: «Аксар» студи хатӗрленӗ «Чупкӑн» тата «Франци хӗрӗ тыткӑнларӗ чӗрене» илемлӗ фильмсене, «Салам» студи ӳкернӗ «Юхха» фильма, «Орион» кӑларнӑ «Манӑн та телейлӗ пулас килет» картинӑна, «Спектр» студин «Последняя кража» ӗҫе (ӑна вырӑсла ӳкернӗ). Ку выляв фильмӗсем пулчӗҫ, ҫавӑн пекех 2 документаллӑ ӗҫе хушӗҫ: Пӗрремӗш наци киностудийӗ «Чӑвашфильм» ӑсталанӑ «Генерал Тихонов» тата «Муса Мусалиев: Путь воина» фильмсене. Ку икӗ картина та Юрий Спиридонов режиссёр ӗҫӗсем.

Чӑваш Республикинчи кино ӳкерекенсен пӗлтешӗвне кӑҫал пуш уйӑхӗнче йӗркеленнӗ. Унӑн ертӳҫи пулма Олег Михайлович Цыпленкова суйланӑ. Хӑйӗн ӗҫӗнче ҫак пӗрлӗх Шупашкарта кино тата видео ӳкерекенсене пӗрлештерсе тӑрать. Ҫак организацие Чӑваш Республикин культура министерстви, электронлӑ информаци архивӗ йӗркелеме пулӑшнӑ. Хальлӗхе 7 учредитель: Оринов Вячеслав, Алексей Иванов-Сӗрмек, Олег Цыпленков, Алексей Ефремов, Медведев Николай, Сергеев Юрий, Ефремов Константин. 2015 ҫулта пӗрлӗх Шупашкарта Чӑваш кино фестивальне (Пӗтӗм тӗнчери кино фестивалӗсӗр пуҫне) ирттерес шухӑшлӑ. Ҫак ӗҫе йӗркелеме мероприятин Йӗрки-шывне (положенине) Вячеслав Оринова хатӗрлеме панӑ.

#Аксар, #Спектр, #Орион, #кино фестивалӗ, #фестивальсем, #Шупашкар, #Салам