ВВС корреспонденчӗ Марк Страттон Атӑлҫи тӑрӑхӗнчи республикӑсене ҫитсе унти вырӑс мар халӑхсем епле пурӑннипе кӑсӑкланнӑ. Кун пирки BBC News сайтӗнче хыпарланӑ.

«Раҫҫей сахалтан та 190 этнос ушкӑнӗ пурӑнакан ҫӗршыв», — тесе ҫырнӑ иккен Страттон. Наци сӗмӗллӗ ыйтӑва Мускав хурласа йышӑннине кура вак халӑхсен Раҫҫейре пурӑнма еплерех иккенне пӗлес тӗллев лартнӑ иккен BBC корреспонденчӗ.

Страттон Раҫҫей республикисенче хӑйсен парламенчӗ пур пулин те республика ертӳҫисене юлашки вӑхӑтра ҫӗршыв пуҫлӑхӗ лартнине палӑртса хӑварнӑ. Ҫапла туни, Страттон шучӗпе, наци ыйтӑвӗсене татса панӑ чух республикӑсене Мускава пӑхӑнтарасшӑннипе ҫыхӑннӑ имӗш.

BBC корреспондентне Чӑваш Енре акӑлчан чӗлхин преподавателӗ Тамара Воробьева ертсе ҫӳренӗ. Вӑл Раҫҫей Чӑваш Ене колоние илменнине, вӑл ӑна чӑваш культурине сыхласа хӑварма пулӑшнине палӑртнӑ. «Раҫҫей йышӗнче эпир телейлӗ, хамӑра хӗснине нихӑҫан та сисмен», — тенӗ Воробьева.

Страттонпа калаҫнӑ хӗрарӑм шучӗпе СССР саланнӑ хыҫҫӑн Чӑваш ен чӗрӗлме тытӑннӑ. Хӑй сӑмахне ҫирӗплетме вӑл чӑваш чӗлхине шкулта вырӑс чӗлхипе тан вӗрентнине, урамра вывескӑсене икӗ чӗлхепе ҫырнине илсе кӑтартнӑ. «Чӑваш чӗлхи республикӑра пӗртен-пӗр чӗлхе пулсан вырӑссен Чӑваш енрен тухса кайма тивӗччӗ, ку вара экономика катастрофи патне ҫитерӗччӗ», — тенӗ иккен акӑлчан чӗлхин преподавателӗ.

Кун пек шухӑшлакансемпе Марк Страттон ытти республикӑра та тӗлпулнӑ. Вӗсем пурте, Тутар Республикинче кӑна ун йышшисене журналист сахалтарах асӑрханӑ иккен, BBC корреспондентне ытлашши вырӑсланнӑн туйӑннӑ.

«Халӑхсем хушшинчи килӗшӳ Раҫҫейре яланах пулман. Тӗслӗхе ҫирӗплетме Чечняна илме пулать, — тесе ҫырнӑ иккен журналист. — Анчах Вӑтам Атӑлҫи тӑрӑхӗнче тӗрлӗ культура ӗмӗрсем хушши пӗр хуранта пухӑннӑ, анчах вӑл вӗресе кайман».

#чӑвашсем, #МИХсем, #BBC, #тӗпчевсем, #ҫулҫӳревсем