Иркутск облаҫӗпе Буряти чиккинче вырнаҫнӑ Байкал (тӗрӗкле Пуян кӳлӗ пулать) кӳллине шыв ҫитмест. Ӗнер кӑна пӗр талӑк хушшинче вӑл 1 см ҫухатнӑ. Ҫапла май ун хальхи шыв шайӗ 455,96 метра ҫитнӗ. Ку вара Раҫҫей Правительстви палӑртнӑ чи пӗчӗк виҫӗрен 4 см сахалрах. 2001 ҫулхи пуш уйӑхӗн 26-мӗшӗнче Раҫҫей Правительстви чи ҫӳллӗ шая 457 метрпа, чи пӗчӗк шая 456 метрпа ҫирӗплетнӗ. Шыв ҫитменсӗррине пӗлтӗрхи ҫанталӑкпа ҫыхӑнтараҫҫӗ — ҫумӑр сахал ҫунӑран кӳлле юхса кӗрекен юханшывсем тулли мар иккен. Ҫуллапа кӗркунне вӑхӑтӗнче юханшывсем кӳлле кирлӗ шайран 67% кӑна пама пултарнӑ. Ку вара Байкалран юхса тухакан Ангара шывӗ хӗрринче ларакан хуласемшӗн сиенлӗ — вӗсене валли шыв ҫитми пулӗ.

Иркутск облаҫӗнче инкеклӗ лару-тӑру пуҫарнӑ. Халӑха шывпа тата электроэнергипе перекетлӗ усӑ курма ыйтаҫҫӗ. Иркутск ГЭСӗнчи шыв шайӗ анма пуҫланӑран унӑн хӑвачӗ чакать имӗш.

Байкал кӳлли тавра хальхи вӑхӑтра Бурятипе Иркутск облаҫӗсем тупӑшаҫҫӗ — пӗрисем шыва чакармалла мар теҫҫӗ, теприсем ГЭС валли кирлӗ тесе ӗнентереҫҫӗ. Экологсен шучӗпе Правительство ытларах энергетиксем майлӑ — вӗсем кӳлӗ шывне ытларах илме хирӗҫ мар иккен. Иркутск облаҫӗ кӳлӗри шыв шайне хальччен палӑртнинчен тепӗр 20 см таран антарма ирӗк ыйтать имӗш.

Теприсен шухӑшӗпе шыв чакнинче нимӗнле хӑрушлӑх та ҫук — 456 метртан кӳлӗ унччен пӗрре мар чакнӑ, экосистемӑна ку нимӗнле те сиен ун чухне кӳмен имӗш. Чи пӗчӗк виҫене — 455,27 метра — шыв шайӗ 1982 ҫулта анса ларнӑ.

Байкал — чи тарӑн та таса кӳлӗ шутланать. Унта Ҫӗр чӑмӑрӗнчи ӗҫме юрӑхлӑ шывӑн чӗрӗкӗ упранать. Пӗтӗмешле калӑпӑшӗ вара — 23 пин кубла километр.

#кӳлӗсем, #Байкал, #ҫутҫанталӑк, #Раҫҫейре, #Иркутск облаҫӗ, #Буряти