Ҫурла уйӑхӗн 28-мӗшӗнче Брянск облаҫӗнче вӑрман касакансен хушшинче уҫӑ чемпионат иртнӗ. Унта Мускав тата Чулхула облаҫӗсенчи, Карелири, Мари Элти, Чӑваш Енри тата Удмурт Республикинчи ҫынсем хутшӑннӑ.
Спортсменсем пилӗк хӑнӑхтарӑва пурнӑҫланӑ. Кӑҫал виҫӗ зачет пулнӑ: Брянск облаҫӗн ҫыннисен хушшинче, хӑнасен тата хӗрарӑмсен зачечӗ.
Чӑваш Енри ҫынсем чемпионатра темиҫе наградӑна тивӗҫнӗ. Сергей Субботин 203 балл пухса пӗрремӗш вырӑна тухнӑ. Артем Шашков хӑнасен хушшинче виҫҫӗмӗш вырӑна тивӗҫнӗ. Галина Климина хӗрарӑмсен хушшинче иккӗмӗш пулнӑ.
Тӑван ҫӗршывӑн аслӑ вӑрҫинче ҫӗнтернӗренпе 75 ҫул ҫитнине халалласа тӗпе хурса «Советская Чувашия» хаҫат «Этот день мы приближали, как могли» (чӑв. Ҫак куна эпир май килнӗ таран ҫывхартнӑ) викторина ирттерессине эпир пӗлтернӗччӗ. Аса илтерер: пултарулӑх ӑмӑртӑвӗн авторӗ тата йӗркелӳҫи — журналист, Чӑваш Республикин культура тава тивӗҫлӗ ӗҫченӗ Александр Вражкин.
Республика историйӗпе шкул ачисенчен пуҫласа 80 ҫулхи ватӑсеп таранах кӑсӑкланни палӑрнӑ. Пуринчен чӑтӑмли тесе хаҫатҫӑсем Вӑрнар районӗнче пурӑнакан Роза Алексеева пенсионер тесе пӗлтернӗ. Вӑл хаҫат подшивкисене тӗплӗн тишкернӗ. Конкурсра пурӗ 18 ҫӗнтерӳҫӗ пулнӑ. Ҫав шутра пӗр тӑван Архиповсем те, Юрийпе Наталия, пур.
Элӗк районӗнче пурӑнакан Семеновсен ҫемйи пӗтӗм Раҫҫейри «Ҫулталӑк ҫемйи-2020» конкурсра палӑрнӑ.
Ӑмӑртӑва Йывӑрлӑха лекнӗ ачасене пулӑшакан фонд тата РФ Ӗҫ тата социаллӑ хӳтлӗх министерстви йӗркеленӗ. Унта ҫӗршывӑн тӗрлӗ кӗтесӗнчи хастар ҫемьесем хутшӑнаҫҫӗ. Конкурса «Манӑн ҫемье – манӑн Раҫҫей» девизпа йӗркеленӗ. Унта хутшӑнакансен пултарулӑхне пилӗк номинаципе: «Нумай ачаллӑ ҫемье», «Ҫамрӑк ҫемье», «Ял ҫемйи», «Ылтӑн ҫемье», «Йӑла-йӗркене упракан ҫемье» — хакланӑ.
«Ял ҫемйи» номинацире Григорийпе Светлана Семеновсем мала тухнӑ. 20 ҫул пӗрле пурӑнать йыш, нумай ача ӳстерет. Туса кил-йыш тӗрлӗ конкурса хутшӑнать.
Чӑваш Енри 43 шкул ачи «Большая перемена» (чӑв. Пысӑк тӑхтав) Пӗтӗм ҫӗршыври конкурсра ҫурма финала кӗме пултарнӑ. Вӗсем хӑйсен пултарулӑхне тӗрлӗ енӗпе тӗрӗслесе ӑслӑлӑх, укҫа-тенкӗ, вӗрентӳ, ӳнер тата спорт специалисчӗсем ырланине тивӗҫнӗ.
Пӗтӗм Раҫҫейри конкурсӑн ҫурма финалӗ Чулхулара ҫурла уйӑхӗн 9-20-мӗшсенче иртӗ.
«Пысӑк тӑхтав» конкурсӑн ҫӗнтерӳҫисем, 10 класа ҫӳрекен пурӗ 300 ача, 1-шер миллион тенкӗ укҫана тивӗҫӗҫ. Ӑна аслӑ шкулта вӗреннӗшӗн тӳлеме, вӗренӳ заведение ҫитме ҫул ҫинчи тӑкакланнине саплаштарма, хысна уйрӑмне вӗренме кӗрсен ипотека тӳлеме усӑ курма ирӗк парӗҫ. Кунсӑр пуҫне аслӑ шкула вӗренме кӗнӗ чух ҫав ачасен 5 балл хушӑнӗ. 8-9 классенче вӗренекен 300 ҫӗнтерӳҫӗне 200-шер пин тенкӗ парӗҫ. Ӑна хушма пӗлӳ илме тата тӗрлӗ енлӗн аталанма тӑкаклама юрӗ. Финалистсене, пурӗ 1200 ачана, «Артек» уйлӑха канма кайма путевка парӗҫ.
Шупашкарти виҫӗ ача пахчи федераци конкурсӗнче ҫӗнтернӗ. Унта ҫӗршыври 17 пин ытла учреждени хутшӑннӑ. Пирӗннисем вара палӑрма пултарнӑ.
Нумаях пулмасть «Гордость отечественного образования» Пӗтӗм Раҫҫейри конкурс иртнӗ. Унта Шупашкарти 113-мӗш, 114-мӗш тата 128-мӗш ача пахчисем хутшӑннӑ. Чӑваш Енри учрежденисем Раҫҫейри чи лайӑх 700 организаци йышне кӗнӗ, медале тивӗҫнӗ.
Кунашкал конкурс вӗренӳ учрежденийӗсене професси тӗлӗшӗнчен ҫӗнӗ ҫитӗнӳсем тума хӗтӗртет. Ку вӗсене опытпа ылмашӑнма та май парать.
Чӑваш кӗнеке издательствинче «Манӑн атте – ҫулҫӑ» кӗнеке пичетленнӗ. Унӑн авторӗ – Владислав Николаев. Кӗнекен ал ҫырӑвӗ ачасемпе ҫамрӑксем валли ҫыракан авторсен 2019 ҫулхи конкурсӗнче ҫӗнтернӗ. Ҫӗнӗ кӗнекене вӑтам шкул ҫулӗнчи ачасем валли пичетленӗ.
Кӑларӑма пьесӑсем-инсценировкӑсем, сценкӑсем, шӳтсем тата юмахсем-пьесӑсем кӗнӗ.
Ҫӗнӗ кӗнеке тӑватӑ пайран тӑрать. «Вӑрманти театр» ярӑмра тӗп сӑнарсем – вӑрманти чӗрчунсем. Инсценировкӑсем туслӑ пулма, тавралӑха тата тӑван ҫӗршывӑ юратма вӗрентеҫҫӗ. «Шкулти пурнӑҫ» ярӑм хальхи вӑхӑтри шкул ачисен пурнӑҫӗпе паллаштарать.
Виҫҫӗмӗш пайри тӗп сӑнарсем – Этнер, Элпи, Эрнеслу – пурнӑҫри пӗлтерӗшлӗ ыйтусем пирки шухӑшлаҫҫӗ.
«Пуканесен тӗнчинче» пайри юмахсем те кӑсӑклӑ.
Ачасене хушма пӗлу паракан тытӑмра ӗҫлекенсен професси ӑсталӑхӗн «Сердце отдаю детям — 2020» (чӑв. Чӗреме ачасене паратӑп — 2020) Пӗтӗм Раҫҫейри конкурсӗн республикӑри тапхӑрн ҫӗнтерӳҫисене палӑртнӑ.
Номинацисем темиҫе пулнӑ. Ӳнер енӗпе Ҫӗмӗрлери Ача-пӑча пултарулӑх центрӗн педагогӗ Наталья Варжина мала тухнӑ, физкультурӑпа спорт енӗпе — Шупашкарти «Акварелька» 162-мӗш ача пахчинчи физкультура инструкторӗ Елена Старова, социаллӑ педагогика енӗпе — Шупашкарти 42-мӗш шкулти Светлана Шишулина логопед, техника енӗпе — Шупашкарти Ача-пӑчапа ҫамрӑксен пултарулӑх керменӗнчи Татьяна Андреева педагог.
Шупашкарта хӗрарӑмсен предпринимательлӗхне пулӑшакан «Анне-усламҫӑ» федераци вӗренӳ проекчӗ вӗҫленнӗ. Пӗрремӗш вырӑна Олеся Кузьмина йышӑннӑ, вӑл «Lovelyberry» шӑккалат мостерскойне уҫас шухӑшӗпе паллаштарнӑ. Ҫӗнтерӳҫӗ хайӗн проектне пурнӑҫлама 100 пин тенкӗ гранта тивӗҫнӗ.
Проекта хутшӑнакансем 5 кун лекцисене, ӑсталӑх класӗсене ҫӳренӗ, хӑйсен бизнес-проекчӗ тӗлӗшпе ӗҫленӗ, профессионал усламҫӑсене сӗнӗвӗсене итленӗ.
Жюри Олеся Кузьминан проектне пысӑка хурса хакланӑ. Хӗрарӑм шӑккалатран наборсем, чечек ҫыххисем тата композицисем туса кӑларасшӑн. композици тӗпӗнче – Бельги шӑккалачӗ ӑшӗнчи ҫӗр ҫырли.
ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев республикӑра педагогсен хушшинче иртекен конкурс ҫӗнтерӳҫисене хавхаланарма хыснаран 400 пин тенкӗ уйӑрни пирки хушу алӑ пуснӑ.
Ҫӗрпӳри М.В.Силантьев ячӗллӗ 1-мӗш шкул психологӗ Надежда Павлова, Канаш районӗнчи Шӑхасанти шкулта ӗҫлекен Лариса Данилова, Патӑрьелти 1-мӗш шкул вӗрентекенӗ Алевтина Михайлова 50-шар пин тенке тивӗҫнӗ.
Шупашкарти 106-мӗш ача пахчин воспитателӗ Марина Васильева «Ҫулталӑкри воспитатель» ята тивӗҫнӗшӗн 100 пин тенкӗ илнӗ. Шупашкарти 45-мӗш шкулта истори вӗрентекен Александр Григорьев вара чи пысӑк парнене – 150 пин тенке – илнӗ. Вӑл – «Чӑваш Енри ҫулталӑкри вӗрентекен».
Васкавлӑ медицина пулӑшӑвӗн пульници COVID-19 антителине палӑртма 2 миллион тенкӗ тӑкаклӗ. Контрактӑн пуҫламӑш хакне 3,4 миллион тенкӗ тесе пӗлтернӗ. Электрон лавккара тӑкака пӗрре-виҫҫӗмӗш чухлӗ чакарма май килнӗ.
Аукциона «Открытие» медицина центрӗ тата Чӑваш Енӗн Гигиенӑпа эпидемиологи центрӗ хутшӑннӑ. Йӳнӗрех хакпа тӗпчев ирттерме медицина центрӗ сӗннӗ. Контракта унпа алӑ пусӗҫ те. Килӗшӳ вӑйӗ 2021 ҫулхи пуш уйӑхӗн 31-мӗшӗччен пырӗ.
Аукцион ҫӗнтерӳҫи 5 пин тӗпчев ирттерӗ. Ҫав вӑхӑтра M (IgM) тата G (IgG) класлӑ антителасене палӑртмалла. Кӑтартусем биоматериал лабораторие ҫитнӗ хыҫҫӑн пилӗк кунта паллӑ пулӗҫ.
+13.3 °C