Ӗнер каҫхи 11 сехетре Пӑрачкав ҫывӑхӗнче, Улатӑр енчен килнӗ ҫӗрте, астобус ҫаврӑнса ӳкнӗ.
Автобус Чулхуларан Тольятти хулине кайма тухнӑ. ШӖМ малтанлӑха пӗлтернӗ тӑрӑх, водитель ҫул пӑрӑнчӑкӗнче руле итлеттереймен, ҫул ҫинчен тухса кайса кювета чӑмнӑ. Автобус хӑяккӑн ҫаврӑнса ӳкнӗ. Аварире 2 ҫын вилнӗ. 10 ҫын тухтӑрсенчен пулӑшу ыйтнӑ.
Халӗ ӗҫ-пуҫа уҫӑмлатаҫҫӗ. ЧР прокуратури ӑна тӗрӗслесе тӑрать. Автобусра вахтовиксем пулма пултарнӑ.
Паян Шупашкарта пурӑнакан Антонина Савельева 100 ҫул тултарнӑ.
Вӑл Шупашкар районӗнчи (халӗ — муниципаллӑ округ) Тутаркассинче ҫуралнӑ. Анчах унӑн ашшӗпе амӑшӗ часах вилнӗ. Ун хыҫҫӑн вӗсене, шӑллӗпе иккӗшне, Пӑрачкаври тӑванӗсем усрава илнӗ. Антонина шкулта сакӑр класс вӗреннӗ.
1943-1953 ҫулсенче милиционерта ӗҫленӗ. Пулас мӑшӑрӗпе Георгий Григорьевичпа ӗҫре паллашнӑ. Унтан мӗн тивӗҫлӗ канӑва тухичченех Обкомра техничкӑра тӑрӑшнӑ.
Савельевсем, хӗрпе ывӑл ҫуратса ӳстернӗ.
«Пирӗн килте яланах килӗшӳпе ҫураҫу хуҫаланнӑ. Сасӑ хӑпартса калаҫнине эп илтмен», — каласа кӑтартать кинемейпе пӗрле пурӑнакан хӗрӗ Галина Георгиевна.
Паян ватӑ ҫын вырӑнпах выртать. Ӑна хӗрӗ юратса пӑхать.
Юпа уйӑхӗн 2-мӗшӗнче ирхине Пӑрачкаври пульницӑна 65 ҫулти хӗрарӑм пулӑшу ыйтма пынӑ. Вӑл кӑкӑрӗ тӗлӗнчен ыратнине туйнӑ.
Тухтӑрсем ӑна пӑхсан унӑн миокард инфаркчӗ пулнине палӑртнӑ. Сывлӑхӗ йывӑр пулнине кура ӑна реанимацие вырттарнӑ.
Хӗрарӑмӑн сывлӑхне йӗркене кӗртсен тухтӑрсем йышӑну тунӑ: пациента Республикӑри клиника пульницине илсе ҫитермелле. Ҫапла санавиаци вертолетне чӗнсе илнӗ. Шупашкарта хӗрарӑма операци тунӑ. Халӗ унӑн сывлӑхӗ йӗркеллех.
Ӗнер 10 сехет иртсен Ҫӗмӗрлепе Пӑрачкав хушшинче, Вырӑс Улхаш ялӗ ҫывӑхӗнче, икӗ машина ҫапӑнсан икӗ ҫын вилнӗ.
Малтанлӑха пӗлтернӗ тӑрӑх, Пӑрачкаври 50 ҫулти арҫын ВАЗ-2110 машинӑпа хирӗҫ ҫул ҫине тухса кайса «Нивӑпа» ҫапӑннӑ. Ҫӑмӑл машина водителӗ тата «Нивӑри» пассажир ҫавӑнтах вилнӗ. «Нивӑн» 39 ҫулти водительне пульницӑна илсе ҫитернӗ. Вӑл йывӑр аманнӑ.
| АКА | 10 |
Чӑваш Енри ял хуҫалӑх предприяийӗсем ҫуракине тухнӑ. Ҫак ӗҫе республикӑмӑрӑн кӑнтӑр енчи районӗсенче пурӑнакансем ыттисенчен маларах кӳлӗнеҫҫӗ.
Паянхи кун илсен уй-хирте Улатӑр, Патӑрьел, Вӑрнар, Йӗпреҫ, Канаш, Куславкка тата Пӑрачкав муниципалитет тӑрӑхӗсенче ӗҫлеҫҫӗ. Вӑл тӑрӑхри аграрисем ҫуртри пӗрчӗллӗ тата пӑрҫа йышши культурӑсене 3007 гектар ҫинче акнӑ, рапса — 10 гектар.
Ҫуракине ирттерме хуҫалӑхсен вӑрлӑх ҫителӗклӗ. Кондициллӗ вӑрлӑха кирлинчен 96 процент чухлӗ хатӗрленӗ.
Чӑваш Ен Правительстви массӑллӑ информаци хатӗрӗсене грант шучӗпе 19 миллион тенкӗ ытларах укҫа пама палӑртать.
«Чӑваш Ен» ПТРКна 1 миллион та 226,4 пин тенкӗ уйӑрса парасшӑн. Ҫав укҫа икӗ телепрограммӑпа 1 радиопрограмма хатӗрлеме кайӗ. «Чӑваш Ен» НТРКна — 1 миллион та 671,2 пин тенкӗ (2 телепрограммӑпа 3 радиопрограмма валли), ЮТВна — 502 пин тенкӗ (1 телепрограмма валли), «Высший пилотаж» обществӑна — 222,4 пин тенкӗ (1 радиопрограмма валли).
«Советская Чувашия» хаҫат 4 миллион та 314,9 пин тенкӗлӗх 16 гранта ҫӗнсе илнӗ, «Грани» хаҫат — 1 миллион та 925 пин тенкӗлӗх 7 гранта, «Хыпар» издательство ҫурчӗ — 3 миллион тенкӗ те 489,9 пин тенкӗлӗх 13 гранта.
Списокра ҫавӑн пекех Улатӑр, Элӗк, Патӑрьел, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Муркаш, Пӑрачкав, Вӑрмар, Шупашкар, Шӑмӑршӑ, Ҫӗмӗрле, Етӗрне, Елчӗк, Тӑвай тата Ҫӗрпӳ районӗсен хаҫачӗсем.
Пӑрачкавра канализаци тытӑмӗнчи пӑрӑх ҫурӑлса кайнӑ. Ҫавна май хура шывпа ҫӗр вараланнӑ.
Куншӑн Пӑрачкав районӗнчи «ОП ЖКХ» организацин должноҫри ҫынсене административлӑ майпа явап тыттарӗҫ.
Ҫак йӗркене пӑснине Росприроднадзорӑн Атӑл-Кама регионсен хушшинчи управленийӗ тупса палӑртнӑ.
Пӑрачкав районӗнче пассажирсене илсе ҫӳрекен перевозчик ҫук. Унчченхи усламҫӑн килӗшӳ срокӗ пӗтнӗ, анчах ӑна вӑл тӑсма килӗшмен.
Ҫулталӑк пуҫламӑшӗнче район пуҫлӑхӗ ЧР Транспорт министерствинчен пулӑшу ыйтнӑ. Ведомство килӗшӳ тума пултаракан усламҫа тупнине пӗлтернӗ-ха. Анчах халӗ те никам та тупӑнман.
Перевозчик тупас тӗллевпе иккӗмӗш хут аукцион ирттереҫҫӗ. Влаҫ ҫулталӑк вӗҫлениччен 700 пине яхӑн тенкӗ субсиди те сӗнет, анчах Пӑрачкаври пассажирсене турттарма килӗшекен ҫук.
Ҫӗрпӳпе Пӑрачкав хӑтлӑ хула тума пулӑшакан Пӗтӗм Раҫҫейри конкурсра ҫӗнтернӗ. ЧР Строительство министерстви пӗлтернӗ тӑрӑх, вӗсене кӑҫал ҫӗнетсе илемлетӗҫ. Кашни муниципалитета 70-шер миллион тенкӗ парӗҫ. Ыттине - регион хыснинчен.
Выляса илнӗ укҫапа Ҫӗрпӳри Ача-пӑча паркне тата урамсене хӑтлӑлатӗҫ. Проекта ырланӑ ӗнтӗ.
Пӑрачкав тӗлӗшпе вара документаци хатӗр мар. Ӑна ЧР Строительство министерствипе пӗрле хатӗрлесе ҫитерме хушнӑ.
2019 ҫулта Пӑрачкавра автостанци хупӑннӑ. Халӗ ав ҫак кунсенче унта автобуссем те ҫӳреме пӑрахнӑ.
Унчченхи перевозчикӑн кӑҫал кӑрлач уйӑхӗнче контракт пӗтнӗ. Унти тавралӑхра вара ку енӗпе ӗҫлеме пултаракан транспорт компанийӗсем, харпӑр усламҫӑсем ҫук.
Пӑрачкав муниципалитет округӗн пуҫлӑхӗ Евгений Лебедев ЧР Транспорт министерствинчен пулӑшу ыйтнӑ.
+4.3 °C