Шупашкарти тепӗр ача пахчи Раҫҫейри чи лайӑххисен йышне кӗнӗ. Кун пирки Шупашкар хула администрацийӗн вӗренӳ управленийӗ пӗлтерет.
Шупашкарти 205-мӗш ача пахчи Пӗтӗм Раҫҫейри «Раҫҫейри чи лайӑх 100 ача пахчи» конкурса хутшӑнса «Раҫҫейри чи лайӑх патшалӑх ача пахчи» номинацире лауреат пулса тӑнӑ.
Палӑртмалла: чи лайӑххисене ыйтӑмсем ирттерсе, анкета ҫыртарса, даннӑйсене тӗпчесе палӑртнӑ. Сӑмах май, унччен ҫак конкурсра Шупашкарти 82-мӗш тата 110-мӗш ача пахчисем ҫӗнтернӗ.
Ҫу уйӑхӗн 1-10-мӗшӗсенче шкул ачисем те, студентсем те каникула кайӗҫ. Кун пирки РФ вӗренӳ министрӗн ҫумӗ Дмитрий Афанасьев тата ҫутӗҫ министрӗ Сергей Кравцов пӗлтернӗ.
Аслӑ шкулсенче каникул пирки хушу хатӗрлеҫҫӗ. Ҫапах канасси пирки аслӑ шкул ертӳлӗхӗ татӑклӑн калӗ.
Шкул ачисем те каникула кайма пултараҫҫӗ. Ҫутӗҫ министерстви ҫапла сӗннӗ. Ача пахчисенче дежурнӑй ушкӑнсем ҫеҫ ӗҫлӗҫ.
Аса илтерер: Владимир Путин президент ҫу уйӑхӗн 1-10-мӗшӗсенче канасси пирки хушу кӑларнӑ.
РФ президенчӗ Владимир Путин ҫу уйӑхӗн 4-7-мӗшӗсенче ӗҫлеменни пирки хушу алӑ пуснӑ. Ҫапла майпа ҫу уйӑхӗн 1-11-мӗшӗсенче канмалли кунсем пулӗҫ.
Анчах ҫынсене ӗҫ укҫине мӗнле тӳлӗҫ? «Раҫҫей хаҫачӗ» пӗлтернӗ тӑрӑх, ӑна палӑртнӑ окладпа шутлӗҫ.
Хӑш-пӗр организаци ӗҫченӗсен ӗҫе тухма тивӗ /вӗсен ӗҫне татма юраманни шутланать пулсан/. Вӗсемшӗн палӑртнӑ кунсем ахаль ӗҫ кунӗсем пек пулӗҫ. Ҫавна май унашкаллисене ҫиелтен хушса тӳлемӗҫ. Ҫапла ӑнлантарнӑ «Раҫҫей хаҫачӗн» суд эксперчӗ.
Краснодар крайӗнчи Армавир шкулӗнче мачча ишӗлсе аннӑ, ҫавна пула икӗ ача пульница лекнӗ, — кун пирки Краснодар крайӗн прокуратура пресс-служби пӗлтерет.
«Армавир хулари шкулта турлукран тунӑ 10 тӑваткал метр мачча йӑтӑнса аннӑ, икӗ ачана пульница леҫнӗ», — пӗлтернӗ пресс-службӑра.
Сиенленнӗ ачасен сывлӑхӗ тӗлӗшпе хӑрушлӑх ҫук тесе палӑртнӑ. Прокуратура тӗрӗслев пуҫланӑ. Прокуратура пӗлтернӗ тӑрӑх, ку шкулти маччана юлашкинчен 2018 ҫулта юсанӑ.
Ҫавӑн пекех РФ СК Краснодар крайӗнчи следстви управленийӗн пресс-службинче хыпарланӑ тӑрӑх вӗсен ведомстви следстви умӗнхи тӗрӗслев пуҫарнӑ. Следователь пӑтӑрмах сиксе тухнӑ вырӑна ҫитнӗ.
Краснодар крайӗн оперативлӑ штабӗнче уҫӑмлатса каланӑ тӑрӑх пӑтӑрмах 1956 ҫулта хута янӑ Армавирти 2№ шкулта урок вӑхӑтӗнче пулса иртнӗ. Шкул ачисене халь пушӑ кабинета куҫарнӑ, шкулӗ яланхилле ӗҫлет.
«Армавир хулин вӗренӳ управленийӗ тӗрӗслев ирттерет. Вырӑнта комисси ӗҫлет, унӑн пӑтӑрмах сӑлтавне тупса палӑртма, шкул вӗренекенӗсен сывлӑхӗшӗн хӑрушлӑх кӑларса тӑратма пултаракан пулӑмсенчен сыхланмалли мерӑсем йышӑнма тивӗ», — ҫапларах палӑртнӑ оперштабра.
Паян, пушӑн 24-мӗшӗнче, Пӗтӗм Раҫҫейри «Ҫулталӑкри ача пахчи» конкурса пӗтӗмлетнӗ. Шупашкарти ача пахчисем унта ҫулсеренех хутшӑннине палӑртма кӑмӑллӑ. Ҫапла майпа конкурса хутшӑнакансем пӗр-пӗрин опычӗпе, практикипе паллашаҫҫӗ.
Шупашкар хула администрацийӗн вӗренӳ управленийӗ пӗлтернӗ тӑрӑх, кӑҫал чи лайӑххисен йышне тӗп хулари 11-мӗш, 16-мӗш, 125-мӗш, 130-мӗш, 185-мӗш, 209-мӗш ача пахчисем кӗнӗ.
Палӑртмалла: конкурса чи лайӑх учрежденисене тупса палӑртса вӗсене хавхалантарас тӗллевпе ирттереҫҫӗ.
Ӗнер Тӗп банк ирттернӗ пресс-конфренцире 2021-2025 ҫулсенче укҫа-тенкӗн модернизацийӗ пулассине пӗлтернӗ. Ку – планпа килӗшӳллӗн.
Раҫҫей банкӗ 10, 50, 100, 500, 1000 тата 5000 тенкӗлӗххисене ҫӗнетесшӗн. Хальлӗхе укҫасенче Ҫурҫӗр Кавказ, Атӑлҫи, Урал федераци округӗсенчи хуласем ҫук. Ҫакна «тӳрлетме» йышӑннӑ, банкнотӑсем ҫине ҫак хуласене те сӑнласшӑн.
10 тенкӗлӗххи ҫинче Красноярск мар, Носоибирск пулӗ. 500 тенкӗлӗххи ҫинче Пятигорск вырӑнне Архангельск хулине ӳкерӗҫ. 1 пинлӗххи ҫинче Чулхула вырӑнне Ярославль пулӗ. 5 пин тенкӗлӗххи ҫине Хабаровск мар, Екатеринбурга ӳкерӗҫ.
Петӗрти Эрмитажра COVID-19 пандеми вӑхӑтӗнче унта ӗҫлекен 26 ҫын пурнӑҫӗ татӑлнӑ.
Кун пирки музейӗн «Контактра» официаллӑ ушкӑнӗнче пӗлтерни тӑрӑх, «Питерские заметки» (чӑв. «Питер ҫырӑвӗсем») портал хыпарлать.
2020 ҫулхи пуш уйӑхӗн 17-мӗшӗнчен пуҫласа Эрмитаж 4 уйӑхлӑха ҫынсене йышӑнма чарӑннӑ, онлайн-режимра ӗҫлеме пуҫланӑ.
Ҫак вӑхӑтра, ӗҫ-хӗле кирлӗ таран хӑрушсӑрлатнӑ пулин те, Эрмитажра ӗҫлекен 26 ҫыннӑн — ҫав шутра наука ӗҫченӗсен, музей пӑхаканӗсен, инженерсен, реставраторсен тата хӑрушсӑрлӑх службин ӗҫченӗсен — пурнӑҫӗ татӑлнӑ.
Хальхи вӑхӑтра, ирӗксӗртен чарусем кӗртме тивет пулин те, Эрмитаж алӑкӗсем куракансем валли уҫӑ.
Aurus Senat маркӑн пуҫламӑш партири малтанхи машинисем уйрӑм клиентсем валли 22 млн тенкӗпе танлашӗҫ. Ҫакӑн ҫинчен Раҫҫейри люкс бренчӗ хӑйӗн «Контактри» официаллӑ страницинче пӗлтернӗ.
«Aurus Senat моделӗн пуҫламӑш хакӗ 18 млн тенкӗ пулӗ. Ҫав вӑхӑтрах бренд, рынокра йышӑннӑ практикӑпа килӗшӳллӗн, 22 млн тенкӗ тӑракан ҫӳллӗ шайра хатӗрлесе ҫитернӗ пӗрремӗш сериллӗ партие кӑларать. Ҫавӑнпа та хальхи вӑхӑтра Aurus малтанхи клиентсене Senat-а шӑпах ҫавӑн пек версире туянма сӗнет те», — палӑртнӑ пӗлтерӳре.
Aurus-ра палӑртнӑ тӑрӑх, малашне сутлӑхра седанӑн йӳнӗрех версийӗсем те пулӗҫ, ҫав шутра 18 млн тенкӗпе те. Автомобилӗн чӑн хакӗ клиентшӑн заказ йышӑннӑ хыҫҫӑн паллӑ пулӗ.
Маларах пӗлтернӗ тӑрӑх Aurus Senat-ӑн серипе кӑларакан машинӗсене уйрӑм заказчиксем патне 2021 ҫулхи ҫуркунне вӗҫленнӗ тӗле ҫитерме палӑртнӑ. Пӗрремӗш партири автомобильсем ултӑ тӗслӗ кузов суйласа илме пултараҫҫӗ: шурӑ перламутрлӑ, кофе тӗслӗ, хурҫӑ кӑвак, графит тӗслӗ тата хура тӗсли.
Aurus Senat-ра гибридлӑ двигатель пулӗ: вӑл 4,4 литрлӑ вӗрттерсе бензинпа ӗҫлекен V8 двигатель ҫинче никӗсленнӗ, унпа пӗрле компактлӑ электричество агрегачӗ вӑй хурӗ, урапасене вӗсем 9 картлӑ хӑй тӗллӗн куҫаракан передачӑсен коробки урлӑ ҫӑвӑрӗҫ.
Раҫҫейри влаҫ кӑшӑлвируспа ҫыхӑннӑ пандеми хӑҫан пӗтме пултарассине пӗлтернӗ. Патшалӑх Думин председателӗ Вячеслав Володин экспертсен шухӑшне шута хурса интервьра пӗлтернӗ.
Вӑл палӑртнӑ тӑрӑх, ҫӗршывра пандеми хӑрушлӑхне май килнӗ таран пӗчӗклетме май килнӗ. Экспертсен шухӑшӗпе, ҫулла вӗҫнелле, кӗркунне пуҫламӑшнелле чирлесси самай пӗчӗкленет.
Кӗркунне вара каллех ӳсме пултарать. Ку ҫынсен отпуск вӗҫленнипе, чылайӑшӗ унтан чирлесе таврӑннипе ҫыхӑннӑ.
Раҫҫейри влаҫ ҫӗнӗ саккун йышӑннӑ. Патшалӑх Думинче пӗлтернӗ тӑрӑх, малашне транспортра билет туянман ачасене кӑларса яма юрамасть. Ку 16 ҫул тултарманнисене, ашшӗ-амӑшӗсӗр ҫула тухнисене пырса тивет.
Патшалӑх Думи ку саккуна виҫҫӗмӗш вулавра йышӑннӑ. Автомобиль транспорчӗн Уставне улшӑнусем кӗртнӗ. Ҫапла майпа билет туянман 16 ҫула ҫитмен ачасене общество транспортӗнчен кӑларса яма юрамасть.
Водителӗн е кондукторӑн ачан ашшӗ-амӑшӗ ҫук пулсан, вӑл билетшӑн тӳлемен пулсан ӑна кӑларса яма юрамасть. Аслисем ачашӑн тӳлеме хирӗҫ тӗк вӗсен пӗрле ҫитес чарӑнура тухмалла.
+8.3 °C