Шупашкарта паян чутах пысӑк инкек пулса иртмен. Хулара пӗр ҫын машина ҫулӗ ҫине тӑсӑлса выртнӑ. Ҫавна асӑрханӑ пӗр водитель пӑрӑнса иртес вырӑнне... чарӑнса ларнӑ. Ҫапла-ҫапла. Вӑл ӑна ытти машина ҫапса хӑварассинчен ҫӑлса хӑварнӑ.

Водитель пакунлисем патне шӑнкӑравланӑ. Вӗсем часах вырӑна пырса ҫитнӗ. Ҫул-йӗр хӑрушсӑрлӑхӗн инспекторӗсем ӳсӗр ҫынна полицине илсе кайнӑ, унтан пульницӑна ӑсатнӑ.

Ҫул ҫинче ӳсӗр ҫынсем инкеке лекме пултараҫҫӗ. Шар курас мар тесен ӳсӗрӗличчен эрех ӗҫмелле мар.

Инкеклӗ лару-тӑру патшалӑх комитечӗ тунӑ сӑн

Ӗнер ирхине, авӑн уйӑхӗн 30-мӗшӗнче, Йӗпреҫ районӗнчи Хурамал ялӗнче пушар пулнӑ. Малтанлӑха палӑртнӑ тӑрӑх, ҫулӑм ачасен айӑпӗпе тухнӑ.

Хурамалти Свердлов урамӗнче утӑ упрамалли вырӑн ҫунма тытӑннӑ. Пушар утӑ упрамалли вырӑнӑн тӑрри, утӑ ҫунса кайнӑ.

Палӑртмалла: ҫулталӑк пуҫланнӑранпа Чӑваш Республикинче 1294 пушар пулнӑ. Инкексенче 41 ҫыннӑн пурнӑҫӗ татӑлнӑ, 57 ҫын суранланнӑ. Пушар кӑҫал 507 миллион тенкӗлӗх тӑкак кӳнӗ.

Инкеклӗ лару-тӑру министерстви тунӑ сӑн

Атӑл леш енче тата Улатӑр районӗнчи Первомайски вӑрман хуҫалӑхӗнче пушар алхаснӑ. Кун пирки Инкеклӗ лару-тӑру министерстви пӗлтерет.

Атӑл леш енче Октябрьски поселокӗ ҫывӑхӗнче вӑрманти ҫӗр ҫинчи сий ҫуннӑ. Улатӑр районӗнче те ҫавнашкалах пӑтӑрмах пулнӑ. Икӗ тӗслӗхре те пушар ҫулӑмпа асӑрханманран тухнӑ тесе шухӑшлаҫҫӗ.

Палӑртмалла: ҫулталӑк пуҫланнӑранпа Чӑваш Енре типӗ курӑк ҫуннӑ 133 тӗслӗхе шута илнӗ. Пӗтӗмпе 600 гектар ытла ҫуннӑ. Кунсӑр пуҫне ҫӳп-ҫапа ҫулӑм ярса илнӗ 250 тӗслӗх пулнӑ. Пур пушар та тенӗ пекех ҫын айӑпӗпе пулнӑ. Паянхи кун тӗлне типӗ курӑк ҫунтарнӑшӑн 170 яхӑн административлӑ ӗҫ пуҫарнӑ.

Авӑн уйӑхӗн 28-мӗшӗнче 18 сехетре Шупашкрата «Богданкӑра», «Кошкино» чарӑну ҫывӑхӗнче, 8 ҫулти арҫын ачана ВАЗ-2110 машина ҫапса кайнӑ.

Арҫын ача светофор хӗрлӗ ҫутнӑ вӑхӑтра ҫул урлӑ чупса каҫнӑ. Ун ҫине машина пырса кӗнӗ. Вырӑна васкавлӑ медпулӑшу килнӗ. Тухтӑрсем ачана малтан вырӑнтах пулӑшнӑ. Кайран тӑнне ҫухатнӑ арҫын ачана пульницӑна илсе кайнӑ.

Васкавлӑ медпулӑшу пресс-служби пӗлтернӗ тӑрӑх, арҫын ача чӗрӗ, анчах сывлӑхӗ унӑн питӗ йывӑр.

"Про Город" сайтран илнӗ сӑн

Паян ирхине 6 сехет те 10 минутра Шупашкарти Алькеш поселокӗнче ҫамрӑк арҫын виллине тупнӑ. Следстви комитечӗ кун тӗлӗшпе тӗрӗслев ирттерет.

Малтанлӑха палӑртнӑ тӑрӑх, 28 ҫулти арҫын ӗнер каҫхи 6 сехетре Гоголь урамӗнчи общежити чӳречинчен тухса ӳкнӗ. Виллине вара тепӗр кун ҫеҫ тупнӑ.

Ҫынсем каланӑ тӑрӑх, ҫак арҫын Мускавра ӗҫленӗ, вӑл унтан таврӑнсан пӗлӗшӗсемпе эрех ӗҫкеленӗ. Ирхине вара унӑн виллине чӳрече айӗнче тупнӑ.

Следстви комитечӗн сайтӗнчи сӑн

Авӑн уйӑхӗн 25-мӗшӗнче Вӑрнар районӗнчи Мӑн Явӑш ялӗнче 57 ҫулти арҫынна вӗлернӗ. Ку преступленине кӳрши тунӑ тесе шутлаҫҫӗ, ӑна тытса чарнӑ.

Хайхискерсем темиҫе ҫул вӑрҫӑнса пурӑннӑ-мӗн. Ҫак арҫын хӑйӗн пахчи патне машинӑпа пырайман, мӗншӗн тесен кӳрши ӑна хупласа лартнӑ. Ҫав кун вӗсем каллех хирӗҫсе кайнӑ.

Арҫын ҫӗҫӗ ярса тытнӑ та кӳршине темиҫе хутчен чикнӗ. Лешӗ ҫавӑнтах вилсе кайнӑ. Кӑна вара следовательсем тытса чарнӑ.

Сасӑлав скриншочӗ

«2020 ҫулхи Раҫҫейри йывӑҫ» пӗтӗм ҫӗршыври конкурса чӑваш юманӗ хутшӑннине эпир пӗлтернӗччӗ ӗнтӗ. Республикӑри чи ватӑ юманшӑн rosdrevo.ru сайтра сасӑлама пулать. Конкурсри унӑн номерӗ — тӑваттӑ. Конкурса ҫӗршывӑн тӗрлӗ регионӗнчи 12 йывӑҫ хутшӑнать.

«Контактра» халӑх ушкӑнӗнчи «Подслушано Чебоксары» (чӑв. Шупашкарта итленӗ) пабликра пӗлтернӗ тӑрӑх, пирӗн юманӑн тан мар кӗрешӗве тӳсме тивет. Юманшӑн пӗр сасӑ памассерен ыттисемшӗн 1 сасӑран пуҫласа 10 сасӑ таран хушӑнса пырать иккен.

Пабликра ҫырнӑ тӑрӑх, паян ирхи вунӑ сехетре ҫавна юриех тӗрӗслесе пӑхнӑ. Вӗсем компьютертан тата телефонтан сасӑланӑ. Юманшӑн сасӑланӑ май Дагестанри йывӑҫшӑн сасӑлани хушӑнса пырать иккен.

Паблик авторӗсем конкурса ирттерекенсене: «Сире намӑс мар-и?» — тесе ӳпкеленӗ.

ru.foursquare.com сайтри сӑн

Шупашкар районӗнчи Чаканар ялӗ ҫывӑхӗнчи пӗвере арҫын виллине тупнӑ. Ку авӑн уйӑхӗн 24-мӗшӗнче кӑнтӑрла пулнӑ.

Пӗвен юхса тухмалли пӑрӑхӗнче арҫын виллине курсан ҫынсем шыравпа ҫӑлав службине шӑнкӑравласа пӗлтернӗ. Ҫӑлавҫӑ гидротум тӑхӑнса пӑрӑха 10 метр шала кӗнӗ те арҫын виллине илсе тухнӑ. Халӗ ку ӗҫ тӗлӗшпе полици ӗҫлет, мӗн пулса иртнине уҫӑмлатаҫҫӗ.

Аса илтерер: нумаях пулмасть Вӑрнар районӗнчи нурӑс ялӗ ҫывӑхӗнчи пӗвере те арҫын виллине тупнӑ.

ШӖМ тунӑ сӑн

Авӑн уйӑхӗн 24-мӗшӗнче «Никольски – Етӗрне – Нурӑс» ҫул ҫинче чарӑнуран инҫех мар ҫын виллине тупнӑ. Полицейскисем вырӑна тӗрӗслесен «Шкода» машинӑн пайӗсене тупнӑ. Вӗсен шухӑшӗпе, ҫав машина шӑпах ҫак ҫынна ҫапса хӑварнӑ та. Полицейскисем «перехват» планпа ӗҫленӗ, видеокамерӑсене пӑхнӑ.

Ҫул ҫинче тупнӑ хӗрарӑм 84 ҫулти кинемей пулнӑ. Вӑл – Элӗк районӗнчен, ҫав кун хӗрӗ патӗнчен тухса киле кайма тухнӑ.

Ҫак кинемее ҫапса хӑварма пултарнӑ водителе те тупнӑ. Вӑл – Йӗпреҫре пурӑнакан 44 ҫулти арҫын. Унӑн «Шкода» машини ҫинче сиенленнӗ йӗрсем пулнӑ. Анчах хальлӗхе ҫак арҫын айӑпне йышӑнмасть. Ун тӗлӗшпе пуҫиле ӗҫ пуҫарнӑ.

forpost-sz.ru сайтри сӑн

Хӗрлӗ Чутай районӗнче 28 ҫулти арҫын, Турхан ялӗнче пурӑнаканскер, Йӳҫпан ял тӑрӑхӗн пуҫлӑхне кӳреннӗ те клуба чӗртсе янӑ.

Ҫак арҫын ялти ӗҫлемен клубӑн чӳречине ҫӗмӗрнӗ те ҫунакан шӗвеке шала пенӗ. Хайхискер мӗн хӑтланнине ӑнланнӑ пулмалла – хӑйех пушарнӑйсене чӗннӗ.

Клубӑн кадастр хакӗ 1,5 миллион тенкӗпе танлашать. Ҫурт ҫунса кайса ӗлкӗреймен, пушарнӑйсем вырӑна ҫитнӗ.

Арҫынна вара суд тунӑ. Ӑна тӗрмене хупмасӑр 1 ҫуллӑха айӑпланӑ. Тӗрӗслев срокӗ – 1 ҫул.