t.me/mintrud_21 каналтан илнӗ сӑнӳкерчӗк

Шупашкар муниципаллӑ округӗнчи ҫамрӑк хӗрарӑм патшалӑх шучӗпе парикмехера вӗренсе тухнӑ. «Ҫемье» ҫӗнӗ наци проекчӗпе социаллӑ контракт валли Чӑваш Ене 996,5 миллион тенкӗ уйӑрса пама пӑхса хӑварнӑ.

Кристина Краснова декретра вӑхӑта сая ярас темен — парикмахера вӗренме кайнӑ. Вӑл унчченхи хӑйӗн ӗҫне пӑрахса парикмахерски уҫма кӑмӑл тунӑ.

«Эпӗ халӗ питех те телейлӗ. Парикмахер ӳнерӗ пӗр вырӑнта тӑмасть, пултарулӑха туптама тӗрлӗ ӑсталӑх класне ҫӳретӗп», — хавхаланса каласа кӑтартнӑ хӗрарӑм.

cap.ru сайтри сӑн ӳкерчӗк

Кӑрлач уйӑхӗн 14-мӗшӗнче Россельхознадзорӑн Чӑваш Енри тата Чӗмпӗр облаҫӗнчи упрравленийӗн ӗҫченӗсем ПАИ инспекторӗсемпе пӗрле Комсомольски округӗнче пӗр машинӑна тӗрӗсленӗ. Унта мӑйракаллӑ шултра выльӑх пулнӑ.

Тӗрӗслев хыҫҫӑн 5 выльӑха Тутарстанрн Патӑрьеле илсе кайма тухни, вӗсен маркировка пулманни ҫиеле тухнӑ. Ветеринари докуменчӗсем те пулман.

Специалистсем ҫав ҫынна выльӑха харпӑр хуҫалӑха карантина хупма ыйтнӑ.

"Контактри" сӑн

Нарӑс уйӑхӗн 1-мӗшӗнчен «Азимут» авиакомпани Шупашкартан Минеральные Воды тата Сургут хулисене самолетсем вӗҫтерме тытӑнӗ. Икӗ ҫӗре те рейссем эрнере икӗ хутчен пулӗҫ: ытларикун тата шӑматкун.

Минеральные Воды хулине вӗҫме билет 2,9 пин тенкӗрен пуҫласа 7 пин тенкӗ таран тӑрать. Хак хӑш кун пулнинчен килет. 3 сехет те 5 минутран самолет вырӑна ҫитет. Сургута вӗҫме те хак ҫавӑн пекрех. Унта 2 сехет те 50 минут вӗҫмелле.

Сӑмах май, «Шупашкар – Сургут» авиарейс кӑҫал субсидилекенсен йышне кӗнӗ.

"Контактри" сӑн

Кӑҫалтан республикӑри 3 муниципалитетра туризм налукӗ вӑйра: Шупашкарта, Ҫӗнӗ Шупашкарта тата Шупашкар округӗнче.

Камсем тӳлӗҫ-ха ӑна? Хӑна ҫуртӗнче, отельте, хостелта, санаторире чарӑнакансем. Налук пурӑнмалли хакӑн 1 проценчӗпе танлашать, анчах талӑкра 100 тенкӗрен сахалрах мар.

Пухнӑ укҫапа туризм инфраструктурине ҫӗнетӗҫ, ҫӗнӗ обьектсем хута ярӗҫ. Малтанлӑха пӗлтернӗ тӑрӑх, вырӑнти хыснана 40 миллион тенкӗ кӗрӗ.

zivil.cap.ru сайтри сӑн

Хӗрлӗ Чутай округӗнчи нумай ачалла амӑшне, ултавҫӑ серепине лекнӗскере, прокуратура пулӑшать. Виҫӗм ҫул авӑн уйӑхӗнче палламан ҫын шӑнкӑравланӑ хыҫҫӑн вӑл 42 пин тенкӗсӗр тӑрса юлнӑ.

Ҫав палламан ҫын хӑйӗнпе банк ӗҫченӗ тесе паллаштарнӑ. Вӑл ӑна банк карттисене страхлама ӳкӗте кӗртсе харпӑр даннӑйсене пӗлнӗ. Ҫапла палламан ҫын унӑн счечӗ ҫинчен укна вӑрланӑ. Кун тӗлӗшпе пуҫиле ӗҫ пуҫарнӑ.

Следстви вӑхӑтӗнче укҫа Чулхула облаҫӗнчи арҫын картти ҫине куҫнине палӑртнӑ. Укҫана тавӑрса пама килӗшмен вӑл. Прокуратура суда тавӑҫ тӑратнӑ. Суд ӑна тивӗҫтернӗ.

"Контактри" сӑн

Паян – хитре дата: 10.01.2025. Ун пеккине ҫемье ҫавӑракансем килӗштереҫҫӗ.

Паян Шупашкарта 12 мӑшӑр пӗрлешнӗ. Ҫавӑн пекех паян Патӑрьел, Ҫӗмӗрле тӑрӑхӗсенче, Ҫӗнӗ Шупашкарта та пӗрлешекенсем пулнӑ.

Сӑмах май, ҫитес хитре дата Студентсен кунӗнче пулӗ: 25.01.2025.

www.cap.ru сӑнӳкерчӗкӗ

Кӑрлач уйӑхӗн 4-мӗшӗнче Шупашкарти аэропорта малалла юсама тытӑннӑ. Хальхи вӑхӑтра вӗҫсе килмелли зонӑна юсама тытӑнмалла. Ҫавна май кивӗ стенасене, урайсене сӳтнӗ.

Аса илтерер: иртнӗ уйӑхӑн вӗҫӗнче ҫӗнӗ пассажир терминалне Раҫҫей Президенчӗ онлайн-мелпе хутшӑннипе уҫнӑччӗ. Аэропорт инфраструктури самай улшӑннӑ. Унӑн лаптӑкӗ унчченхи 1500 тӑваткал метртан 5000 тӑваткал метр таран пысӑкланнӑ. Ҫӗнӗ терминал — вӗҫсе каякан пассажирсем валли.

Виталий Михайлов страницинчен илнӗ сӑнӳкерчӗк

Красноармейски муниципалитет округне (Трак районне) туса хунӑранпа 90 ҫул ҫитнӗ. Кун пирки Виталий Михайлов хӑйӗн страницинче пӗлтернӗ.

«Красноармейскине малтан Трак ятпа пӗлнӗ, ҫавӑнпа халӗ те ку тӑрӑха Трак Енӗ теҫҫӗ. Ҫурҫӗр енче Шупашкар районӗпе, кӑнтӑрта Канашпа Вӑрнар районӗсемпе, хӗвел анӑҫ енче Элӗкпе Муркаш районӗсемпе тата ҫурҫӗр-хӗвелтухӑҫ енче Ҫӗрпӳ районӗпе чикӗленет. Чӑваш Енре вӑл лаптӑкӗпе чи пӗчӗк район шутланать.

Района Чӑваш АССРӗн Ӗҫ Тӑвакан Тӗп Комитечӗн Йышӑнӑвӗпе килӗшӳллӗн 1935 ҫулхи кӑрлачӑн 9-мӗшӗнче туса хунӑ. Ӑна малтан Трак районӗ тенӗ, каярах, 1940 ҫулта, Красноармейски ятпа улӑштарнӑ. Пирӗн район кун-ҫулӗ ҫакӑнтан кӑна пуҫланмасть, паллах, унӑн тымарӗсем темиҫе ӗмӗр каяллах, сӗм авалах никӗсленнӗ.

Красноармейски районӗн хальхи ҫӗрӗ ҫинче пирвайхи ҫынсем темиҫе пин ҫул каяллах пурӑнма пуҫланӑ. Кун ҫинчен район тӑрӑхӗнче ирттернӗ археологи тӗпчевӗсемпе истори палӑкӗсем ҫирӗплетеҫҫӗ: Ҫӗньял Упи таврашӗнче вырнаҫнӑ авалхи ҫынсем пурӑннӑ вырӑнӗ, Красноармейски ҫывӑхӗнчи Мӑн Шетмӗ юхан шыв хӗрринче вырнаҫнӑ улӑп тӑпри, Кӑмакал ялӗ ҫывӑхӗнчи улӑп тӑпри (пӑхӑр ӗмӗрӗ), Тусай ялӗ ҫывӑхӗнчи Хулату ятлӑ хулаш, Мӑн Шетмӗ яле ҫывӑхӗнчи Мӑн сӑрт ятлӑ хулаш, Кӳлхӗрри Карай ялӗ ҫывӑхӗнчи улӑп тӑпри (тимӗр ӗмӗрӗ), Кӗрекаҫ ялӗ ҫывӑхӗнче вырнаҫнӑ авалхи ҫынсем пурӑннӑ вырӑн тата масар, Янмурҫин ялӗ ҫывӑхӗнчи хулаш (вӑтам ӗмӗрсем).

Малалла...

cap.ru сӑнӳкерчӗкӗ

Вӑрнар округӗнче Тӑван ҫӗршывӑн Аслӑ вӑрҫин ветеранне Харитон Петрова юлашки ҫула ӑсатнӑ. Вӑл 101 ҫулта пулнӑ.

Ӑна 1942 ҫулта повестка панӑ. Вӑл Япони вӑрҫине те хутшӑннӑ.

Вӑрҫӑ хыҫҫӑн Харитон Петров тӑван колзозӗнче ферма заведующийӗнче, председатель ҫумӗнче ӗҫленӗ. Мӑшӑрӗпе 5 ача ҫуратса ӳстернӗ.

Владимир Степанов министр телеграм-каналӗнчи сӑн

Ҫӗрпӳре пурӑнакан ҫемьере виҫӗреш ҫуралнӑ. Вӗсем пӗлтӗр чӳк уйӑхӗнче Порфирьевсен ҫемйинче кун ҫути курнӑ.

Хальччен ачасем Президент пепкелӗх центрӗнче пулнӑ. Халӗ вӗсем вӑй илнӗ ӗнтӗ. Пӗчӗкскерсене киле паян кӑларнӑ. Унта ЧР сывлӑх сыхлавӗн министрӗ Владимир Степанов хӑй те пулнӑ. Вӑл Надежда Нкиолаевнӑпа Петр Николаевича саламланӑ.

Порфирьевсен халӗ – 7 ача. Пурте – хӗрачасем.