Электронлă вулавăш

— Ман телевизорти пек пурăнас килет!

— Ухмах! Нивушлĕ сана та çавăрса илчĕ çав суя çăтмах?!

(Автобусра ларса пыракан икĕ хĕрарăм

калаçăвĕнчен).

 

Ман каллех çав сăмах: телевизор

Ăçталла, мĕн тумашкăн чĕнни,

Чăнлăха уямасăр, виçесĕр

Çăмăл пурнăç сĕнсе вĕтĕлни.

 

Ав епле йăтăнать ырлăх-пурлăх,

Мĕн кирли сан валли — мăй таран.

Тăвăнсассăн та сирĕл эс, хурлăх, —

Макăрса ма çынна култаран?

 

Йăлтăркка та йăлттам, йăлтăр-ялтăр —

Шăл шурри, çӳç юххи, хĕр кулли...

Çатăрланă пĕри пысăк алтăр:

Те шерпет, те сим пыл тăп тулли.

 

Çӳç-пуçа таçтан ернĕ-и лĕкĕ,

Тасарах хырмалла-и сухал —

Çийĕнчех сирĕлет чун сивлекĕ,

Çĕнĕрен кĕнĕ евĕр вăй-хал.

 

Телевизор, ара, тараватлă,

Кирек хăш самантра та çăлать:

Унăн тусĕ — реклама — хăватлă,

Вĕрентет, ăс парать хуçалла.

 

Ах, ытла теветкел-çке хĕрарăм,

Илемне пытармасть никамран,

Йăпăртах хывăнать те, мăнтарăн, —

Çуталса каять пĕтĕм экран.

 

Вĕçсĕрех савăшу, вăйă-кулă,

Ĕç вара кирлĕ мар-им сире?

Анчах кам ӳстерет тырă-пулă,

Фермăра кам ĕçлет кунсерен?

 

Шарламасть телевизор-палкавçă,

Ĕç çинчен калаçмасть вăл савса.

Тар шăрши килĕшӳсĕр хальхаççăн —

Ан ĕçле теççĕ пилĕк авса.

 

Пурăнар вăй хумасăр та янтă —

Çамрăка кăларать харамçа:

Чыс-хисеп сана — эсĕ пуян тăк,

Сăптăрма пултаран тăк укçа!

 

Телевизор тĕнчи алхасуллă —

Чăннипех çитсе тăчĕ çăтмах.

Анчах темшĕн чĕреçĕм салхуллă:

Пурнăçпа килĕшмест ку юмах...

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн