Электронлă вулавăш

* шĕвнĕ — шĕвелнĕ

 

Пĕлтĕр те мар, кăçал мар. —

Пĕр-пĕр ялта, пĕр ялта

Виçĕм-тватăм çулсенче

Шĕвнĕ колхоз пулнă, тет.

Çавă шĕвнĕ колхозăн

Ĕçĕ-пуçĕ пĕрмаях

Тăскаланчăк, йĕркесĕр,

Сапаланчăк, киревсĕр

Ялан пулса пынă, тет.

 

Вăл колхозăн членĕсем

Чылайăшĕ-нумайĕш

Ытарма çук, лайăх çын

Чип-чиперех пулнă та,

Анчах колхоз ĕçсене

Йĕркелесе ярасшăн

Пĕр сăмах та чĕнмен, тет.

Çур çăвар та уçман, тет.

 

Васкамасăр-тумасăр

Ака-суха тунă, тет;

Тырă-пулă акнă, тет;

Пулса çитсен вырнă, тет.

Çапас чухне çапнă, тет,

Хăйне майăн, сулмакпа.

Ака-суха тунă чух

Уйра шырлăх юлнине,

Ула-чăла акнине

Сӳре-сӳре пынă чух

Муклашкасем капланса,

Купаланса выртнине

Куçлă-пуçлă юлташсем,

Курса тăнă пулин те,

Ытла питех шарламан.

— Çынна мĕн те мана мĕн!

Ăна-кăна тиркесе

Пускилсене, ял-йыша

Çиллентерес марччĕ-ха.

Апла-капла пулсассăн,

Кирлĕ пулать ял-йышах, —

Тенĕ пекле, чĕнмесĕр

Ирттернĕ те ирттернĕ —

Колхозпала ĕçлесе,

Совет пурнăç йĕркине

Тиркешлесе пынă пек.

 

Пулнă кунта этемми —

Арçынни те хĕрарăм —

Ватти-хĕтти, яшши те;

Тырă-пулă вырнă чух

Хăмăлсене хăварнă.

Чĕркуççипе тан пекех

Хăйсен пĕвĕ-кĕлетки

Пĕшкĕнме те маннă пек,

Пилĕк-çурăм хытнă пек.

 

Ним тирпейсĕр вырнăран

Каçалăкра пучаххи

Вунă пучах пусăмра

Выртса юлнă тăкăнса,

Юри касса пынă пек.

Нихăçан та ĕмĕрте

Тырă-пулă кирлине,

Çăкăр-тăвар пахине

Шĕвнĕ колхоз членĕсем

Курса чухлас çук пекех,

Ним шута та шутламан

Тырă-пулă тирпейне.

 

Çакă шĕвнĕ колхозра

Çапах пулнă икĕ çын —

Ĕçсем çапла пынăшăн

Пуринчен те ытларах

Куляннă та кӳреннĕ,

Тиркешлесе пупленĕ.

Пĕри питĕ ватă çын,

Çĕр çултан та иртнĕскер,

Ахмат мучи тенĕскер;

Тепри çамрăк, яш-кĕрĕм,

Вун çич çулхи Илюшка.

Анчах вĕсен сăмахĕ,

Вырăнлă та йĕркеллĕ

Пулса пынă пулин те,

Ирсĕр хаяр çынсене

Ниепле те çĕнеймен.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн