Электронлă вулавăш

Епле палăртатăн — питех тăсăлми шăпама,

Иртнишĕн — епле эс чунра ӳкĕнӳ хускататăн!

Мĕн пур тĕнчепе пĕр пуласчĕ —

сана упрама!..

Эс çак ĕмĕте вăратса çеç кăшт хурлă тăватăн.

Куçпа эс калатăн: «Ман яшлăх — тулли».

Эс ыйтан:

«Куратăр-и ман телее?» Тинкерсе эс хушатăн:

«Илем-и эп, — калăр!»

Куçпа хуравлатăп — аран, —

Чĕнме хăяймасăр...

Пĕлетĕп: пĕрех эс — куратăн!

Куратăн: тĕтре ăшĕнчи хĕвел евĕр, манра

Эс пур яланах, — эсĕ ху çутупа ху тĕл пулăн

Ман пур ĕçĕмре, уттăмра, сассăмра, куллăмра!..

Татах — телейленĕн,

татах — телейлетĕн те кулăн.

 

Пур кăткăслăха туйăмра-шухăшра çĕнтерсе

Кун-çул тупсăмне каярах-и юлса эп ăнлантăм?

Халь уншăн сана тав тăватăп эп «Пурнăç» тесе, —

Ан тив, элчелре палăрать-и кăшт хурлăхлă картăм...

Тасалчĕ пур тупсăм, — сăваплă та чĕрĕ — Илем,

Вăл — эсĕ, вăл — сан кантăку,

эс юратнă Театрăн шăв-шавĕ,

Вăл — çил те гекзаметр...

Вăл — яшлăхăн пуйăсĕсем,

Вăл — сан йĕпсӳсен йăпатса вылякан ялтăравĕ...

Илем вăл — малтан.

Тупсăмне ăнкаратпăр — кайран.

Ăнланнă ăса — нихăçан вара тутăх витеймĕ.

«Ик çын яланах — Биркенау¹» тесе калакан

Халь — çук» —

ун сасси сан патна нихăçан та çитеймĕ.

Халь-халь тăкăнаç пек тулли те таса çутуна

Çак каç ман сăмахăм,

тăмха лартнă пек, ан хускаттар,

Ман пилĕм çутаттăр пĕр пек —

çамкуна, çаннуна,

Сан çӳç пĕрчине —

çăлтăрпа тан тесе саламлатăр.

Управлă çак туйăм — сăмах тумĕпе тумланать,

Юна — ӳт упранăн...

Хам туйăмшăн — тум шырамастăп.

Чи чăрсăр поэт —

ăна виç пăнчăпа палăртать,

Ак эпĕ те халь —

ĕнтĕ çав сăмаха калаймастăп.

Чи çывăх састаш² çеç янратăр,

ăна палăртса!

Çак туйăм — Юсав.

Чунсене ĕмĕртен вăл юсанă.

Кунта эс Пурришĕн — пур Чĕрĕлĕхе тав туса

Тĕнче умĕнче сан ятна çеç калатăп:

Оксана.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн