Комсомольски районӗнчи пӗр арҫыннӑн сарайӗнчи эмелшӗн суда кайма тивӗ. Ун тӗлӗшпе тӗпчевҫӗсем пуҫарнӑ пуҫиле ӗҫе вӑл тӑрӑхри прокурор ҫирӗплетнӗ хыҫҫӑн унта ярса та панӑ ӗнтӗ.

63 ҫулти арҫын психотроп эмеле пысӑк партипе упранӑ иккен. Ӑна вӑл сарайӗнче тытнӑ. Ҫынна сутма мар теҫҫӗ-ха. Ҫапах та психотроп эмел упрани саккуна пӑсни шутланать. Арҫынна РФ Пуҫиле кодексӗн 228-мӗш статйин 1-мӗш пайӗпе айӑпласшӑн. Асӑннӑ статьян ҫак пайӗ 40 пин тенкӗ таран штраф хума та, ӗҫлесе юсантарма та, ирӗксӗр хӑварма та ирӗк парать.

Чӑваш Республикин прокуратурин пресс-службинче пӗлтернӗ тӑрӑх, сарайӗнчи эмеле полицейскисем тупса палӑртнӑ. Ун хыҫҫӑн пуҫиле ӗҫ пуҫарса эмеле арҫын мӗн тӗллевпе упранине тӗпченӗ.

#пӑтӑрмахсем, #прокуратура, #Комсомольски районӗ, #судсем