Кӑшӑлвирус алхасма пуҫланине пула килте ларма тивнӗ чухне эпир «Антон Чехов чӑвашла» ӑмӑрту пуҫартӑмӑр. Халӗ ӗнтӗ ӑна пӗтӗмлетме вӑхӑт ҫитрӗ.

Пурӗ ҫичӗ куҫару ярса пачӗҫ (ярса панӑ вӑхӑтпа):

• Алексей Леонтьев — «Мунчара» (В бане);

• Тимӗркке — «Чунне уҫни, е Оля, Женя, Зоя» (Исповедь, или Оля, Женя, Зоя);

• Алина Иванова — «Тӑван кӗтесре» (В родном углу);

• Светлана Трофимова — «Кӳршӗсем» (Соседи);

• Альбина Кыран — «75000»;

• Александр Михайлов — «Идеалист асаилӗвӗсенчен» (Из воспоминаний идеалиста);

• Ишук Тавраш — «Кӑшкӑру палли» (Восклицательный знак).

Хаклав ӗҫне тӑваттӑн хутшӑнтӑмӑр: Арсений Тарасов, Борис Чиндыков, Валери Туркай тата Чӑваш халӑх сайчӗн тӗп редакторӗ Аҫтахар Плотников.

Пурин хаклавне те пӗрлештернӗ хыҫҫӑн малти вырӑна ҫак куҫарусем тухрӗҫ:

1-мӗш вырӑн: Тимӗркке — «Чунне уҫни, е Оля, Женя, Зоя» (ӑна 3000 тенкӗпе хавхалантарӑпӑр);

2-мӗш вырӑн: Алексей Леонтьев — «Мунчара» (2000 тенкӗпе);

3-мӗш вырӑн: Александр Михайлов — «Идеалист асаилӗвӗсенчен» (1 пин тенкӗпе).

Хаклавпа туллин кунта паллашма пулать. Парнесем тӗлӗшпе ҫапларах: эпир малтан пӗлтернисӗр пуҫне Валери Туркай хӑй ячӗпе пама пулчӗ. Хавхалантару укҫине илес тесен вара amartu@chuvash.org адреспа хӑвӑрӑн карточка номерӗсене (Сбербанк) ярса парӑр. Ҫавӑн пекех телефонӑрсене — вӑл сирӗнпе ҫыхӑнма кирлӗ пулӗ — пӗлтерме ан манӑр. Хавхалану укҫине хатӗрлесе хунӑ ӗнтӗ — мӗнле пӗлтеретӗр, тӳрех куҫарса парӑпӑр.

Маларах эпир ҫак куҫарусене Чӑваш чӗлхин икчӗлхеллӗ ҫӳпҫине кӗртсе сире вӗсемпе ҫапла май паллаштарӑпӑр тесе пӗлтернӗччӗ. Шел те, пурне те тенӗ пекех унта кӗртиччен якатас пулать. Опечаткӑсем, самай пысӑк йӑнӑшсем пурри ку текстсене тӳрех корпуса кӗртме май памасть. Ҫавна май эпир вӗсене пӗр ҫӗре пухса вырнаҫтарас терӗмӗр. Пур куҫарусемпе те кунта паллашма пултаратӑр.

#ӑмӑртусем, #литература, #Антон Чехов чӑвашла, #ЧЧЛ, #чӑваш чӗлхи