«Россия 1» (чӑв. Раҫҫей 1) телеканал кӑтартакан «Привет, Андрей» телекӑларӑма тата тепӗр чӑваш артистки хутшӑннӑ.
Чӳк уйӑхӗн 27-мӗшӗнчи кӑларӑмра Вологда облаҫӗнчи Светлана Калачевӑна кӑтартнӑ. Вӑл чӑвашла тата вырӑсла юрласа панӑ.
Светлана Трак енчи Кӳлхӗрри ялӗнчен иккен. Тӑван тӑрӑхран тухса кайнӑскер Вологда облаҫӗнче тӗпленнӗ. Унти Кадуй районӗнчи Никольское ялӗнчи культура ҫуртӗнче илемлӗх ертӳҫинче 20 ҫула яхӑн ӗҫленӗ. Асӑннӑ тӑрӑхри Александр Ганичев купӑсҫӑпа (вӑл «Жар-птица» телеканалта «Раҫҫей купӑсҫисем» телекӑларӑма ертсе пырать, «Русская гармонь» продюсер центрӗн ертӳҫи) иккӗшӗ Раҫҫей тӑрӑх гастрольсемпе ҫӳреҫҫӗ. Вӗсем Иркутскран пуҫласа Крым таран ҫитнӗ. Вӗсен репертуарӗнче — халӑх юррисем.
Ҫӗршыври паллӑ телеертӳҫӗсенчен пӗри, Андрей Малахов, ертсе пыракан передачӑн чӳк уйӑхӗн 6-мӗшӗнче эфира тухнӑ кӑларӑмӗнче Чӑваш Республикин халӑх артисткине Ирина Шркинӑна кӑтартнине эпир унччен пӗлтернӗччӗ-ха. Ентешӗмӗре Валерий Семин музыкант пултарулӑхне халалланӑ телекӑларӑма йыхравланӑччӗ.
+28.3 °C