Чир-чӗр никама та тиркемест ҫав. Иртнӗ эрнере пирӗн республикӑра «Атӑлҫи тӑрӑхӗнчи ӑнӑҫлӑ ҫемье» конкурс иртрӗ. Унта РФ Президенчӗн федерацин Атӑлҫи округӗнчи полпречӗ Игорь Комаров та, республика Элтеперӗ Олег Николаев та, республикӑри Хӗрарӑмсен канашӗн ертӳҫи Наталья Николаева та хутшӑнманччӗ.
«Правда ПФО» тӗнче тетелӗнчи хаҫат хӑйӗн ҫӑлкуҫӗсем ҫине таянса пӗлтернӗ тӑрӑх, Наталья Николаева ковидпа чирленӗ. Олег Николаев тӗплӗн тӗрӗслениччен инҫет мелпе ӗҫлеме йышӑннӑ, Игорь Комаров вара Чӑваш Ене килмен.
Ҫав вӑхӑтрах Олег Николаев маларах «Спутник V» препаратпа вакцинаци тутарнм паллӑ. Унӑн иккӗмӗш тапхӑрӗ витӗр вӑл ҫу уйӑхӗн ҫурринче тухнӑ.
Николаев хӑйӗн арӑмӗ чирленӗ хыҫҫӑн иккӗмӗш кунхинех Ҫӗмӗрлене вӗҫтернӗ, унта вӑл вакцинаци шайӗ пӗчӗк шайра пулнишӗн вырӑнтисене ӳпкеленӗ. Прививка тунисен килӗнче ковилдпа чирлекен тупӑнсан ҫынпа мӗн чухлӗ вӑхӑт хутшӑнма юраманни пирки «Правда ПФО»-на уҫӑмлатма хальлӗхе май килмен. Маларах икӗ эрне тетчӗҫ, халӗ кӑшӑлвирус тесчӗн кӑтартӑвне (ҫын чирлӗ маррине) пӗличчен тесе те калаҫҫӗ-мӗн.
Чӑваш Ен Элтеперӗ Олег Николаев шӑматкун Ҫӗмӗрлери территорисем хушшинчи медицина центрӗнче пулнӑ. Республикӑн влаҫ органӗсен официаллӑ порталӗнче пӗлтернӗ тӑрӑх, Ҫӗмӗрле ертӳҫисене халӑха кӑшӑлвирусран прививка тӑвас ӗҫе начар йӗркеленӗшӗн сӑмах лекнӗ.
Юлашки кунсенче пирӗн республикӑра талӑксерен 8 пин ҫын прививка тутарасшӑн иккен. Унччен ҫак цифра 4 пинпе танлашнӑ. Ҫавна май медицина учрежденийӗсенче черет вӑрӑмланнӑ. Апла пулсан ӗҫе ҫӗнӗ лару-тӑрӑва кура йӗркелеме тивет.
Паянхи куна илсен Ҫӗмӗрлере кунсерен 350 ытла ҫынна вакцинацилеме пулать, анчах чи хӗрӳ вӑхӑтра та кунсерен 160 ҫын ҫеҫ прививка тутарнӑ.
Элтепер шухӑшланӑ тӑрӑх, халӑхпа ытларах ӗҫлемелле, кӑшӑлвирусран епле хӳтӗленмелли ҫинчен ытларах каласа кӑтартмалла. Ҫӗмӗрлере е ытти муниципалитетра вакцинаци валли хушма бригада кирлӗ пулсан унта ытти ҫӗртисене яма пулать тесе палӑртса хӑварнӑ Олег Николаев.
Канаш хулинче, Красноармейски тата Хӗрлӗ Чутай районӗсенче вакцинаци витӗр халӑхӑн 40 ытла проценчӗ тухнӑ. Ҫӗнӗ Шупашкарпа Улатӑр хулисенче, Вӑрмар, Тӑвай, Элӗк тата Улатӑр районӗсенче прививка тутарнисен хисепӗ 30 процентран сахалрах.
Ҫулталӑк пуҫланнӑранпа республикӑра 1604 ҫын кӑшӑлвируса пула вилнӗ. Иртнӗ талӑкра 6 ҫыннӑн пурнӑҫӗ татӑлнӑ. Ҫапла чирленӗ кашни 17-мӗш ҫын кӑшӑлвируса пула вилнӗ.
Ку таранччен 27886 ҫын инфекциленнӗ. Вӗсенчен 59-шӗ – юлашки талӑкра. 25468 ҫын кӑшӑлвируса парӑнтарнӑ. Юлашки талӑкра 43 ҫын сывалнӑ.
Хальхи вӑхӑтра стационарта тата килте амбулатори мелӗпе 814 ҫын кӑшӑлвирусран сипленет.
Ку инкек Шупашкар районӗнчи «Прогресс» хуҫалӑхра кӑҫалхи ака уйӑхӗн 22-мӗшӗнче 10 сехет те 50 минутра пулса иртнӗ. Мӑн Мамӑш ялӗнчи тырӑ складӗнче ӗҫленӗ вӑхӑтра 54 ҫулти хӗрарӑм ҫине погрузчик пырса кӗнӗ.
Тӗпчевҫӗсем палӑртнӑ тӑрӑх, 57 ҫулти тракторист-машинист погрузчикпа каялла чакнӑ. Ҫавӑн чухне вӑл хӗрарӑм ҫине пырса кӗрсе унӑн сывлӑхне самай сиенленӗ. Эпир пӗлнӗ тӑрӑх, хӗрарӑм пульницӑра чылай вӑхӑт сипленнӗ, вӑл халӗ те ура ҫине тӑрса пӗтеймен-ха.
Ӗҫри пӑтӑрмах хыҫҫӑн РФ Следстви комитечӗн Чӑваш Енри управленийӗн тӗпчевҫисем пуҫиле ӗҫ пуҫарнӑ. Вӗсем палӑртнӑ тӑрӑх, инкек ӗҫ хӑрушсӑрлӑхӗн правилисене пӑхӑнманран пулса иртнӗ.
Халӗ тӗпчев малалла пырать. Ҫывӑх вӑхӑтра медицинӑпа суд экспертизи ирттерӗҫ, ӗҫ сыхлавӗпе ҫыхӑннӑ документсене тишкерӗҫ, инкек пулса иртнине курнисенчен ыйтса пӗлӗҫ.
Паян ирпе Шупашкарта арҫын виллине тупнӑ. Кун пирки «Про город» кӑларӑм халӑх корреспонденчӗ хыпарлани тӑрӑх пӗлтернӗ. Малтанласа шухӑшланӑ тӑрӑх, арҫын путса вилнӗ.
Вилнӗ арҫын ӳтне паян ирхи 7 сехетре хулари Ҫӗнӗ сала ҫывӑхӗнчи пляжра асӑрханӑ. Вӑл хӑҫан путнине хальлӗхе татса каламан. Сӑнпа пӑхсан, арҫын 40 ҫулсенче.
Арҫын виллине тупнӑ вырӑна следствипе оперативлӑ ушкӑн пырса ҫитнӗ. Вӗсем инкек сӑлтавне ҫеҫ мар, ҫамрӑкла сарӑмсӑр вилнӗ ҫын кам иккенне те палӑртӗҫ.
Шупашкарти тухтӑрсем тепӗр ачана вертолетпа урӑх региона илсе ҫитернӗ. Хальхинче – Пензӑна. Ҫул ҫинче 2,2 сехет иртнӗ. Пензӑра 2 эрнери ачан чӗрине операци тунӑ. Вӑл ку енӗпе хавшакрах ҫуралнӑ.
Каялла килнӗ чухне тухтӑрсем операцие чӑтса ирттернӗ ачана илсе ҫитернӗ. 1 уйӑхри пепкен сывлӑхӗ йывӑртарах, ӑна ИВЛ аппаратпа сывлаттарнӑ, зонд витӗр ҫитернӗ.
Вертолетра васкавлӑ медпулӑшу анестезиолог-реаниматологӗ Валерий Ильин тата Республикӑри ача-пӑча клиника пульницин тухтӑрӗсем – Мария Курсова, Вероника Костюкова - пулнӑ.
Чӑваш Енри ача-пӑча уйлӑхӗсенче 3 ҫын кӑшӑлвируспа чирленӗ. Кун пирки паян Правительство ҫуртӗнче иртнӗ планеркӑра ЧР вӗренӳ министрӗ Алла Салаева каланӑ.
Икӗ тӗслӗхе ҫӗртме уйӑхӗнче шута илнӗ. Ҫӗрпӳ районӗнчи Ҫырмапуҫ шкулӗ ҫумӗнчи уйлӑхра пӗрремӗш сенӑра икӗ ҫын ҫак вируспа аптӑранӑ: уйлӑх ертӳҫи тата повар. Уйлӑха тӳрех карантина хупнӑ. Тӗрӗслев ирттернӗ: пӗр ача та чирлени палӑрман.
«Росинка» ача-пӑча уйлӑхӗнче те кӑшӑлвируспа чирленӗ тӗслӗх пулнӑ. унта пӗр вожатӑй инфекциленнӗ.
Паян ирхине, утӑ уйӑхӗн 5-мӗшӗнче, чӗре чирӗпе аптӑракан тин ҫуралнӑ арҫын ачана санитари вертолечӗпе Хусана васкавлӑн илсе ҫитернӗ.
Ача 4 кун каялла ҫуралнӑ, ӑна тухтӑрсем тӗрӗсленӗ те Хусанти ача-пӑча пульницине илсе каймаллине палӑртнӑ. 4 кунра арҫын ача кӑшт ҫирӗпленнӗ, ҫула йӗркеллех чӑтса ирттернӗ.
Ҫул ҫинче унӑн сывлӑхӗ япӑхланман, унпа юнашар тухтӑрсем пулнӑ. Вертолет Хусана 45 минутра ҫитнӗ.
Юлашки талӑкра республикӑра 6 ҫын кӑшӑлвируса пула вилнӗ. Утӑ уйӑхӗн пуҫланнӑранпа кашни кун 5-шер ҫын вилнӗ. Ҫапла пурнӑҫран уйрӑлнисен 21 ҫынна ҫитнӗ ӗнтӗ.
Пандеми пуҫланнӑранпа 1568 ҫын кӑшӑлвируса пула вилнӗ: чирленӗ кашни 18-мӗш ҫын пурнӑҫран уйрӑлнӑ.
Ку таранччен 27532 ҫын каварлӑ вируса ҫаклатнӑ. Вӗсенчен 25164-шӗ сывалнӑ. Юлашки талӑкра 55 ҫын чире парӑнтарнӑ. 57 ҫын вара чирленине палӑртнӑ. Паянхи кун тӗлне стационарта тата абулатори мелӗпе 800 пациент сипленет.
Республикӑра кӑшӑлвирусран хӳтӗленмелли 3 вакцинӑпа усӑ кураҫҫӗ: «Спутник V», «ЭпиВакКорона», «КовиВак». Юлашки иккӗшӗ Чӑваш Ене питех нумай килмен-ха.
Ҫӗртме уйӑхӗн 25-мӗшӗнче тӑваттӑмӗш вакцина ҫаврӑнӑша тухнӑ. Вӑл «Спутник лайт» ятлӑ. Унпа ытларах кӑшӑлвируспа чирленисене е унччен прививка тунисене вакцинацилессине пӗлтернӗ.
«Ку вакцина кӑшӑлвирусран пӗр прививкӑпах хӳтӗленме май парӗ», - тенӗ ЧР Сывлӑх сыхлавӗн министерствин штатра тӑман тӗп специалист-терапевчӗ Лариса Тарасова.
+19.3 °C