Чӑваш Енӗн Ӗҫлев тата социаллӑ хӳтлӗх министрӗн ҫумӗ Надежда Валериановна Никандрова паянтанпа ҫак должноҫе йышӑнма пӑрахнӑ. Хӑй ирӗкӗпе каяс тенӗ-ши вӑл е кайма ыйтнӑ-ши — Чӑваш Енӗн Министрсен Кабинечӗн Ертӳҫин Иван Моторинӑн кӗске йышӑнӑвӗнче ӑна-кӑна ӑнлантарса тӑман.
ЧР Ӗҫлев тата социаллӑ хӳтлӗх министрӗн ҫумне ӗҫрен хӑтарасси ҫинчен калакан йышӑнӑва Иван Моторин паян алӑ пуснӑ. Ӗҫлӗ хута Чӑваш Енӗн влаҫ органӗсен официаллӑ порталне вырнаҫтарнӑ.
Эпир пӗлнӗ тӑрӑх, Надежда Валериановна министр ҫумӗнче 2016 ҫулхи авӑн уйӑхӗн 12-мӗшӗнченпе тимленӗ.
Министр ҫумӗн пуканне йышӑннӑ хӗрарӑм малашне ӑҫта ӗҫлессине хыпарланине республикӑри массӑллӑ информаци хатӗрӗсенче хальлӗхе тупаймарӑмӑр.
Ҫак кунсенче тахҫантанпах юсама пуҫланӑ Ҫӗрпӳ кӗперне савӑнӑҫлӑ лару-тӑрура уҫӑсси пирки сайтра хыпарланӑччӗ. Анчах савӑнӑҫлӑ лару-тӑру пулмӗ.
Мӗншӗнне чухлама йывӑр мар: республика М-7 ҫул ҫинче, Мӑн Карачурапа Ҫӗнӗ Лапсар хушшинче, хӑрушӑ аварире вилнӗ ҫынсемшӗн хурланать. Аса илтерер: юпа уйӑхӗн 11-мӗшӗнче самосвал Канашран Мускава кайма тухнӑ микроавтобус ҫине пырса кӗнӗ. Хӑрушӑ аварире 11 ҫын вилнӗ.
Ку авари чӑваш халӑхне хурлантарчӗ. Ҫавна май Ҫӗрпӳ кӗперне те хӑюсемсӗр, хӑмпӑсемсӗр уҫӗҫ. Тепӗр тесен, халӗ кӗпер ҫулӗпе икӗ енӗпе те ҫӳреме пуҫланӑ ӗнтӗ. Машинӑсене ҫӗнӗ ҫулпа ямашкӑн республикӑри тӳре-шара килмен.
Чӑваш Енӗн Патшалӑх Канашӗн Ертӳҫи Валерий Филимонов спикер пуканне ҫывӑх вӑхӑтра урӑх ҫынна парас сӑмах тухнӑ. Ҫитес сессире, вӑл тепӗр эрнере иртмелле, Валерий Филимоновӑн заявленине пӑхса тухмалла-мӗн.
Спикер портфелӗ урӑх ҫынна куҫасси пирки Чӑваш Енӗн Правительствинчи шанчӑклӑ ҫӑлкуҫ пӗлтернӗ имӗш. Валерий Филимонов депутат пулма та пӑрахасшӑн-мӗн. Каярах вӑл «Пӗрлӗхлӗ Раҫҫей» партин регионти уйрӑмӗн политика канашӗн секретарӗн должноҫне те йышӑнмӗ тесе шухӑшлаҫҫӗ.
Ҫакӑн официаллӑ сӑлтавӗ Филимонов урӑх ӗҫе куҫни теҫҫӗ. Анчах ку вӑл апла мар имӗш. Валерий Филимонов унччен ертсе пынӑ «Фармация» предприятири пӑтӑрмахсем ҫиеле тухнӑ пулать.
Сӑмах чӑнлӑхӗпе суйи ҫитес эрнери парламент сессийӗнче паллӑ пулӗ.
Ҫӗнӗ Лапсарпа Карачура ялӗсен хушшинче пулнӑ тискер аварире вилнисен тӑванӗсене укҫа парӗҫ. ЧР Министрсен Кабинечӗ резерв фондӗнчен 3,2 миллион тенкӗ уйӑрнӑ. Распоряжение Иван Моторин алӑ пуснӑ.
Вилнисен тӑванӗсене – 250 пин, суранланнисене 50 пин тенкӗ парӗҫ. ЧР Элтеперӗ Михаил Игнатьев вырӑнти валаҫсене те шар курнӑ ҫынсен ҫемйисене май килне таран пулӑшма сӗннӗ.
Аса илтерер: аварире 13 ҫын вилнӗ. Канашран тухнӑ микроавтобус Мускава кайма тухнӑ. Салонра ытларах хӗрарӑмсем пулнӑ. Вӗсем Мускава укҫа ӗҫлесе илмешкӗн кайнӑ. Автобус – рейс транспорчӗ мар, ӑна ҫынсем ятарласа укҫалла тытнӑ.
Паян Михаил Игнатьев хурлану кунӗ пулнине пӗлтернӗ. Телекуравсене, радиосене савӑнӑҫлӑ программӑсене кӑтартма сӗнмен.
Палӑртмалла: транспорт хирӗҫ килекен ҫул ҫине тухнӑ самосвал водителӗ тӗлӗшпе пуҫиле ӗҫ пуҫарнӑ. КамАЗ «ТУС» строительство фирмин траснпорчӗ пулнӑ. Микроавтобус водителӗ тӗлӗшпе те пуҫиле ӗҫ пуҫарнӑ, вӑл ҫынсене илсе ҫӳренӗ чухне хӑрушсӑрлӑх требованийӗсене пӑхӑнман.
Нумай пулмасть, паян каҫхине, Ҫӗнӗ Лапсар тата Карачура ялӗсен хушшинче, М-7 ҫул ҫинче, пысӑк авари пулнӑ. КамАЗ транспорт хирӗҫ килекен ҫул ҫине тухнӑ та микроавтобуспа ҫапӑннӑ.
Автобусри салонра пулнӑ пассажирсем пурте вилнӗ: пӗтӗмпе – 8 ҫын. Вӑл Канашран Мускава кайма тухнӑ.
Хальлӗхе хӑрушӑ аварире мӗн чухлӗ ҫын вилни пирки татӑклӑн калайман. Ҫакӑ кӑна паллӑ: 8 ҫынран ытларах. Хӑш-пӗр сайтра 11 ҫын пурнӑҫран уйрӑлни пирки пӗлтереҫҫӗ. Анчах ҫакна хальлӗхе ҫирӗплетмен.
ЧР Элтеперӗн Михаил Игнатьевӑн пресс-секретерӗ Светлана Каликова хыпарланӑ тӑрӑх, аварире 19 ҫын суранланнӑ, 11-шӗ вырӑнта вилнӗ. Ку лару-тӑрӑва Михаил Васильевич тӗрӗслесе тӑрать. «За рулем» порталта ҫырнине ӗненес тӗк, авари пулнӑ вырӑна Правительство председателӗ, шалти ӗҫсен министрӗ, транспорт министрӗ ҫитнӗ.
Ҫӗрпӳ кӗперне савӑнӑҫлӑ лару-тӑрура уҫма палӑртаҫҫӗ. Юсаса сарлакалатнӑ кӗпер урлӑ автомобильсене юпа уйӑхӗн 15-мӗшӗнче 11 сехет те 30 минутра ҫӳретме тытӑнӗҫ.
«Волга» (чӑв. Атӑл) М-7 федераци ҫулӗ ҫинчи 977-мӗш километрта вырнаҫнӑ кӗпере уҫма тӳре-шара хутшӑнӗ. Ҫав йышра Чӑваш Ен Элтеперӗ Михаил Игнатьев, ЧР строительство министрӗ Владимир Иванов, Федерацин ҫул-йӗр агентствин ертӳҫин ҫумӗ Игорь Астахов, «Волго-Вятскуправтодор» федерацин хысна
учрежденийӗн пуҫлӑхӗ Илдар Мингазов пулмалла.
Росавтодорта кӗпер калӑпӑшӗ енчен те, йывӑрлӑха чӑтассипе те хальхи вӑхӑт ыйтнипе тивӗҫсе тӑнине ӗнентереҫҫӗ. Кӗпер патне пыракан ҫула чӑтӑмлӑрах материалтан сарнӑ иккен. Кӗпере каҫпа ҫутатмалла тӑвассине пӗлтернӗ. Ҫӗрпӳ районӗнчи Виҫпӳрт Сали патӗнче пассажирсене меллӗ пултӑр тесе автопавильон вырнаҫтарнӑ.
Ҫитес ҫулхи кӑрлачӑн 1-мӗшӗ хыҫҫӑн пирӗн ҫӗршывра аналоглӑ телекурава пӑрахӑҫлама тытӑнӗҫ. Ҫакӑ ҫӗнӗ ҫулти малтанхи вунӑ кунта пулса иртессине эпир хыпарланӑччӗ. Ҫӗнӗлӗх пирки, аса илтерер, Раҫҫейӗн цифра аталанӑвӗн, ҫыхӑнӑвӑн тата массӑллӑ коммуникацисен министрӗн ҫумӗ Алексей Волин пӗлтернӗччӗ.
Раҫҫей цифра телекуравӗ ҫине йӑлтах куҫасшӑн. Малтанласа ҫак тапхӑра ҫӗнӗ ҫул хыҫҫӑнах палӑртнӑччӗ. Халӗ ҫак вӑхӑта икӗ эрне каяраха куҫарасси паллӑ. Кун пирки Алексей Волин «Известия» хаҫата пӗлтернӗ. Унта ҫырнӑ тӑрӑх, ҫакӑ цифра телекуравӗ курма кирлӗ оборудовани туянма ҫынсене ытларах вӑхӑт парас тенипе ҫыхӑннӑ. Аса илтерер, кивӗ йышши телевизорсем валли приставка тата антенна туянмалла, dvd плеерлӑ ҫӗнӗ йышшисем валли — антенна ҫеҫ.
Шупашкарти муниципалитет тӳре-шари малашне выговоршӑн тата асӑрхаттарнӑшӑн премисӗр тӑрса юлӗ. Постановление хула администрацийӗн пуҫлӑхӗ Алексей Ладыков улшӑнусем кӗртнӗ.
Постановленин малтанхи вариантӗнче (2017 ҫулхи юпа уйӑхӗнче йышӑннӑ ӑна) ҫапларах ҫырнӑ: тӳре-шаран дисциплинарлӑ шырав пур тӑк ӑна преми памаҫҫӗ. Улшӑнусем кӗртнӗ хыҫҫӑн вара уйрӑм муниципалитет служащийӗсем премисӗр тӑрса юлма пултараҫҫӗ.
Администрацире ӗҫлекен ҫын выговор илчӗ тӗк ӑна премие 100 проценчӗпех памӗҫ. Асӑрхаттару кӑна парсан премин 50 процентне катӗҫ.
Постановление мӗнле пурнӑҫланине тӗрӗслесе тӑмашкӑн хула администрацийӗн пуҫлӑхӗн ҫумне Алексей Маклыгина шаннӑ.
Ҫӗрпӳ район администрацийӗн пуҫлӑхне Андрей Павлова тытса чарни пирки сайтра пӗлтернӗччӗ. Паян ЧР Аслӑ сучӗн суд коллегийӗ прокурор ареста тӑсма ыйтнине пӑхса тухнӑ. Пуҫлӑха айӑплакансем шутланӑ тӑрӑх, вӑл ирӗкре пулсан следствие кансӗрлеме пултарать. Аслӑ суд ыйтнине тивӗҫтернӗ – ареста тепӗр 1 уйӑхлӑха тӑснӑ.
Аса илтерер: Андрей Павлова Уголовлӑ кодексӑн виҫӗ статйипе айӑпласшӑн. Следовательсен шухӑшӗпе, район аминистрацийӗн пуҫлӑхӗ субсидие саккуна пӑсса илнӗ, унпа кредит килӗшӗвӗн (150 пин тенкӗ) проценчӗсене тӳленӗ.
Кунсӑр пуҫне Павлов должноҫӗпе коммерци организацийӗн (вӑл унта малтан ӗҫленӗ) интересӗшӗн усӑ курнӑ тесе шутлаҫҫӗ.
Палӑртмалла: Андрей Павлов халӗ те Ҫӗрпӳ район администрацийӗн пуҫлӑхӗ шутланать, сайтран унӑн сӑнне, ятне илмен. Ӑна кӑҫал ҫу уйӑхӗнче килти ареста лартнӑ, анчах вӑл условисене пӑснӑ. Кун хыҫҫӑн ӑна хупнӑ.
Паян, юпан 5-мӗшӗнче, Шупашкар хула администрацийӗн тата Шупашкарти троллейбус управленийӗн ӗҫченӗсем автономлӑ майпа ҫӳрекен троллейбуса тӗрӗсленӗ. Тӳре-шара транспортпа хула тӑрӑх ярӑннӑ.
Кунашкал пӗр троллейбус 17 пин тенкӗ тӑрать. Субсидисене шута илсен вӑл 9 миллион тенке ларӗ. Троллейбус рулӗ умне ларнӑ Сергей водитель каланӑ тӑрӑх, транспорт ҫӑмӑллӑн ҫӳрет, унпа кайма лайӑх. Салонра ӑшӑ, алӑксем пӗр пускӑча пуссанах пурте уҫӑлаҫҫӗ. Вӑл сусӑрсемшӗн те меллӗ: варринчи алӑкран кӗмешкӗн ятарлӑ лапам пур.
Троллейбус линисӗр 15 ҫухрӑм таран кайма пултарать. Линипе кайнӑ чухне заряд илет, вара малалла «мӑйракасемсӗрех» ҫӳреме май пур.
Ҫакнашкал троллейбуссене кӑҫал раштав уйӑхӗнче «Садовый» микрорайона ярасшӑн. Вӗсем 10-мӗш номерпе ҫӳрӗҫ. Чӳк уйӑхӗн вӗҫӗнче Шупашкара ҫакнашкал темиҫе троллейбус илсе килмелле.
+2.3 °C