Ӗнер Шупашкарта Финансист кунне тата Раҫҫей финанс тытӑмне туса хунӑранпа 215 ҫул ҫитнӗ ятпа халалласа савӑнӑҫлӑ мероприяти ирттернӗ. Уява Чӑваш патшалӑх оперӑпа балет театрӗнче йӗркеленӗ. Унта Чӑваш Ен Элтеперӗ Михаил Игнатьев мӑшӑрӗпе хутшӑннӑ.
Уява Раҫҫей Федерацийӗн Патшалӑх Думин депутачӗсем Алена Аршинова, Леонид Черкесов, Чӑваш Республикин Патшалӑх Канашӗн Ертӳҫи Валерий Филимонов тата ыттисем хутшӑннӑ.
Республикӑн финанс министрне Светлана Енилинӑна Леонид Черкесов тав ҫырӑвӗпе чысланӑ. Вӑл республикӑра финанс пайӗнче ӗҫлекенсем тӳрӗ кӑмӑллӑ, хӑйсене шанса панӑ тивӗҫе яваплӑха туйса, халӑх ырлӑхӗшӗн таса чунпа ӗҫленине палӑртнӑ.
Светлана Енилина республика Элтеперӗ ют ҫӗршывсемпе те ӗҫлӗ ҫыхӑнусене тытнине, республикӑн экономики ҫирӗпленсе пытӑр тесе тӑрӑшнине палӑртса хӑварнӑ.
Ку пӑтӑрмах пирки «Про Город» портал каласа панӑ. 4 класс вӗренсе пӗтернӗ 11 ҫулхи арҫын ачана халӗ те ашшӗ-амӑшӗ нихӑш шкула та вырнаҫтарайман. Пӑтӑрмах мӗне пула сиксе тухни пирки портала ачан амӑшӗ каласа панӑ.
Йывӑрлӑхсем 37-мӗш шкултан пуҫланнӑ иккен. Ашшӗ-амӑшӗ ачана ҫав шкула вырнаҫтарма кайсан шкул ертӳҫисем хутсем ыйтнӑ — ачан прописки пирки тата ахаль шкулта та вӗренме пултарнине ҫирӗплетекен справкӑна. Вӗсене хатӗрлесе ҫитерсен шкул директорӗ ачана ҫавах йышӑнасшӑн пулман — шкулта имӗш вырӑн юлман. Ашшӗ-амӑшӗ алла усман, ытти шкулсене те ҫитнӗ. Анчах ниӑҫта та ачана йышӑнасшӑн пулман — вӗсем ҫитнӗ кашни вӗренӳ учрежденийӗнче те вырӑн ҫук тесе хуравланӑ. Пӗринче вара ача япӑх вӗренни ҫине те кӑтартни пулнӑ — «виҫҫӗсем» пур имӗш.
Шупашкар хула администрацийӗн вӗренӳ управленийӗнче ачан хӳттине кӗме тӑрӑшнӑ — ӑна 47-мӗш шкула ҫирӗплетнӗ. Анчах вырӑна ҫитсен тепӗр пӑтӑрмах сиксе тухнӑ — 11 ҫулхи арҫын ачана тӳре-шара ӑнсӑртран хӗрача ячӗпе ҫырса хунӑ иккен («Про Город» портал Александра Николаева ята асӑнать).
Хальхи вӑхӑтра ача килте ларать, вӗренӳ программине ӑса ашшӗ-амӑшӗ пулӑшнипе хывать.
Ҫурла уйӑхӗн 30-мӗшӗнче ӑна-кӑна туянма тесе тухнӑскер яла телевидени, Республика пуҫлӑхӗн представителӗсем килнӗ тенине илтсен унталла ҫул тытрӑм. Халӑх умӗнче ял тӑрӑхӗн пуҫлӑхӗ Фомин В. В. 7 уйӑхлӑхра мӗнле ӗҫленӗ пирки савӑнса отчет ирттерет.
Пухӑва бюджетра ӗҫлекенсене кӑна чӗннӗ пулас. Миҫе ҫын Чӑваш енри Муркаш районӗнчи Юнкӑ ял тӑрӑхӗнче вӗсем? Вара ялти пенсионерсем, колхозниксем тата ытти сферӑра ӗҫлекенсем пуҫлӑхсемшӗн хура пӑнчӑ анчах пулсан мӗн тума утатпӑр-ши суйлава? Тӗлӗнмелле!
Аван ӗҫлесе пырать иккен пирӗн ял хуҫи. Кӑпас ялӗнче туса пӗтереймен ҫул, амбулаторинче шыв ҫукки, Ҫамрӑксен урамне кӗрекен ҫул ҫӑрӑлса выртни, центрпа иртекен асфальт ҫул юрӑхсӑра тухни, Явӑльня, Мӑнъял, Ҫамрӑксен урамсенене тивӗҫтерекен шыв башни паян-ыран ӳкме пултарни,– пӗри те ун ӗнсине хыҫмалли ӗҫсем мар иккен. «Халӑхпа пӗр чӗлхе тупса ӑнланса ӗҫлекен хуҫасем» ҫула май тесе МТС вышки ҫине те ҫитрӗҫ. Чунӗ тулса ҫитнипе калаҫма ал ҫӗклекенсене сӑмах памаҫҫӗ. Сӑмахпа путарма тӑрӑшаҫҫӗ, влаҫа юрама юратакан япшар чӗлхесем.
Шупашкар хула администрацийӗн пуҫлӑхӗ Алексей Ладыков ҫурла уйӑхӗн 1-мӗшӗнче маршруткӑсене пӑрахӑҫласси пирки постановление алӑ пуснӑччӗ. Унта палӑртнӑ тӑрӑх, 34-мӗш, 49-мӗш тата 65-мӗш маршруткӑсене ҫӳреме чармалла пулнӑ, ытти рейс ҫинче машинӑсен хисепне чакарма палӑртнӑ. Анчах перевозчиксемпе килӗшӗве 180 кунран ҫеҫ татма май пулни ҫиеле тухнӑ.
Халӗ Алексей Ладыков хӑш-пӗр маршрута хупассине пӑрахӑҫлани пирки постановление алӑ пуснӑ. Кун пирки хула администрацийӗн порталӗнче пӗлтереҫҫӗ.
Администраци маршрутчиксене судра выляса янине те палӑртмалла. Арбитраж сучӗ 60-мӗш тата 60-мӗш «К» маршрутсен лицензине тӑсма хирӗҫлени саккуна пӑсни тесе ҫирӗплетнӗ. Мэри ку йышӑнӑва пӗрех тӗрӗс мар тесе ыйту ҫырнӑ.
Шупашкар хула администрацийӗн ҫамрӑксен политикин пайӗн пуҫлӑхӗ Эльдар Черкесов чӑнах та ӗҫрен кайнӑ-и? Чӑннипе, кунашкал сас-хура ҫамрӑксен хушшинче икӗ уйӑх каяллах тухнӑ. Анчах Эльдар Хасанович кун пирки хӑй пӗр сӑмах та каламан.
Сас-хурана уҫӑмлатар. Эльдар Черкесов хула администрацийӗнче текех чӑнах та ӗҫлемест. Вӑл малашне Шупашкарти коопераци институчӗн воспитани енӗпе ӗҫлекен проректор тивӗҫӗсене пурнӑҫлӗ.
Эльдар Черкесов ӗҫрен мӗншӗн кайни, ахӑртнех, чылайӑшне кӑсӑклантарать. Хӑй акӑ мӗнле ӑнлантарать ҫакна: «Ывӑнтӑм. Ҫыннӑн кашни пилӗк ҫулта хӑйне евӗр чикӗ пулать теҫҫӗ. Манӑн шӑпах ҫавнашкалли ҫитрӗ-тӗр».
Каласа хӑварар: Эльдар Черкесов Кабарда-Балкар Республикинче ҫуралнӑ, Чулхулари ШӖМ академине пӗтернӗ. Унтах вӗрентнӗ, директор ҫумӗнче ӗҫленӗ. 2012 ҫулта Шупашкар хула администрацийӗнче вӑй хума пуҫланӑ.
Чӑваш Енӗн финанс министрӗ пулнӑ Михаил Ноздрякова Севастопольте хисепленине вӑл тӑрӑхра ҫак кунсенче чӑваш парламенчӗн делегацийӗпе пулнӑ Игорь Моляков каласа кӑтартнӑ. Кӑнӑр енчи регионти ӗҫлӗ ҫулҫӳревпе паллаштарма иртнӗ эрне вӗҫӗнче Валерий Филимонов спикер пресс-конференци пухнӑ.
Михаил Ноздрякова 2015 ҫулхи ҫурла уйӑхӗнче Севастопольти финанс департаменчӗн пуҫлӑхӗн пӗрремӗш ҫумне лартнӑ. Аса илтерер, Ноздрякова 2014 ҫулхи нарӑсӑн 3-мӗшӗнче, финанс министрне йышӑннӑ вырӑнтан хӑтарнӑччӗ.
Михаил Ноздряков 1970 ҫулта ҫуралнӑ. 1992 ҫулта Питӗрти патшалӑх университетне вӗренсе пӗтернӗ, унта вӑл «Политика экономийӗ» специальноҫа алла илнӗ. 1999 ҫулхи юпа уйӑхӗнчен 2010 пуш уйӑхӗччен РФ Перекет банкӗн республикӑри управляющийӗн пӗрремӗш ҫумӗнче тӑрӑшнӑ хыҫҫӑн ӑна ВТБ банкӑн Шупашкарти филиалне ертсе пыма шаннӑ. 2011 ҫулта вӑл Чӑваш ен Правительствинче ӗҫлеме тытӑннӑ, министра ҫитнӗ.
Чӑваш Республикинче обществӑпа политика лару-тӑрӑвне хакламашкӑн ятарлӑ тӗпчев ирттерме хатӗрленеҫҫӗ. Ҫавна май Республика Элтеперӗн Администрацийӗ уҫӑ конкурс пуҫарнӑ. Контрактӑн хакӗ самаях пысӑк: 1 миллион та 280 пин тенкӗ.
«Правда ПФО» сайт пӗлтернӗ тӑрӑх, «Чӑваш Енри обществӑпа политика лару-тӑрӑвӗ» темӑпа социаллӑ тӗпчев ирттерме кӑмӑл пуррисен пӗтӗм документсене чӳк уйӑхӗн 15-мӗшӗччен хатӗрлесе памалла.
Конкурс докуменчӗсенче палӑртнипе килӗшӳллӗн, Чӑваш Енре пурӑнакансенчен телефонпа шӑнкӑравласа ыйтса пӗлӗҫ. Пӗтӗм шӑнкӑравран 75 процентне карас телефонӗ ҫине, ытти 25 процентне стационарлӑ телефон ҫине шӑнкӑравлӗҫ. Номерсене ятарласа суйламӗҫ.
Тӗпчев ирттерекенсен ҫапла майпа Чӑвашра пурӑнакансем пурнӑҫ шайне, хӑйсен пурлӑх-мулне епле хак панине, халӑх вырӑнти тата республика влаҫне мӗнле паллӑпа хакланине, регион тата федераци ведомствисенче ӗҫлекен тӳре-шара ӗҫӗпе, патшалӑх пулӑшӑвӗсен пахалӑхӗпе кӑмӑллӑ е кӑмӑллӑ мар пулнине, хӑш политика партине ытларах килӗштернине пӗлмелле. Тепӗр пӗлтерӗшлӗ самант та пур ыйтӑмра: халӑх протестлӑ акцисене хутшӑнасшӑн-и?
Укҫа шута юратать тесе ваттисем мӗн авалтан каланӑ. Апла пулин те Хӗрлӗ Чутай районӗнчи хӑш-пӗр тӳре-шара урӑхларах шухӑшланӑ-ши — хысна «туприне» тухӑҫлӑ тӑкакламан. Ку факта ҫынсем ушкӑнпа ҫӑхавланӑ хыҫҫӑн прокуратура палӑртнӑ.
Чӑваш Ен прокуратурине чутайсем хӑйсен тӑрӑхӗнчи Шукакасси ялӗнчи ҫула юсанӑ чух вырӑнти администраци укҫа-тенкӗпе тивӗҫлипе усӑ курмасть тесе евитленӗ.
Асӑннӑ яла ҫул тума подряд организацийӗпе 2015 ҫулхи ҫӗртме уйӑхӗн 15-мӗшӗнчех килӗшӳ тунӑ-мӗн, анчах «Резон» подряд организацийӗ тивӗҫе кирлӗ пек пурнӑҫламан, ӑна ӗҫшӗн 49 процентне ҫеҫ тӳленӗ иккен. Строительство организацийӗ ӗҫе чарса лартнӑ пулин те Йӳҫпан ял тӑрӑхӗ нимӗнле мера та йышӑнман. Халӗ прокуратура подрядчик пирки прокуратура административлӑ ӗҫ пуҫарнӑ, ял тӑрӑхӗн пуҫлӑхӗ ячӗпе асӑрахттару хучӗ ярса панӑ.
Чӑваш Енре туризм эрнелӗхӗ ирттерме палӑртнӑ. Вӑл Пӗтӗм тӗнчери туризм кунӗпе килӗшӳллӗн авӑн уйӑхӗн 21–27-мӗшӗсенче иртӗ.
Туризм эрнинче ҫавра сӗтелсем, семинарсем, пресс-турсем, хӑтлавсем пулӗҫ, экскурсин ҫӗнӗ маршручӗсемпе паллаштарӗҫ.
Тематика лапамне регионти туризм пӗрлӗхӗн элчисем, Чӑваш Ен ҫыннисем пухӑнӗҫ. Кунсӑр пуҫне унта Раҫҫейри ытти регионти хӑнасем хутшӑнӗҫ.
«Чӑваш Енри туризм эрни» мероприятипе килӗшӳллӗн, республика влаҫӗн тата бизнес-сообществӑн элчисен анлӑ ларӑвӗ иртӗ. Ҫавӑн пекех «Чӑваш Республикинчи туриндустри лидерӗсем — 2016» конкурса пӗтӗмлетӗҫ.
РФ Следстви комитечӗн Патӑрьелти районсен пӗрлехи следстви пайӗ Елчӗк районӗнчи Елчӗк ял тӑрӑхӗн пуҫлӑхӗ тӗлӗшпе пуҫиле ӗҫ пуҫарнине эпир пӗлтернӗччӗ. Аса илтерер, следстви шухӑшланӑ тӑрӑх, 2016 ҫулхи раштавӑн 19-мӗшӗнче Елчӗк ял тӑрӑхӗн пуҫлӑхӗ коммерци организацийӗпе Тӳскел ялӗнче нумай ӗҫ тӑвакан культура центрне туса пӗтерме килӗшӳ алӑ пуснӑ. Подряд организацийӗ пуҫлӑхне вӑл ӗҫе 930 пин тенкӗлӗх тунӑ тесе алӑ пусма ыйтнӑ. Тӗрӗссипе 430 пин тенкӗлӗх кӑна пурнӑҫланӑ.
Елчӗк ял тӑрӑхӗн пуҫлӑхне РФ Пуҫиле кодексӗн 292-мӗш статйин 1-мӗш пайӗпе службӑри ултавшӑн айӑпласшӑн.
Пуҫиле ӗҫе халӗ тӗпчесе пӗтернӗ. Ӑна вырӑнти прокуратура ҫирӗплетнӗ хыҫҫӑн пӑхса тухма суда ярса панӑ.
+0.3 °C