Шупашкарта ҫуралнӑ хӗрачана хӑйне евӗр ят панӑ. Ашшӗ-амӑшӗ ӑна Калинин район администрацийӗн ЗАГС пайӗнче регистрациленӗ. Хӗрача Аврелия ятлӑ.
Аврелия – латин чӗлхинчен килнӗ, Юлий Цезарӗн амӑшӗ ҫапла ят пулнӑ. Вӑл «Аврелий» арҫын ятӗнчен пулса кайнӑ, «ылтӑн» тенине пӗлтерет.
ЗАГС ӗҫченӗсем каланӑ тӑрӑх, Калинин районӗнче кунашкал ята юлашки икӗ ҫулта регистрацилемен.
Ҫурла уйӑхӗн 16-мӗшӗнче республикӑра икӗ аварире икӗ мотоциклист аманнӑ. Вӗсене санавиаци вертолечӗпе Шупашкарти пульницӑна илсе ҫитернӗ.
Пӗр авари Улатӑр районӗнче пулнӑ, тепри – Ҫӗмӗрле районӗнче. Икӗ мотоциклист та вӑйлах аманнӑ, иккӗшӗ те халӗ комӑра. Вӗсене санавиаци вертолечӗпе Шупашкарти васкавлӑ медпулӑшу пульницине илсе ҫитернӗ. Тухтӑрсем палӑртнӑ тӑрӑх, ку – питӗ лайӑх мел. Мӗншӗн тесен пуҫне амантнӑ пациентсене машинӑпа илсе килнӗ чухне ҫул ҫинче силлентерни сиен кӳрет.
Паян Шупашкар хула администрацийӗнче хулан хисеплӗ ҫыннине Николай Емельянова чысланӑ. Ӑна хула администрацине халӗ ертсе пыракан Денис Спирин, хула мэрӗ Евгений Кадышев саламланӑ. Вӗсем ҫак ята тивӗҫнӗ Николай Емельянова тӗп хуламӑра хӑтлӑлатнӑшӑн, аталантарнӑшӑн тав тунӑ.
Аса илтерер: кӑҫал хулан хисеплӗ ҫыннине тивӗҫессишӗн 7 кандидатура тупӑшнӑ. «Уҫӑ хула» порталта ирттернӗ сасӑлавра Николай Емельянов ҫӗнтернӗ. Палӑртмалла: вӑл Шупашкара 2002-2010 ҫулсенче ертсе пынӑ.
Ҫурла уйӑхӗн 16-мӗшӗнче Шупашкарта пурӑнакан Августа Агеева 100 ҫулхи юбилейне паллӑ тунӑ. Ӑна саламлама депутатсемпе тӳре-шара килнӗ.
Кинемее Раҫҫей Президенчӗ Владимир Путин саламласа открытка янӑ. Хӑнасем юбиляра парнесемпе савӑнтарнӑ. Шупашкарти ача-пӑча ӳнерӗн 3-мӗш шкулти ачасем вара юрласа кӑмӑла ҫӗкленӗ.
Августа Агеева Тӑван ҫӗршывӑн Аслӑ вӑрҫи вӑхӑтӗнче Чапаев савутӗнче тӑрӑшнӑ. Мирлӗ пурнӑҫра вара чылай ҫул педиатрта вӑй хунӑ.
Шупашкарти 38 ҫулти хӗрарӑм хӑйӗн хӗрне хӗнесе пурӑннӑ, амӑшӗн тивӗҫне вара йӗркеллӗ пурнӑҫламан. Хӗрарӑм тӗлӗшпе халӗ пуҫиле ӗҫ пуҫарнӑ.
Эгер бульварӗнче пурӑнакан хӗрарӑм кӑҫалхи нарӑс уйӑхӗнчен тытӑнса утӑ уйӑхӗччен 16 ҫулти хӗрне пӗрмай хӗненӗ: аллипе пуҫӗнчен тата ытти вырӑнтан ҫапнӑ, шӑлавар пиҫиххийӗпе те хӗненӗ.
Ҫемьере хӗрарӑмӑн тата тепӗр икӗ ача ӳсет иккен. Вӗсем — 14 тата 15 ҫулсенчи ачасем. Ҫемье ҫул ҫитменнисемпе ӗҫлекен комиссире учётра тӑнӑ.
Тӗпчевҫӗсем профилактика тытӑмӗнче ӗҫлекенсем хӑйсен тивӗҫне епле пурнӑҫланипе те кӑсӑкланӗҫ.
Хула кунӗнче, ҫурла уйӑхӗн 20-мӗшӗнче, Шупашкарти Анне палӑкӗ умӗнче «Чечексен балӗ» иртӗ. Вӑл 16 сехетре пуҫланать.
Унта хутшӑнакансем чечекрен тӗрлӗ япала тӑвас енӗпе ӑмӑртӗҫ. Шлепкесем, сумкӑсем, эрешсем… Темпе те тӗлӗнтерӗҫ вӗсем. Йӑлтах – чечекрен: чӗрринчен тата искуственнӑйӗнчен, типӗтнинчен…
Конкурса ҫав кунах пӗтӗмлетӗҫ. Заявкӑсене вара ыранччен, ҫурла уйӑхӗн 16-мӗшӗччен, йышӑнаҫҫӗ.
Сӑмах май, ҫав вырӑнта кӑҫал ҫулла тӑршшӗпех «Чечексен фестивалӗ» ӗҫлет.
Чӑваш Енри ҫамрӑк ӳнерҫӗ Василий Чапай троллейбус ҫине чӑваш хӗрӗн сӑнарне, Анне палӑкне ӳкерни пирки хыпарланӑччӗ.
Ҫак троллейбус ҫурла уйӑхӗн 20-мӗшӗнче, Шупашкарӑн ҫуралнӑ кунӗнче, ҫула тухӗ. Вӑл 1-мӗш маршрутпа 9 сехет те 2 минутран пуҫласа 19 сехет те 48 минутчен ҫӳрӗ.
Хӑйне евӗр илемлӗ троллейбус ӑҫта ҫитнине «Ӑслӑ транспорт» сарӑмра та сӑнама пулать. Унта ӑна «976 Нарспи» тесе паллӑ тӑвӗҫ.
Ҫавӑн пекех Хула кунӗнче ретро-троллейбус ҫула тухӗ. Унпа 9 сехет те 6 минутран пуҫласа 16 сехет те 57 минутчен ярӑнма май пур. Вӑл ҫав маршрутпах ҫӳрӗ.
Раҫҫейри 1250 вӗрентекен Владимир Путин президентӑн премине – 200 пин тенке – тивӗҫнине, вӗсенчен 11-шӗ Чӑваш Енрен, 2-шӗ чӑваш чӗлхипе литературин вӗрентекенӗ пулнине тин кӑна пӗлтернӗччӗ.
Ҫак йышпа туллин паллаштарӑр. Премие тивӗҫнисен хушшинче — Ҫӗнӗ Шупашкарти 17-мӗш шкулти Екатерина Ананьева, Шупашкарти 5-мӗш шкулти Малека Гасанова, Куславккари 3-мӗш шкулти Лариса Гладкова, Елчӗк шкулӗнчи Алексей Данилов, Шупашкарти 2-мӗш лицейри Ольга Данилова, Ҫӗнӗ Шупашкарти 12-мӗш шкулти Василиса Егорова, Шупашкарти сывлӑх енчен хавшак ачасен 2-мӗш шкулӗнчи Ираида Мартьянова, Вӑрнар районӗнчи Пӑртас шкулӗнчи Татьяна Петрова, Улатӑрти 2-мӗш шкулти Елена Селезнева, Ҫӗмӗрлери 1-мӗш шкулти Татьяна Соколова, Шупашкарти 40-мӗш шкулти Александр Степанов.
Чӑваш Енри 11 педагог Раҫҫей Президенчӗн премине тивӗҫнӗ. Ҫӗршывӗпе илсен ун пеккисен пӗтӗмӗшле йышӗ — 1250 ҫын.
Республикӑн вӗрентӳ тата ҫамрӑксен политикин министрӗ Дмитрий Захаров Телеграмра пӗлтернӗ тӑрӑх, ҫӗнтерӳҫӗ-вӗрентекенсене 200-шер пин тенкӗ преми парӗҫ. Сумлӑ йышра чӑваш чӗлхи учителӗсем те пур. Вӗсем — Шупашкарти сывлӑх енчен хавшак ачасен 2-мӗш шкулӗнче чӑваш чӗлхипе литературине вӗрентекен Ираида Матьянова тата Шупашкарти 40-мӗш вӑтам шкулти Александр Степанов.
Шупашкарта кинемейсем спектакльсем лартаҫҫӗ. Хальхинче вӗсем ачасене «Кушак аҫипе тилӗ» юмах кӑтартса панӑ. Юмахра Кушак аҫин рольне калӑпланӑ 74 ҫулти Римма Игнатьева: «Хальхинче питӗ тимлӗ итлекен куракансем пулчӗҫ», — тесе ырланӑ шӑпӑрлансене.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен ватӑсем «Ретрогварди» проекта хутшӑннӑ май Пукане, Мода, Пантомима тата Драма театрӗсенче выляҫҫӗ. Центрта ӗнентернӗ тӑрӑх, ваттисем лартнӑ спектакльсене тӗрлӗ ҫулхи куракансем кӑмӑлтан йышӑнаҫҫӗ.
+16.3 °C