Утӑ уйӑхӗн 23-мӗшӗнче Шупашкартан Мускава ҫӳрекен самолёт вӗҫсе хӑпарайман. Ҫавӑн сӑлтавӗ — двигателе кайӑк лекни.
Самолёт сывлӑша ҫӗкленес умӗн специалистсем ӑна пӑхнӑ чухне кайӑк тӗкне асӑрханӑ.
Самолёт вӗҫсе хӑпарасса 181 пассажирӑн 4 сехет ытла кӗтме тивнӗ. 9 сехет те 10 минутра ҫула тухмалли самолёт 13 сехет те 30 минутра кӑна вӗҫсе кайнӑ.
Маларах Шупашкарти аэропортра кайӑксене хӑратакан хурчка пулнӑ.
Шупашкарта чӑваш агромаркечӗ пуласси, ун валли сасӑлав ирттерсе ят суйлани пирки пӗлтернӗччӗ. Аса илтерер: агромаркет "Пехет" ятлӑ пулӗ.
Ӑҫта вырнаҫӗ-ха "Пехет"? ЧР ял хуҫалӑх министрӗ Сергей Артамонов унӑн эскизӗпе Телеграм-каналӗнче паллаштарнӑ. Агромаркет "Каскад" суту-илӳ центрӗнче вырнаҫӗ. Ӑна кӑҫал уҫма палӑртнӑ. Унта сутӑнакан пӗтӗм тавар экологи тӗлӗшӗнчен таса тата хамӑр патра туса кӑларни пулӗ.
Шупашкарта Василий Чапай ятлӑ ӳнерҫӗ троллейбуса сӑрласа илемлетет. Вӑл унта Нарспи сӑнарне ӳкерет.
Троллейбус Энгельс урамӗнчи депора тӑрать. Ӳнерҫӗ каланӑ тӑрӑх, хальлӗхе пӗр енӗ хатӗр. Вӑл ӗҫе Шупашкарӑн ҫуралнӑ кунӗ тӗлне туса пӗтерессе шанать.
Ҫак троллейбус 1997-2021 ҫулсенче 19-мӗш маршрутпа ҫӳренӗ. Ӑна темиҫе хутчен те сӑрласа илемлетнӗ. Нарспи сӑнарне ӳкерсе пӗтерсен троллейбуспа мӗн тӑвассине пӗлтермен.
Раҫҫей тата Чӑваш Республикин тава тивӗҫлӗ ӳнерҫи Виктор Бритвин пурнӑҫран уйрӑлнӑ. Унӑн чӗри утӑ уйӑхӗн 23-мӗшӗнче тапма чарӑннӑ. Вӑл 2 эрне каялла 68 ҫул тултарнӑ.
Хурлӑхлӑ хыпара тӑванӗсем ӳнерҫӗн халӑх тетелӗнчи страницинче пӗлтернӗ. Вӑл мӗншӗн вилнине палӑртман.
Виктор Бритвинпа ыран сывпуллашӗҫ. Кӑнтӑрла арҫынсен Ҫветтуй Троица мӑнастирӗнче кӗлӗ вулӗҫ. Унтан Шупашкарти ӳнер училищинче сывпуллашӗҫ. Вӑл ӑна иртнӗ ӗмӗрӗн 80-мӗш ҫулӗсенче 3 ҫул ертсе пынӑ.
Куславкка районӗнчи 67 ҫулти хӗрарӑм патне мессенджерта палламан ҫын шӑнкӑравласа хӑйӗнпе йӗрке хуралҫи тесе паллаштарнӑ. Хайхискер каланӑ тӑрӑх, такам ун ячӗпе кредит илесшӗн, унӑн ҫулне пӳлес тесен кредит илсе укҫана урӑх счет ҫине куҫармалла имӗш.
Хӗрарӑм итленӗ, банка кайса кредит илнӗ, унта ӗҫлекенсене укҫа пӳрт тӑрри юсама кирлӗ тесе суйнӑ. 300 пин кредит илсен хӗрарӑм Шупашкара кайнӑ, унта укҫана пайӑн-пайӑн тӗрлӗ счет ҫине куҫарнӑ.
Шупашкар хулинчи Дементьев урамӗнче ҫапӑҫма юратакансем пурӑнаҫҫӗ иккен. Пӗтӗм урамӗпех мар-ха. Анчах ҫав урамри 1-мӗш ҫуртра пурӑнакансем ҫавӑн пек хӑтланма юраткалаҫҫӗ-мӗн. Кун пирки эпир Телеграмри каналсенчен пӗринчи хыпар тӑрӑх пӗлтӗмӗр.
Темиҫе арҫын малтан хирӗҫсе кайнӑ, унтан ҫапӑҫмах тытӑннӑ. Асӑннӑ ҫуртра пурӑнакансем каланӑ тӑрӑх, унтисем кун пек харкашни унччен те пулкаланӑ.
Пӑтӑрмаха асӑрханисем ҫапӑҫакан арҫынсене тӑна кӗме ыйтнӑ, лӑплантарнӑ. Йӗрке хуралҫисене никам та пӗлтермен.
Шупашкар хулинче пӗр арҫын аллине картлашкан карлӑкӗ хушшине чиксе лартнӑ. Ӑна вӑл унтан каялла кӑларайман.
Пӑтӑрмах утӑ уйӑхӗн 20-мӗшӗнче каҫхине, 19 сехет те 40 минутра, хулари Лебедев урамӗнчи пӗр ҫуртра пулса иртнӗ.
Аллине карлӑк хушшинче хӗстерсе лартнӑ арҫыннӑн ирӗксӗрех ҫӑлавҫӑсенчен пулӑшу ыйтма тивнӗ.
Арҫынна пулӑшма ҫӑлавҫӑсем пырса ҫитнӗ. Вӗсем «Спрут» ятлӑ хатӗр пулӑшнипе алла карлӑкран кӑларма пулӑшнӑ.
Уҫӑ тӳпе айӗнче тӳлевсӗр кино курас килсен Шупашкарти «Амазони» парка каймалла. Паян унта тӳлевсӗр сеанссем пуҫланаҫҫӗ.
Фильмсене ҫанталӑк лайӑх чухне каҫхи 8 сехетре кӑтартма тытӑнаҫҫӗ. Вӗсем пурте патриотлӑх воспитанийӗпе ҫыхӑннӑ.
Паян «Подольские карсанты» ятлине кӑтартӗҫ. Ыран «Несокрушимый» фильм экран ҫине тухӗ. Кайран «Девятаев», «Сирийская соната», «28 панфиловцев», «Битва за Севастополь», «Калашников», «Ржев» фильмсене катартӗҫ. Вӗсем ҫак черетпе экран ҫине тухса пырӗҫ.
Кино курмалли лапам пӑр катокӗ пулнӑ ҫӗрте вырнаҫӗ. Киносене ҫурла уйӑхӗн 12-мӗшӗччен кӑтартӗҫ.
Шупашкарти тӳре-шара кашни эрнерех лавккасенчи тавара - пӗтӗмпе 31 тӗрлине - тӗрӗслет. Утӑ уйӑхӗн 4-18-мӗшӗсенче мӗн хакланнӑ, мӗн йӳнелнӗ?
Хальхинче тӳре-шара ҫӑкӑр, сӗт йӳнелнине палӑртнӑ. Сӗт хакӗ - 4, ҫӑкӑр 2 процент чакнӑ. Ҫавӑн пекех панулми, купӑста йӳнелнӗ. Услам ҫу, консерв, тӑвар, тип ҫу, сухан, кишӗр, хура тул кӗрпи, чӑх какайӗ кӑшт йӳнелнине палӑртнӑ. Тӗслӗхрен, услам ҫу хакӗ - 6 тенкӗ, панулми 4 тенкӗ чакнӑ.
Утӑ уйӑхӗн 30-мӗшӗнче Шупашкарти кӳлмекре, Анне палӑкӗ умӗнче, иртнӗ ӗмӗрӗн 60-мӗш ҫулӗсенчи евӗр ташӑ каҫӗ пулӗ.
Вӑл 17 сехетре пуҫланса 21 сехетре вӗҫленӗ. Мероприятие ҫынсене 1960-мӗш ҫулсенчи тумтирпе кӗтеҫҫӗ. Чи чаплӑ тумлӑ ҫынна парне кӗтет.
Ташӑ каҫӗнче сӑн ӳкерӗнмелли зона та пулӗ. Мероприятие килекенсене хаваслӑ юрӑ-кӗвӗ кӗтет.
+18.3 °C