Чӑваш Ен Вӗренӳ тата ҫамрӑксен политикин министерствинче кадр йышӑнӑвӗ пулса иртнӗ. Ку документа Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян, ҫу уйӑхӗн 19-мӗшӗнче, алӑ пуснӑ. Унта вӗренӳ тата ҫамрӑксен политикин министрӗн ҫумӗ пулма Наталия Скворцовӑна лариасси пирки каланӑ.
Наталия Скворцова Сергей Яковлев министрӑн ҫумӗ пулса тӑрӑшнӑ. Тата маларах вӑл министерствӑра ресурс тивӗҫтерӗвӗн пайӗн консультатӗнче тӑрӑшнӑ.
Министрӑн унчченхи ҫумне Надежда Дмитриевӑна кӑҫалхи нарӑс уйӑхӗн вӗҫӗнче ӗҫрен кӑларнӑ. Ҫав уйӑхрах, унччен темиҫе кун маларах, вӗренӳ тата ҫамрӑксен политикин министрӗн тивӗҫӗсене пурнӑҫлама Чӑваш ял хуҫалӑх академийӗн администрациме хуҫалӑх енӗпе ӗҫлекен проректорне Сергей Яковлева шаннӑ.
Чӑваш Енре пурӑнакан «вӑрҫӑ ачисене» ятарлӑ удостоверени пама тытӑнасси пирки Чӑваш халӑх сайчӗ пӗлтернӗччӗ-ха. Халӗ вара ҫав документ епле пулассине республикӑн Министрсен Кабинечӗ официаллӑ майпа ҫирӗплетнӗ.
Удостоверени тӗкӗсм хӗрлӗ тӗслӗ пулӗ. Унӑн тулаш енче, сылтӑмри ҫӳлти кӗтесре, икӗ йӗркепе «Дети войны» (чӑв. Вӑрҫӑ ачисем) тата «1927–1945» тесе ҫырса хурӗҫ.
Удостоверение 1927 ҫулхи утӑ уйӑхӗн 22-мӗшӗнчен пуҫласа 1945 ҫулхи авӑн уйӑхӗн 3-мӗшӗччен ҫуралнисене парӗҫ. Ӑна илес тесен социаллӑ хӳтлӗх пайӗсенче заявлени ҫырмалла. Заявленипе пӗрле хӑҫан ҫуралнине, ӑҫта пурӑннине ҫирӗплетекен хутсем тата паспорт кирлӗ.
Шупашкарти ача-пӑча центрӗсенчен пӗри кӑшӑлвирусран шикленмен. Вӑл Раҫҫей Президенчӗ канмалли кунсем тесӗ пӗлтернине те, Чӑваш Енре ятарлӑ мерӑсем йышӑннине те пӑхӑнман унта.
Хулари Павлов мичман урамӗнчи «Джуниор» ача-пӑча центрӗ ӗҫленине Роспотребнадзорӑн Чӑваш Енри управленийӗн ӗҫченӗсем тупса палӑртнӑ.
Федерацин суд приставӗсен службин Чӑваш Енри управленийӗнче пӗлтернӗ тӑрӑх, ача-пӑча организациийӗнче дежурство ушкӑнӗ йӗркеленӗ. Тӗрӗслевҫӗсем пынӑ вӑхӑтра унта тӑватӑ ача пулнӑ.
Ача-пӑча центрне Шупашкарти Мускав район сучӗ 31 кунлӑха ӗҫлеме чарнӑ. Ҫавӑн хыҫҫӑн учреждение пырса суд приставӗсем пырса ҫитнӗ. Вӗсем «Джуниор» центра ӗҫлеттерме чарса лартнӑ, унӑн алӑкӗсене хупса хунӑ.
Паян ҫӗршыв Президенчӗ Владимир Путин Раҫҫей ҫыннисем патне хӑйне евӗр чӗнӳпе тухрӗ. Унта вӑл коронавируспа ҫыхӑннӑ лару-тӑрӑва хускатрӗ.
Тӗнчипе сарӑлнӑ амака сарасран йышӑнакан мера шутӗнче — ҫынсене пуш уйӑхӗн 28-мӗшӗнчен пуҫласа ака уйӑхӗн 5-мӗшӗччен кантарма йышӑнни. Килте ларншӑн укҫа тӳлӗҫ. Тӳрех палӑртар: лавккасем, банксем, аптекӑсем, пульницӑсем хупӑнмӗҫ, транспорт ҫӳреме чарӑнмӗ, тӳре-шара ӗҫлӗ. «Халӗ чи хӑрушсӑрри — килте ларни», — тенӗ президент. Паянах Владимир Путин ятарлӑ хушӑва алӑ пуснӑ.
Ӗҫсӗр ҫынсен пособине ӳстересси пирки те каланӑ паян ҫӗршыв ертӳҫи. Тупӑш 30 процентран ытларах чакнисене ипотека каникулӗ парасси, банкра укҫа тытакансене тупӑшран илекенсен налук тӳлеттересси (кӗмӗл виҫи 1 миллион тенкӗрен иртсен) тата ытти хӑш-пӗр самант пирки те каланӑ Владимир Путин.
Чӑваш Ен юстици тата пурлӑх хутшӑнӑвӗсен министрӗн ҫумӗ пулнӑ Дмитрий Неяскина ӗҫрен кӑларнӑ. Ҫапла йышӑнӑва ЧР Министрӗн Кабинечӗн ертӳҫи (ҫак тилхепене, аса илтерер, ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев хӑй тытать) паян, кӑрлачӑн 6-мӗшӗнче, алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче пичетленӗ.
Дмитрий Неяскина Алексей Вязов ӗҫрен кайнӑ хыҫҫӑн 2019 ҫулхи нарӑс уйӑхӗнче министр ҫумӗн пуканне шаннӑччӗ. Вӑл ЗАГС пайӗсемпе ӗҫленӗ.
Дмитрий Неяскин — Чӑваш Енӗн Шалти ӗҫсен министрӗ пулнӑ Сергей Неяскинӑн ывӑлӗ.
Патшалӑх Канашӗн сессийӗсенчен пӗринче ун чухнехи Сергей Неяскин министртан «Тӗрӗслӗхшӗн Раҫҫей» фракцин пуҫлӑхӗ Игорь Моляков ывӑлӗ, Сартури ҫамрӑк, Чӑваш Енре министр ҫумӗнче ӗҫленине хаклама ыйтнӑччӗ, лешӗ ҫавӑнта ним начарри ҫуккине пӗлтернӗччӗ.
Чӑваш Енре пурӑнакансем Раҫҫей Тӗп прокуратурин ӗченӗсем патне йышӑнӑва кайма пултараҫҫӗ. Уншӑн вӗсен Мускава ҫитмелле мар. Шупашкара ҫеҫ килмелле.
Ҫак кунсенче пирӗн республикӑн прокуратуринче Раҫҫей прокуратурин комиссийӗ ӗҫлет. Ҫавна май унтисем республика ҫыннисене йышӑнма шут тытнӑ. Уйрӑм ҫынсене ҫӗршыв прокурорӗн ҫумӗсем Игорь Ткачев тата Сергей Зайцев йышӑнӗҫ.
Йышӑнӑва пуш уйӑхӗ 4-мӗшӗнче ирхи 9 сехетрен пуҫласа 20 сехетчен Шупашкарти Карл Маркс урамӗнчи 48-мӗш ҫурта ҫитмелле. Малтанласа (8352) 39-20-43 телефон номерӗпе шӑнкӑравласа ҫырӑнмалла.
Йышӑнӑва каякансен паспорт тата ун вырӑнне юрӑхлӑ урӑх удостоверени, йышӑнура хускатма палӑртнӑ ыйтӑва ҫирӗплетсе паракан документсене илмелле.
Валерий Филимонова Чӑваш Енӗн Элтеперӗн Администрацийӗн Ертӳҫин ҫумӗнчен кӑларнӑ. Аса илтерер: ӑна ҫав пукана 2018 ҫулхи юпа уйӑхӗн 19-мӗшӗнче шанса панӑччӗ. Валерий Филимонова Чӑваш Енӗн ун чухнехи Элтеперӗ Михаил Игнатьев «тухӑҫлӑ ӗҫшӗн» тав тунӑччӗ. Республика Элтеперӗн Администрацине куҫиччен Валерий Филимонов Чӑваш Ен Патшалӑх Канашӗн спикерӗ пулса ӗҫленӗччӗ.
Паян, нарӑс уйӑхӗн 6-мӗшӗнче, Чӑваш Ен Элтеперӗн тивӗҫӗсене пурнӑҫлакан Олег Николаев Валерий Филимонова ӗҫрен кӑларма йышӑннӑ.
Сӑмах май, кӑҫалхи кӑрлачӑн 30-мӗшӗнче Олег Николаевӑн пулӑшуҫи пулма ҫирӗплетнӗ Татьяна Михайловӑна ку ӗҫрен кӑларнӑ. Мӗн сӑлтавпа ҫапла йышӑннине паянхи 29-мӗш номерлӗ йышӑнура асӑнман.
Чӑваш Ен Правительствин тытӑмне улӑштарнӑ. Ҫакӑн ҫинчен калакан хушӑва ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев паян, нарӑс уйӑхӗн 6-мӗшӗнче, алӑ пуснӑ.
Чӑваш Енре Промышленность тата энергетика министерстви туса хунӑ. Асӑннӑ енпе яваплӑх ҫапла вара Экономика министерствинчен тата Стройминран ҫӗнӗ министерствӑна куҫӗ.
Юстици тата пурлӑх хутшӑнӑвӗсен министерстви Юстици енӗпе ӗҫлекен комитета ҫаврӑннӑ.
Экономика, промышленность тата суту-илӳ министерстви малашне Экономика аталанӑвӗн тата пурлӑх хутшӑнӑвӗсен министерстви ятлӑ пулӗ.
Туризм функцине Культура, национальноҫсен ӗҫӗсен тата архив ӗҫӗн министерствинчен Экономика аталанӑвӗн тата пурлӑх хутшӑнӑвӗсен министерствине панӑ.
Гражданла хӳтӗлев тата инкеклӗ лару-тӑру енӗпе ӗҫленӗ министерство унчченхиллех Патшалӑх комитечӗ пулса тӑнӑ.
Министрсен Кабинечӗн Председателӗн тивӗҫне Чӑваш Ен Элтеперӗн тивӗҫне вӑхӑтлӑх пурнӑҫлакан ҫине тиенӗ.
Чӑваш Енӗн экономика аталанӑвӗн, промышленноҫӑн тата суту-илӗвӗн министрӗн тивӗҫӗсене пурнӑҫланӑ Павел Иванова паян ӗҫрен кӑларнӑ. Кун пирки ЧР Элтеперӗн тивӗҫӗсене вӑхӑтлӑх пурнӑҫлакан Олег Николаевӑн 19-мӗш номерлӗ хушӑвӗнче каланӑ.
Республикӑн экономика аталанӑвӗн, промышленноҫӑн тата суту-илӗвӗн министрӗ пулма Павел Иванова пӗлтӗрхи утӑ уйӑхӗн 5-мӗшӗнче шаннӑччӗ.
Павел Иванов И.Н. Ульянов ячӗллӗ ЧПУра вӗреннӗ. РФ Правительствин Халӑх хуҫалӑхӗн академийӗнче, Финанс университетӗнче квалификацие ӳстернӗ. Республикӑн Министрсен Кабинечӗн Ертӳҫин пулӑшуҫи пулнӑ. ЧР финанс министрӗн ҫумӗ пулса, Тулашэкономбанкра, Перекет банкӗнче ӗҫленӗ опыт та пур.
Павел Иванова республикӑн финанс министрӗн ҫумне лартӗҫ сӑмах та тухнӑччӗ.
Республика Элтеперӗн тивӗҫӗсене вӑхӑтлӑх пурнӑҫлакан Олег Николаев Михаил Игнатьевӑн канашҫисем пулнисене ӗҫрен кӑларнӑ.
Ҫапла вара республика ертӳҫин Михаил Игнатьевӑн канашҫисем пулнӑ Александр Владимиров («Агарикус»акционрсен уҫа обществи), Ярослав Кузнецов («Ренова Оргсинтез» акционерсен хупӑ обществи), Николай Николаев (Федерацин травматологи, ортопедипе эндпротезировани центрӗ), Михаил Петров («Малалла» ял хуҫалӑх эртелӗ), Сергей Колесников («ТехноНИКОЛЬ» корпораци), Лев Кураков (ЧПУн ректорӗ пулнӑскер), Владимир Иванов (Чӑваш патшалӑх педагогика университечӗ), Роман Караулов («Холдинг КиПиАй» предприяти), Владимир Крупнов, Евгений Селиванов (Пӗтӗм Раҫҫейри самбо федерацийӗ) текех канашҫӑсем мар.
+3.3 °C