Елчӗк районӗнчи Лаш-Таяпара пурӑннӑ кинемей сарӑмсӑр вилнӗ. Тӗпчевҫӗсем малтанласа шухӑшланӑ тӑрӑх, унӑн пурнӑҫне вут-ҫулӑм татнӑ.

Нарӑсӑн 15-мӗшӗнче унӑн пӗр хутлӑ йывӑҫ пӳртӗнче пушар алхасма тытӑннӑ. Ҫулӑма сӳнтернӗ хыҫҫӑн 81 ҫулти кинемей виллине тупнӑ. Ват ҫын сӗрӗмпе чыхӑнса вилме пултарнӑ тесе шутлаҫҫӗ.

Ҫын вилнӗ тӗслӗхе РФ Следстви комитечӗн Чӑваш Енри тӗпчевҫисем тӗрӗслеҫҫӗ. Карчӑка такам пусмӑрласа вӗлерни пирки калама сӑлтав ҫук-мӗн. Пушар вут-ҫулӑмпа асӑрханусӑр пулнӑран тухма пултарнӑ тесе шухӑшлаҫҫӗ. Елчӗк районӗнчи Лаш-Таяпари инкекӗн сӑлтавне тӗпчевҫӗсем тӗрлӗ меслетпе палӑртассине шантараҫҫӗ. Пуҫиле ӗҫ пуҫарассипе пуҫармассине тӗпчев умӗнхи тӗрӗслев хыҫҫӑн татса парӗҫ.

Шупашкартан Мускава ӗҫлеме кайнӑ каччӑпа арҫын пушарта ҫунса вилнӗ. Хытах пиҫсе кайнӑ тепӗр арҫын пульницари реанимаци уйрӑмӗнче выртать. Кун пирки паян «Чебоксары24» (чӑв. «Шупашкар24») портал пӗлтернӗ.

Хайхи инкек кӑрлач уйӑхӗн 29-мӗшӗнче ҫӗрле «Некрасовка» метро станцине тунӑ ҫӗрте пулнӑ, унта вакун хыпса илнӗ. Ҫав вакунта метро тӑвакан строительсем выртса тӑнӑ. Пушарнӑйсем вут-ҫулӑма сӳнтернӗ хыҫҫӑн 25 ҫулти каччӑпа 35-ри арҫыннӑн виллисене тупнӑ.

«Про Город» (чӑв. «Хула пирки») пӗлтернӗ тӑрӑх, вӗсем иккӗшӗ те — Шупашкар ҫыннисем, Мускава ӗҫлеме кайнӑ. Апла-и, капла-и — ку хыпара хальлӗхе никам та ҫирӗплетмен-ха.

Каласа хӑвармалла, реанимаци уйрӑмӗнче выртакан арҫын пурнӑҫӗшӗн тухтӑрсем кӗрешеҫҫӗ.

Кӑрлач уйӑхӗн 7-мӗшӗнче Шупашкарӑн Кӑнтӑр-Хӗвеланӑҫ районӗнчи кивӗ ҫуртра пушар тухнӑ. Улма-ҫырла урамӗнчи 39-мӗш ҫурт кивӗ пирки сӳтмеллискерпулнӑ. Унта ҫулӑм алхасма пуланӑ та сӗрӗмпе 37-ри арҫын антӑхса кайнӑ. Мӗскӗне Республикӑн клиника пульницине ӑсатнӑ.

Кивӗ ҫуртра мӗн сӑлтавпа ҫулӑм тухнине тӗпчевҫӗсем тӗплӗ экспертиза ирттерсе палӑртӗҫ.

Ку ҫурта кӑҫал сӳтме палӑртнӑ. Унсӑр пуҫне кӳршӗллӗ 31, 33, 35, 37 тата 41-мӗш ҫуртсене ишмелле.

Маларах Чӑваш халӑх сайчӗ Элӗк районӗнчи Ураскилтре пурӑннӑ арҫыншӑн Ҫӗнӗ ҫул каҫӗ инкекпе вӗҫленнине, сехет 12 хутчен шакканӑ хыҫҫӑн ун килӗнче пушар тухнине, пӗр хутлӑ кирпӗч пӳрт ҫуннине, пушар кил хуҫи вилнине пӗлтернӗччӗ.

Элӗк районӗнчи Ураскилтре пурӑннӑ арҫыншӑн Ҫӗнӗ ҫул каҫӗ инкекпе вӗҫленнӗ. Сехет 12 хутчен шакканӑ хыҫҫӑн ялти пӗр ҫуртра пушар тухнӑ, пӗр хутлӑ кирпӗч пӳрт ҫуннӑ.

Шел те, пушарта кил хуҫи вилнӗ. Ҫулӑма сӳнтерме 2 техника, 6 ҫын ҫитнӗ. Анчах арҫынна ҫӑлма май килмен. Ҫулӑма сӳнтернӗ хыҫҫӑн ҫав ҫуртра пурӑннӑ арҫыннӑн виллине тупнӑ. Вӑл – 1949 ҫулта ҫуралнӑскер.

Пушар ӑҫтан тухнӑ? Халӗ ку ыйтӑва уҫӑмлатаҫҫӗ, следстви умӗнхи тӗрӗслев ирттереҫҫӗ. Арҫын мӗншӗн вилнине палӑртаҫҫӗ, медицина тата пушар-техника экспертизи ирттерес ыйтӑва пӑхса тухаҫҫӗ.

Паян, раштав уйӑхӗн 29-мӗшӗнче, Шупашкарти И.Яковлев проспектӗнчи производство предприятийӗнче вут-ҫулӑм алхаснӑ. Ҫак инкек ҫур ҫӗр иртни 2 сехет ҫурӑра пулнӑ. Кун пирки «Про Город» портал халӑх корреспонденчӗ пӗлтернипе хыпарлать.

«Шупашкар керамики» савутра цех ҫунчӗ», — пӗлтернӗ вӑл кӑларӑм журналистне. Официаллӑ хыпар тӑрӑх, пушар тухнӑ вырӑна Чӑваш Енӗн МЧСӗн 18 ӗҫченӗ 5 машинӑпа пырса ҫитнӗ, ҫулӑма чарнӑ. Анчах хальлӗхе пушар мӗнрен тухни паллӑ мар.

«Вут-ҫулӑм цехӑн тӑррине юрӑхсӑра кӑларнӑ, стенасемпе ҫивиттие сиенлетнӗ. Халӗ специалистсем пушар епле майпа тухнине тӗпчеҫҫӗ. Малтанлӑха палӑртнӑ тӑрӑх, «хӗрлӗ автан» предприятие 100 пин тенкӗлӗх сӑтӑр кӳнӗ», — ӑнлантарчӗҫ Чӑваш Енри ГКЧСӑн пресс-службинче.

Паян, раштав уйӑхӗн 1-мӗшӗнче Шупашкарта чутах пысӑк инкек пулман. Макаренко урамӗнчи пӗр ҫурт ҫунма тытӑннӑ. Унта вара ҫемье пурӑннӑ.

Юрать, ҫывӑхра ҪҪХПИ ӗҫченӗсем пулнӑ. Вӗсем «Шупашкар» универмаг умӗнчи ҫавра ҫул ҫывӑхӗнче постра тӑнӑ. Ҫурт ҫуннине курсан пакунлисем часрах унта васканӑ.

Владимир Павлов аслӑ лейтенант карта урлӑ каҫса ҫӗмӗрнӗ чӳрече патне чупса пынӑ. Кил хуҫи хӗрарӑмӗ, хӑраса ӳкнӗскер, 5 ҫулти хӗрне тата 13-ри ывӑлне чӳрече урлӑ ӑна тыттарнӑ. Полицейски вара ачасене ӗҫтешне панӑ. Хӑй ҫунакан пӳрте кӗрсе хӗрарӑма урама тухма пулӑшнӑ.

Инспекторсем ҫулӑма сӳнтерме пулӑшнӑ. Анчах ҫурт самай вӑйлӑ сиенленнӗ. Хуралтӑ таврашӗ йӑлтах ҫунса кӗлленнӗ.

Сӗнтӗрвӑрри районӗнчи Хуракасси шкулӗнче пысӑк инкек пулнӑранпа 56 ҫул ҫитнӗ. 1961 ҫулхи чӳк уйӑхӗн 5-мӗшӗнче шкулта уява ячӗпе концерт иртнӗ, пӳлӗме ачасем, вӗрентекенсем пухӑннӑ. Ӑнсӑртран пушар тухнӑ, хӗвӗшӳ пуҫланнӑ.

Ҫав хӑрушӑ кун 3-15 ҫулсенчи 106 ачан тата 4 вӗрентекенӗн пурнӑҫӗ вӑхӑтсӑр татӑлнӑ.

Хуракассисем кашни ҫулах чӳк уйӑхӗн 5-мӗшӗнче пушарта вилнисене асӑнса митинг ирттереҫҫӗ. Кӑҫал та унта МЧС ӗҫченӗсем, Сӗнтӗрвӑрри район администрацийӗн ӗҫченӗсем, Хуракасси ялӗнчи ҫынсем хутшӑннӑ, вилнисене асӑнса лартнӑ палӑк умне чечексем хунӑ.

Кӗркуннехи каникул вӗҫленсенех Хуракасси шкулӗнче вӗренекенсемпе МЧС ӗҫченӗсем тӗл пулӗҫ, «Асӑрханӑр – ҫулӑм!» темӑпа калаҫу ирттерӗҫ.

Алякинсем.

Патӑрьел районӗнчи Кивӗ Катек ялӗнче икӗ ачаллӑ хӗрарӑм пурӑнмалли вырӑнсӑр тӑрса юлнӑ. Алякинсен ҫурчӗ виҫӗ эрне каялла, юпа уйӑхӗн 11-мӗшӗнче, тӗпӗ-йӗрӗпе ҫунса кӗлленнӗ. Кун пирки «ПроГород Чебоксары» портал пӗлтерет.

Вут-ҫулӑм ҫӗрле алхаснӑ. Пушар хуралне ку хыпар ҫур ҫӗр иртни 2 сехет те 45 минутра ҫитнӗ. Вырӑна тухнӑ пушарнӑйсем темӗнле кӗрешсен те пурӑнмалли ҫурта упраса хӑварайман. Малтанлӑха пӗлтернӗ тӑрӑх, ҫурта ятарласа чӗртсе янӑ.

«Вӑрӑран юлать, пушар вара нимсӗр хӑварать», — тенӗ ваттисем. Галина Алякина тата унӑн ҫул ҫитмен икӗ хӗрӗ пурӑнмалли вырӑнсӑр кӑна мар, документсемсӗр те тӑрса юлнӑ. Вут-ҫулӑм вӗсене пӗр тумтирсӗр, техника-япаласӑр хӑварнӑ. Алякинсем хӑйсене ырӑ кӑмӑллӑ ҫынсем пулӑшасса чунран шанаҫҫӗ.

Вӑрнар районӗнчи Хорнсор Ҫармӑс ялӗнчи пӗр килте инкек пулнӑ. Ача шӑрпӑкпа вылянине пула, хуҫалӑхри хуралтӑ чутах ҫунса кӗлленмен.

Ҫак кунсенче 37 ҫулти кил хуҫи хӗрарӑмӗн иккӗмӗш классра вӗренекен хӗрачи килте пӗчченех пулнипе усӑ курса утӑ сарайӗнче шӑрпӑкпа вылянӑ. Кӗске вӑхӑтра сарайӗнчи утта ҫулӑм хыпса илнӗ. Вӑхӑтра ҫитнӗ пушарнӑйсем ҫулӑма пурӑнмалли ҫуртпа юнашарти сарай ҫине куҫма паман. Вут ҫулӑмра сарайӑн пӗр пайӗ ҫунса кӗлленнӗ. Телее, инкекре хӗрача суранланман.

Аса илтеретпӗр, ҫулталӑк пуҫланнӑранпа Республикӑра ачасен айкашӑвне пула 18 пушар тухнӑ. Чрезвычайлӑ лару тӑру министерствин ӗҫченӗсем ашшӗ-амӑшне, аслисене ачасене шӑрпӑкпа выляма юраманнине, вӑл пысӑк инкек патне илсе ҫитерме пултарнине ӑнлантарма ыйтаҫҫӗ. Ачасене килте аслисемсӗр хӑвармалла маррине, курӑнакан вырӑна шӑрпӑкпа ҫунтармалли япаласене хумалла маррине тепӗр хут асӑрхаттараҫҫӗ.

Ӗнер, юпа уйӑхӗн 16-мӗшӗнче, Муркаш районӗнчи Юнкӑпуҫ ялӗнче пуху иртнӗ. Унта пушар хӑрушсӑрлӑхӗпе, урамсене тирпейлессипе, правӑна пӑснипе кӗрешессипе, 0,6 га ҫӗре харпӑрлӑха парассипе, староста суйлассипе ҫыхӑннӑ ыйтусене сӳтсе явнӑ.

Юнкӑпуҫ ял тӑрӑхӗн пуҫлӑхӗ В.В. Фомин ял тӑрӑхӗнче ҫулталӑк пуҫланнӑранпа 1 пушар тата 1 хутчен тухнӑ. Иккӗшӗнче те пушар сӑлтавӗ — мунча.

Тавралӑха тирпейлесси калаҫнӑ май ял тӑрӑхӗн пуҫлӑхӗ Валерий Витальевич килти ҫӳп-ҫапа уйӑрса пухма сӗннӗ: полиэтилен, кантӑк, пластик, тимӗр. Йӑлари хытӑ каяша чӳк уйӑхӗнче турттарӗҫ. Раштав уйӑхӗнчен пуҫласа ака уйӑхӗччен ӑна турттармӗҫ. Вӑл вӑхӑтра ҫӳп-ҫапа килте пухса пырӗҫ.

Пухура ял старостине те суйлас ыйтӑва та пӑхса тухнӑ. Староста пулма ҫынсем П.А. Суворова суйланӑ.