Шупашкарта подъездра виҫӗ арҫын виллине тупнӑ. Вӗсем 30-32 ҫулсенче пулнӑ. Халӗ Следстви комитечӗ вӗсем мӗншӗн вилнине палӑртать.
Малтанлӑха пӗлтернӗ тӑрӑх, арҫынсем наркотике пула вилнӗ. Вӗсен организмӗ наркӑмӑшланнӑ. Арҫынсене пусмӑрласа вӗлернӗ йӗр ҫук. Тӗрӗслев ирттернӗ хыҫҫӑн йышӑну тӑвӗҫ.
Арҫынсене хулари хӑш районта тата хӑш урамра тупнине кӑтартман. Ҫакӑ паллӑ: вӗсене паян ирхине подъездра 1-мӗш тата 2-мӗш хутсен хушшинче тупнӑ.
Йӗрке хуралҫисем вӗсен аллине наркотик мӗнле майпа лекнине те уҫӑмлатма тивӗ.
Ака уйӑхӗн 12-мӗшӗнче ирхине Комсомольскинче канализаци ҫӑлкуҫӗнче ача виллине тупнӑ. Тӗрӗссипе, вӑл йӗркеллӗ пепке те пулса ҫитеймен. Специалистсем палӑртнӑ тӑрӑх, вӑл 24-25 эрнесенче ҫеҫ. Ҫапла пӗлтерет Следстви комитечӗ.
Ҫакӑ паллӑ: варта аталанса ҫитеймен ачана вӗлернӗ йӗрсем ҫук. Халӗ следовательсем ӗҫ-пуҫа уҫӑмлатаҫҫӗ, судпа медицина экспертизи ирттереҫҫӗ.
Тӗрӗслев ирттернӗ хыҫҫӑн тивӗҫлӗ йышӑну тӑвӗҫ.
Паян ирхине Шупашкарта нумай хваттерлӗ ҫурт балконӗнчен ҫамрӑк ҫын ӳкнӗ. Кун пирки «Про Город» хаҫата халӑх корреспонденчӗ пӗлтернӗ.
Ку инкек ирхи 6 сехетре 9-мӗш Пилӗкҫуллӑх проспектӗнчи 16/15-мӗш ҫуртра пулнӑ. Ҫамрӑк арҫын ӳксенех вилнӗ. Вырӑнта следовательсем ӗҫленӗ.
Арҫын 1995 ҫулта ҫуралнӑскер. Ҫынсем каланӑ тӑрӑх, вӑл коридорти балконран тухса ӳкнӗ. Следовательсем вӑл миҫемӗш хутран ӳкнине уҫӑмлатнӑ.
Паян 13 сехеторе Ҫӗнӗ Шупашкарта 15 ҫулти арҫын ача физультура урокӗ хыҫҫӑн вилнӗ. Кун пирки Следстви комитечӗ пӗлтерет.
Арҫын ача кадет лицейӗнче вӗреннӗ. Вӑл 2005 ҫулта ҫуралнӑскер пулнӑ. Малтанлӑха пӗлтернӗ тӑрӑх, ачан сывлӑх енчен кӑлтӑксем пулнӑ. Вӑл мӗншӗн вилнине судпа медицина экспертизи палӑртӗ. Следстви комитечӗ следстви умӗнхи тӗрӗслев ирттерет. Шкула следовательсем тата криминалистсем ҫитнӗ.
Вӗрентекенсен айӑпӗ пур-и? Ҫакна следстви палӑртӗ. Ҫавӑн пекех арҫын ача сывлӑхне пӑхса тӑнӑ поликлиникӑна тӗрӗслӗҫ.
Ака уйӑхӗн 5-мӗшӗнче кӑнтӑрла ҫынсем Шупашкарти «Лента» чарӑну патӗнчен иртсе пынӑ чухне арҫын хускалмасӑр выртнине асӑрханӑ. Патне пырса пӑхнӑ – вӑл сывламасть. Кун пирки «Про Город» хаҫата пӗлтернӗ.
Арҫын чарӑнуран инҫех мар тротуар ҫинче выртнӑ. Вӑл Шупашкарта пурӑннӑ, 44 ҫулта пулнӑ.
Следстви комитечӗн Чӑваш Енри следстви органӗсем ку тӗслӗх тӗлӗшпе следстви умӗнхи тӗрӗслев ирттереҫҫӗ. Арҫын мӗншӗн вилнине судпа медицина экспертизи тусан палӑртӗҫ. Ӑна пумӑрласа вӗлернӗ йӗрсем ҫук.
Ӗнер каҫхи 8 сехетре Сӗнтӗрвӑрринчи нумай хваттерлӗ ҫуртра пӗрремӗш хутра пушар тухнӑ. Подъездра тӗтӗм сарӑлнӑ, унта пурӑнакансене эвакуациленӗ. 8 ҫынна, ҫав шутра 1 ачана, ҫӑлавҫӑсем кӑларнӑ.
Ку инкек Курчатов урамӗнчи 13-мӗш ҫуртра пулнӑ. Пушара 15 минутран сӳнтернӗ. Ҫулӑм тухнӑ хваттерте сӗтел-пукан ҫунса кайнӑ, шалти отделка сиенленнӗ. Пушара сӳнтерсен кил хуҫи хӗрарӑмӗн 66 ҫулти ашшӗн виллине тупнӑ.
Аса илтерер: нумаях пулмасть Канашри Разин урамӗнчи 5 хутлӑ ҫурт тӑрри ҫуннӑ, Хӗрлӗ Чутайри Ҫӗнӗ урамра 3 пӳлӗмлӗ хваттерте пушар тухнӑ. Юлашки тӗслӗхре 1 ҫын вилнӗ.
Норвегин ҫӑлав ушкӑнӗ Eemslift Hendrika карап экипажне ҫӗр ҫине илсе ҫитернӗ. Ҫынсене ака уйӑхӗн 5-мӗшӗнчех ҫӑлма пуҫланӑ. Инкеке лекнӗ моряксем SOS сигнала Норвегин Олесунн хули ҫывӑхӗнче, ҫыранран 130 ҫухрӑмра пама тытӑннӑ.
Карапӑн моторӗ ӗҫлеме чарӑннӑ, таварӗсем вырӑнтан хускалнӑ, ун хыҫҫӑн вӑл самаях тайӑлнӑ. Ҫанталӑк алхаснине кура карапӑн тӳнсе йӑванас хӑрушлӑх сиксе тухнӑ.
Судно ҫинче пурӗ вуникӗ ҫын пулнӑ. Ытларах пайӗ вертолет вӗҫсе килнӗ хыҫҫӑн ҫӑлӑнма пултарнӑ. Экипажри тӑватӑ ҫыннӑн шыва сикме тивнӗ, пӗр матросӗ суранланнӑ. Ҫыранри хуралҫӑсенчен килнӗ информаци ҫине таянса Euronews хыпарланӑ тӑрӑх хальхи вӑхӑтра пур ҫынна та ҫӑлнӑ, вӗсен пурнӑҫӗ хӑрушлӑхра мар.
Дизтопливӑпа, нефьтпе тата вӑтам калӑплӑ катерсемпе тиенӗ карап унӑн экипажне ҫӑлнӑ хыҫҫӑн кӑнтӑралла куҫса пырать. Хальхи вӑхӑтра ӑна буксирсемпе туртса кӑларасси пирки пуҫ ватаҫҫӗ, мӗншӗн тесен унӑн тиевне кура карап путса ансан экологи тӗлӗшпе пысӑк пӑтӑрмах сиксе тухма пултарать.
Канашри нумай хваттерлӗ ҫуртра пушар тухнӑ хыҫҫӑн ытти ҫӗрти ҫуртсене те тӗрӗслӗҫ.
Асӑннӑ ҫуртра 2019 тата 2020 ҫулсенче юсав ирттернӗ, ҫивиттие те юсанӑ. Ҫав ҫивитти пӗр сехет ҫурӑра кӗлленнӗ. Виҫӗм ҫул унта инженери сечӗсене улӑштарнӑ, пӗлтӗр — ҫивиттие.
Юсав организацийӗ ҫутӑ пӑралукне епле ылмаштарнине, ҫивиттие вут-кӑвартан асӑрхамалли ӗҫе мӗнлерех пурнӑҫланине, епле материалпа усӑ курнине, технологие пӑхӑннине специалистсем ҫывӑх вӑхӑтра тӗрӗслӗҫ. Ҫак ӗҫе пурнӑҫлама республика Элтеперӗ Олег Николаев хушнӑ.
Канашри ҫав ҫурта тӗплӗн юсанӑ компани асӑннӑ хулари тата тепӗр 7 ҫуртра юсав ӗҫӗсем ирттернӗ, Тӑвайӗнче — 1 ҫуртра.
Хӗрлӗ Чутай районӗнче нумай хваттерлӗ ҫуртра пушар пулнӑ. Унта виҫӗ пӳлӗмлӗ хваттерте, тӗпелте, ҫулӑм тухнӑ.
Ҫурт Ҫӗнӗ урамра вырнаҫнӑ. Тӗтӗм вӑйлӑ тухнӑран ҫуртри 15 ҫынна эвакуациленӗ. Инкеклӗ лару-тӑру минитерстви пӗлтернӗ тӑрӑх, пушар тухнӑ вырӑнта ҫын виллине тупнӑ. Вӑл – 37 ҫулти арҫын, кил хуҫи хӗрарӑмӗн ывӑлӗ. Халӗ ҫулӑм мӗнле майпа тухнине тӗпчеҫҫӗ.
Палӑртмалла: ҫулталӑк пуҫланнӑранпа Чӑваш Енре 296 пушар тухнӑ. Вӗсенче 32 ҫын вилнӗ, 16 ҫын аманнӑ. 33 ҫынна ҫӑлма май килнӗ.
Вырсарникун, ака уйӑхӗн 4-мӗшӗнче, Шупашкарта 14-ри яш пурнӑҫӗ татӑлнӑ.
Усал хыпар пирки паян хула администрацийӗнче иртнӗ планеркӑра пӗрлехи диспетчер службин пуҫлӑхӗ Александр Малов пӗлтернӗ.
Пӑтӑрмах Шупашкарти «Хӗвеллӗ» микрорайонта пулса иртнӗ. Яш асӑннӑ тӑрӑхри Хӗвеллӗ бульварти 18-мӗш ҫуртран ӳкнӗ. Вӑл вилнӗ. Инкек сӑлтавне тӗпчевҫӗсем тӗпчеҫҫӗ.
Аса илтерер: пуш уйӑхӗн 18-мӗшӗнче Ҫӗнӗ Шупашкарта Винокуров урамӗнчи 99-мӗш ҫуртран 25-мӗш хутран сикни пирки Чӑваш халӑх сайчӗ пӗлтернӗччӗ. Телее, 11 ҫулти арҫын ача подъезд умӗнче ларакан ГАЗель ҫине ӳкнӗ. Ҫакӑ унӑн пурнӑҫне ҫӑлса хӑварма пулӑшнӑ. Ачана тӳрех пульницӑна илсе кайнӑ. Ӑна Шупашкарта, Республикӑри ача-пӑча клиника пульницинче, операци тунӑ. Тепӗр кунхине вӑл тӑна кӗнӗ, калаҫнӑ.
-5.7 °C