Аслӑ Ҫӗнтерӳ 71 ҫул тултарнӑ ятпа Шупашкарта велочупу йӗркелӗҫ. Унӑн маршручӗ паллӑ ӗнтӗ.
Велочупу ака уйӑхӗн 24-мӗшӗнче иртӗ. Ҫак кун велосезон официаллӑ мелпе уҫӑлӗ. Велосипедпа ярӑнма кӑмӑллакансем ирхи 10 сехетре Хӗрлӗ лапамра пухӑнӗҫ. Малтанах вӗсене номере палӑртнӑ наклейка парӗҫ.
Мероприяти 11 сехетре савӑнӑҫлӑ лару-тӑрура уҫӑлӗ. Унтан старт парӗҫ. Маршрут ҫапла пулӗ: Хӗрлӗ лапам — Президент бульварӗ — Мускав кӗперӗ — Мускав проспекчӗ — «Рашча» — Мускав проспекчӗ — Президент бульварӗ — Хӗрлӗ лапам.
Финишра вӗсене культура программи кӗтӗ. Ҫаван пекех парнесем выляттарӗҫ. Вӗсен йышӗнче велосипед та пулӗ.
Чӑваш Енӗн маттур пики Наталья Хлесткина йывӑр атлетика енӗпе иртнӗ Европа чемпионатӗнче ылтӑн медаль ҫӗнсе илнӗ.
Наталья ӑмӑртӑва Раҫҫейӗн пӗрлештернӗ командин йышӗнче хутшӑннӑ. Тупӑшӑвӑн виҫҫӗмӗш кунӗнче вӑл мала тухса пухмача ылтӑн медальпе пуянлатнӑ.
Чемпионат Норвегире иртнӗ. Наталья ӑмӑртура штангӑна пӗтӗмпе 222 килограмм ҫӗкленӗ. Вӑл 63 килограмм тайман виҫе категорийӗнче вӑй виҫнӗ.
Наталья ӑмӑртура, паллах, кӑштах пӑлханнӑ. Анчах хӑйне алла илме пултарнӑ вӑл. Малтанах вӑл Раҫҫейри тепӗр спортсменкӑна 1 килограмм ҫеҫ выляса янӑ. Анчах пирӗн ентеш пӗтӗм вӑйне пухса штангӑна ҫӗкленӗ те выляса илнӗ.
Шупашкар районӗнчи Янӑш ял тӑрӑхӗнче физкультурӑпа спорт ӗҫне пуринчен лайӑх йӗркеленӗ. Кун пек пӗтӗмлетӳ патне иртнӗ ҫулхи ӗҫ-хӗле тишкернӗ хыҫҫӑн ҫитсе тухнӑ.
Спортпа физкультура енӗпе районта еплерех тӑрӑшнине тишкерме ӗнер, ака уйӑхӗн 14-мӗшӗнче, Кӳкеҫри «Улӑп» центра пуҫтарӑннӑ. Унта спорт ветеранӗсем, хальхи вӑхӑтра спортра хастаррисем, физкультура учителӗсем, тренер-преподавательсем, ял тӑрӑхӗсен пуҫлӑхӗсем пухӑннӑ.
Янӑш ял тӑрӑхне физкультурӑпа спорт енӗпе хастар ӗҫленӗшӗн, ку енӗпе районти смотр-конкурсра мала тухнӑшӑн спорт тумтирӗ туянма 10 пин тенкӗлӗх сертификат тыттарнӑ.
Мероприятие республика шайӗнчи тӳре-шара та пырса ҫитнӗ: Чӑваш Енӗн информаци политикин министрӗ Александр Иванов, Конкурентлӑ политика тата тариф службин ертӳҫи Альбина Егорова, Ачасен правине хӳтӗлекен республикӑри уполномоченнӑй Вячеслав Рафинов. Вӗсем пурте — хӑй вӑхӑтӗнче Шупашкар районӗнче чылай ҫул ӗҫленӗскерсем.
Ӗнер эпӗ пӗрремӗш хут «Хӗвеллӗ кустӑрмасем» юхӑм йӗркеленӗ велочупӑва хутшӑнтӑм. Ялта пурӑннӑран хӗлле эп хамӑн икӗ урапаллӑ лашапа тухмастӑп — вӑл вӑхӑта ман велосипед сарайра ирттерет. Ҫавӑнпа пуль ӗнтӗ ӗнер тӳрех 84 ҫухрӑм парӑнтарма тивнӗрен мана кӑшт йывӑртарах килчӗ. Уйрӑмах Лапсарпа Шупашкар хушшинчи ҫула парӑнтарма ҫӑмӑл мар пулчӗ. Велоҫул юр айӗнче выртнӑран машшинсем ҫӳрекен ҫулпа кайма тиврӗ. Вырӑнӗ-вырӑнӗпе асфальт ҫул урапасем валли ҫеҫ ҫитнӗрен ҫул хӗррине тухмалла пулчӗ. Унта вара — пыльчӑк, велочипедӑн урапипе ҫунатти хушшине тулса лартнӑран пӗр вӑхӑт ман ӑна хӑйне тӗксе ҫеҫ мар, сӗтӗрсе пыма тиврӗ. Ҫӗнӗ Шупашкара ҫитнӗ тӗле темиҫе кун маларах ҫуса тасатнӑ велосипед пыльчӑкланса пӗтрӗ. Ҫавах та халь те урасем ыратаҫҫӗ пулин те велочупу ман кӑмӑла кайрӗ. Май тупсан тепре те кайса килес шутлӑ.
Шуршӑла ҫитсен «Хӗвеллӗ кустӑрмасем» юхӑмӑн ертӳҫипе Вячеслав Платоновпа калаҫса илтӗм.
— Паянхи велочупӑва миҫе ҫын хутшӑнчӗ?
— Эпӗ хыҫалта пынӑ май шутласа пытӑм. Пӗр 60 ҫын майлӑ пулчӗ.
Чӑваш Енре спорта аталантарассишӗн нумай тӑрӑшаҫҫӗ. Тӗрлӗ мероприяти йӗркелеҫҫӗ, спорт комплексӗсем ҫӗклеҫҫӗ, спортзалсене ҫӗнетеҫҫӗ…
Федераци хыснинчен Чӑваш Ен валли 17,942 миллион тенкӗ уйӑрса панӑ. Ӑна «Раҫҫей Федерацийӗнче 2016-2020 ҫулсенче вӑй-хал культурине тата спорта аталантарасси» тӗллевлӗ программӑпа килӗшӳллӗн уйӑрнӑ.
Федераци хыснинчен килнӗ укҫа-тенкӗпе спорт хатӗр-хӗтӗрӗ туянӗҫ, вӗсем ачасемпе ҫамрӑксен спорт шкулӗсемпе училищӗсем валли пулӗ.
Раҫҫейре ку тӗллевпе хыснаран пӗтӗмпе 505 миллион тенкӗ уйӑрнӑ. Ӑна 36 регион хушшинче пайлӗҫ
Лана Прусакова – маттур спортсменка. Ҫакна унӑн ҫитӗнӗвӗсем те ҫирӗплетеҫҫӗ.
Пирӗн ентеш черетлӗ ҫитӗнӳ палӑрнӑ. Слоуп-стайл дисциплинӑра вӑл чи лайӑххи пулнӑ. Раҫҫейӗн пӗрлештернӗ командинче вӑл чи ҫамрӑкки пулнӑ. 15 ҫултискер Олимп резервӗсен Ҫӗнӗ Шупашкарти училищинче ӑсталӑхне туптать.
Лана пур тапхӑрта та палӑрнӑ, чи нумай балл пухнӑ. Вӑл 500 очко пухнӑ. Ӑмӑртӑвӑн кашни тапхӑрӗнче Лана 100 очко ҫӗнсе илнӗ.
Слоуп-стайл дициплинӑра Красноярск крайӗнчи Анастасия Пашинова иккӗмӗш вырӑн йышӑннӑ. Виҫҫӗмӗшне вара Челипе облаҫӗнчи Елизавета Чеснокова тивӗҫнӗ.
Чӑваш Ен спортсменӗсем ҫитӗнӳ хыҫҫӑн ҫитӗнӳ тӑваҫҫӗ. Чӑваш гимнасчӗ ав ӑмӑртуран ылтӑн медальпе таврӑннӑ.
ЧР влаҫӗсен официаллӑ порталӗнче пӗлтернӗ тӑрӑх, спорт гимнастики енӗпе Раҫҫей ӑмӑртӑвӗ пушӑн 30-мӗшӗнче пуҫланнӑ та паян вӗҫленнӗ. Вӑл Пенза хулинче иртнӗ. Унти пӗтӗмлетӳсемпе килӗшӳллӗн 2016 ҫулта иртекен ҫуллахи Олимп вӑййисен командине йӗркелӗҫ.
Команда турнирӗнче арҫынсен хушшинче Атӑлҫи федераци округӗнчи гимнастсем ытларах балл пухнӑ. Команда йышӗнче пирӗн ентеш Владислав Поляшов та пулнӑ. Иккӗмӗш вырӑна Ҫӗпӗр федераци округӗн спортсменӗсем тухнӑ, виҫҫӗмӗшне — Мускав хулин гимнасчӗсем.
Ҫак кунсенче Сургут хулинче ҫамрӑксем хушшинче, 1994–1997 ҫулсенче ҫуралнисен йышӗнче, кире пуканне йӑтас енӗпе Раҫҫей ӑмӑртӑвӗ иртнӗ.
Тӳрех палӑртар: пирӗн спортсменсем унта виҫӗ ылтӑн медаль ҫӗнсе илнӗ. Ӑмӑртӑва Раҫҫейри 26 регионти 180 яхӑн спортсмен ҫитнӗ. Чӑваш Ен чысне ЧР тава тивӗҫлӗ тренерӗ Борис Глинкин патӗнче ӑсталӑхне туптакан тӑватӑ спортсмен хӳтӗленӗ.
68 килограмм тайман виҫе категорийӗнче Александрова Анастасия 123 хут ҫӗклесе ылтӑн медале тивӗҫнӗ. Павлов Александрпа Иванов Алексей та кире пуканне пуринчен ытларах йӑтса малти вырӑна йышӑннӑ.
Малинников Евгений икӗ енлӗ кӗрешӳре 100 очко пухнӑ, РФ спорт мастерӗн нормативне пурнӑҫланӑ.
Ханты-Мансире биатлон енӗпе Раҫҫей чемпионачӗ иртет. Унта Чӑваш Енри виҫӗ спортсмен хутшӑнать.
Атӑлҫи федераци округӗн пӗрлештернӗ командине Татьяна Акимова, Светлана Бочкарева, Валентина Телицина тата Ульяна Кайшева кӗме пултарнӑ. Чӑваш спортсменки Татьяна Акимова эстафета чупӑвне хутшӑнса ылтӑн медале тивӗҫнӗ.
Эстафетӑна 15 команда хутшӑннӑ. Атӑлҫи федераци округӗн пӗрлештернӗ команди чи маттурри пулнӑ, финиша пӗрремӗш ҫитнӗ. Кӗмӗл медале Новосибирск облаҫӗнчи спортсменсем йышӑннӑ. Тӗмен облаҫӗн команди вара виҫҫӗмӗш пулнӑ.
Ӑмӑртӑва Чӑваш Енри биатлон шкулӗнче вӗренекен Павел Магазеев, Вячеслав Акимов тата Евгений Петров та хутшӑнаҫҫӗ.
Чӑваш Енӗн колонийӗсенче айӑплава ирттерекенсем Америкӑри Пӗрлешӳллӗ Штатсенчи Чикагори тӗрмере ларакансемпе шахматла выляссипе тупӑшӗҫ.
Пуҫа ватмалли вӑйӑ турнирӗ ака уйӑхӗн 1-мӗшӗнче иртмелле. Унта Питӗрти, Ленинград, Белгород, Аҫтӑрхан, Челепи, Чулхула облаҫӗсенчи тата Чӑваш Енри колонисенчисем хутшӑнӗҫ. Шахмат ӑмӑртӑвне видеоҫыхӑну мелӗпе йӗркелӗҫ.
Раҫҫей тата ют ҫӗршыв тӗрмисенче ларакансем хушшинче шахмат турнирне унччен те йӗркеленӗ. Кӗркунне Швейцарири тӗрмерисемпе вылӗҫ.
Айӑпланнисен хушшинчи ҫак тупӑшӑва шахмат енӗпе темиҫе хутчен те тӗнче чемпионӗ пулса тӑнӑ Анатолий Карпов пуҫарнӑ.
Асӑннӑ службӑн Чӑваш Енри управленийӗн пресс-службин пуҫлӑхӗ Сергей Герасимов пӗлтернӗ тӑрӑх, хальхи шахмат турнирне юсанмалли 1-мӗш колонире ларакан ҫын хутшӑнмалла.
+20.3 °C