Шупашкарта пурӑнакан 17 ҫулти икӗ хӗре спайс сутнӑшӑн айӑпласшӑн. Вӗсем ӑна пысӑк виҫепе сутма тӑнӑ.
Следстви версийӗ тӑрӑх, 2019 ҫулхи юпа уйӑхӗн 14-мӗшӗнче ҫак хӗрсем Шупашкар хӗрринче 10 пӗчӗк хутаҫа тултарнӑ спайс илнӗ. Пӗтӗмпе – 6 грамм. Наркотике унта вӗсен сообщникӗсем хунӑ. Вӗсемпе хӗрсем электронлӑ майпа ҫырӑннӑ.
Шкул ачисене ҫав кунах полицейскисем тытса чарнӑ. Пакунлисем спайса туртса илнӗ. Хӗрсем тӗлӗшпе пуҫиле ӗҫ пуҫарнӑ. Кӗҫех ӑна Шупашкарти Мускав районӗн судне пӑхса тухма ярса парӗҫ.
Кӑрлач уйӑхӗн 21-мӗшӗнче Олег Ладыков тӗлӗшпе суд пулнӑ. Муркаш районӗн сучӗ ӑна 3 ҫул та 9 уйӑхлӑха колоние ӑсатма, 600 пин тенкӗ штраф тӳлеттерме йышӑннӑ.
Анчах Олег Ладыковӑн хӳтӗлевҫи приговорпа килӗшмен, вӗсем ЧР Аслӑ судне аппеляци панӑ. Хальлӗхе суд ларӑвӗ хӑҫан пуласси паллӑ мар.
Аса илтерер: следстви версийӗ тӑрӑх, 20 ҫулти Олег Ладыков айӑпӗпе пула 2019 ҫулхи утӑ уйӑхӗн 22-мӗшӗнче авари пулнӑ, УАЗри ҫын суранланнӑ. Сити-менеджерӑн ывӑлӗ хӑйӗн айӑпне йышӑнмасть.
Кунсӑр пуҫне ӑна унччен полицейские хӗненӗшӗн тӗрмене хупмасӑр айӑпланӑ. Айӑплав вӑхӑтӗнче йӗркене пӑхӑнманшӑн колоние ямалли срокпа улӑштарнӑ. Ҫапла майпа пӗтӗмпе Олег Ладыкова 3 ҫул та 9 уйӑхлӑха хупма йышӑннӑ.
Паян Шупашкарти Ленин районӗн прокуратури ЧР экономика министрӗ пулнӑ Владимир Аврелькин тӗлӗшпе приговор вуланӑ. Унпа пӗрле пӗр шухӑшлӑ пулнӑ Сергей Анисимов («Тасатакан биологи сооруженийӗн» экс-директорӗ) тата «Ордер» тулли мар яваплӑ общество директорӗ Ольга Филиппова та суд сакки ҫине ларнӑ.
Судья Владимир Аврелькина пӗтӗмӗшле режимлӑ колоние 4,5 ҫуллӑха яма йышӑннӑ. Унӑн кунсӑр пуҫне 3 ҫул патшалӑх тата муниципалитет службинче должноҫ йышӑнма юрамӗ. Анисимовпа Филипповӑна пӗтӗмӗшле режимлӑ колоние 3,5 ҫуллӑха ӑсатнӑ.
Палӑртмалла: прокурор Аврелькина колоние 6,5 ҫуллӑха ӑсатма, 500 пин тенкелӗх штрафлама ыйтнӑ.
Раҫҫейри макарон туса кӑларакан «Макфа» компани Шупашкарти компанирен 10 миллион тенкӗ шыраса илесшӗн. «Коммерсантъ» пӗлтернӗ тӑрӑх, пысӑк производитель пирӗн патри компание пӗр пекрех тавар паллипе усӑ курнӑшӑн суда панӑ.
Шупашкарти компани «Вакма» ятлӑ. Вӑл ҫак ятпах макарон туса кӑларать. Ячӗ «Макфа» пекрех. Ҫитменнине, хутаҫӗ те «Макфӑнни» пек симӗс тӗслӗ.
Ҫакӑншӑн Мускаври компани Шупашкарти фирмӑна ку ятпа макарон кӑларттарма чарасшӑн. Вӗсем палӑртнӑ тӑрӑх, ку автор правине пӑсни. Суд ларӑвӗ кӗҫех, пуш уйӑхӗн 5-мӗшӗнче, иртмелле.
Нарӑс уйӑхӗн 12-мӗшӗнче Арбитраж сучӗ «Чӑваш пичечӗ» акционерсен уҫӑ обществи тӗлӗшпе тӑратнӑ тавӑҫа пӑхса тухнӑ. Суд пӗтӗмлетӗвӗ ҫапларах: организаци – панкрут. Ҫавна май ултӑ уйӑхлӑха конкурс производстви уҫнӑ.
Арбитраж судне Федераци налук службин Чӑваш Енри управленийӗ Арбитраж судне 2018 ҫулхи ҫурла уйӑхӗнче тавӑҫ тӑратнӑ, «Чӑваш пичетне» панкрута кӑларма ыйтнӑ. Тавӑҫ требованийӗсен сумми 2 168 296,43 тенкӗпе танлашнӑ.
Халӗ Арбитраж сучӗ конкурс управляющине палӑртнӑ, унчченхи ертӳҫе ӗҫрен сирнӗ. Сӑмах май, пӗлтӗр Арбитраж сучӗ «Ҫырӑнтару Чӑваш пичечӗ» тулли мар яваплӑ обществӑна панкрут тесе йышӑннӑ, кредиторсен умӗнче 2 миллион ытла тенкӗ парӑм пулнӑ.
Вӑрнар поселокӗнчи Дача урамӗ пӗлтӗрхи юпа уйӑхӗнченпе шывсӑр пурӑннӑ. Асӑннӑ уйӑхӑн 29-мӗшӗнче унта шыв пӑрӑхӗ ҫурӑлса кайнӑ. Вӑхӑт самай иртсен те яваплисем кӑлтӑка пӗтерме васкаман. Шыв пӑрӑхне хупса хунӑ та — ӗҫӗ-пуҫӗ пӗтнӗ. Ҫав урамра вара нумай ачалисен ҫӗр лаптӑкӗсем пулнӑ. Вӗсене ҫӗре ҫурт тума уйӑрса панӑ.
Шывсӑр пурӑнса ывӑннӑ ҫынсем тӗнче тетелӗнчи халӑх ушкӑнӗсенче ҫырма пуҫланӑ, прокуратурӑна ҫитнӗ.
Ҫынсен интересне хӳтӗлесе прокуратура суда ҫитнӗ. Суд Вӑрнар район администрацине Дача урамне шывпа тивӗҫтермелле тесе йышӑну кӑларнӑ. Вӑл хальлӗхе саккунлӑ вӑя кӗреймен-ха. Апла пулин те вырӑнти ҫынсем ку хыпаршӑн савӑннӑ, лав вырӑнтан хускаласса вӗсем халӗ тем пекех шанаҫҫӗ.
Патшалӑх айӑплавҫи вице-премьер пулнӑ Владимир Аврелькина пӗтӗмӗшле режимлӑ колоние 6,5 ҫуллӑха яма ыйтать. Кунсӑр пуҫне ӑна патшалӑх тата муниципалитет службин должноҫӗсене 3 ҫул йышӑнма чарасшӑн.
Ку кӑна мар, патшалӑх айӑплавҫи Аврелькина класс чинӗнчен (вӑл 2-мӗш класри патшалӑх канашҫи) хӑтарма, «Чӑваш Республики умӗнчи тава тивӗҫлӗ ӗҫсемшӗн» медальсемпе орденсене туртса илме ыйтать.
Айӑплавҫӑсен версийӗ тӑрӑх, Владимир Аврелькин икӗ коммерци организацине оборудовани туяннӑ такакӑн пӗр пайне саплаштарма саккуна пӑсса субсиди панӑ. Ҫапла майпа вӑл ӗҫ вырӑнӗпе усӑ курса ҫак коммерци организацийӗсене ытти фирма умӗнче «мала хунӑ». Тӑкак 23,8 миллион тенкӗпе танлашнӑ. Следстви вӑхӑтӗнче В.Аврелькин ӑна саплаштарнӑ.
52 ҫулти водитель пӗр кунхине Кӳкеҫре машинӑпа пынӑ, анчах хӑйӗн ҫумӗнче документсем пулман. Шӑпах ҫавӑн чухне ӑна ҫул-йӗрпе патруль службин инспекторӗсем чарнӑ.
Водитель саккунпа килӗшӳллӗн штраф тӳлесшӗн пулман – инспектора сӗтев сӗннӗ. Хайхискер патруль машинин панелӗ ҫине 500 тенкӗ хунӑ. Анчах ҫакӑ мӗнпе вӗҫленессине арҫын чухламан пуль - ку суда илсе ҫитернӗ.
52 ҫулти арҫын тӗлӗшпе пуҫиле ӗҫ пуҫарнӑ. Унӑн сӗтев панӑшӑн судра явап тытма тивӗ.
Пӑрачкав районӗн прокуратури тӑхӑр йывӑҫ каснӑ арҫын тӗлӗшпе пуҫиле ӗҫ пуҫарнӑ. 30 ҫулти арҫыннӑн судра явап тытма тивӗ.
Ҫакскер саккуна пӑсса йывӑҫсем каснӑ – 9-шне йӑвантарнӑ. Ҫапла майпа вӑл патшалӑха 41 пин тенкӗлӗх тӑкак кӳнӗ.
Следстви вӑхӑтӗнче арҫын хӑйӗн айӑпне йышӑннӑ, патшалӑха кӳнӗ тӑкака саплаштарнӑ. Ун тӗлӗшпе пуҫарнӑ пуҫиле ӗҫе миравай судьяна пӑхса тухма панӑ.
Палӑртмалла: кунашкал статьяпа айӑпланакансене ирӗксӗр 2 ҫул таран та хӑварма пултараҫҫӗ.
Пӗлтӗр «Чӑвашкредитпромбанк» вкладчикӗсемпе тӗл пулнӑ чухне ЧР премьер-министрӗ Иван Моторин Патшалӑх Канашӗн депутатне Сергей Семенова «упырь» тесе каланӑ. Кун хыҫҫӑн Сергей Семенов Иван Моторин тӗлӗшпе заявлени ҫырнӑ.
Тӗрӗслев тата лингвистика экспертизи ирттернӗ хыҫҫӑн административлӑ йӗркене пӑснӑшӑн Моторин тӗлӗшпе ӗҫ пуҫарнӑ. Ӑна Шупашкарти Ленин районӗн 1-мӗш суд участокӗн миравай судйине пӑхса тухма ярса панӑ.
Палӑртмалла: ҫынна сӑмахпа кӳрентернӗшӗн должноҫри ҫынсене 30-50 пин тенкӗ штраф тӳлеттерме пултараҫҫӗ.
+34.3 °C