Ҫӗнӗ Шупашкарти 1-мӗш спорт шкулӗнче вӗренекен Андрей Львов спорт туризмӗ енӗпе тӗнче чемпионӗ ята тивӗҫнӗ.
Андрей Львов — Раҫсейӗн спорт мастерӗ. Вӑл «эстафета» дистанцире чи маттурри пулнӑ.
Спорт туризмӗ енӗпе тӗнче чемпионачӗ Узбекистанра иртнӗ. Пирӗн ҫӗршывӑн комнадинче 30 спорстмен пулнӑ. Раҫҫейӗн пӗрлештернӗ ушкӑнӗ пӗтӗмӗшле команда зачётӗнче мала тухнӑ.
Чӑваш Ен модульлӗ хӑна ҫурчӗсем тӑвассине эпир унччен пӗлтернӗччӗ-ха. Ҫавна валли федераци хыснинчен пирӗн республикӑна тата 130 миллиона яхӑн тенкӗ килӗ. Маларах Чӑваш Ене 178,5 миллион тенкӗ килсе ҫитнӗ.
Модульлӗ отельсем тума ҫӗршыври 58 региона 2023-2024 ҫулсенче 10 миллиард тенкӗ укҫа уйӑрса парӗҫ. Ҫав шутран 130 миллионӗ пирӗн республикӑна лекӗ: 46,4 миллионне кӑҫалах парӗҫ, 83,4 миллионне — килес ҫул.
Эпир маларах асӑнса хӑварнӑ 178,5 миллион тенкӗпе Канаш районӗнче «Малинка 7/12» комплекс хута яма палӑртнӑ. Унта йывӑҫ ҫинче пӗчӗк пӳртсем тӑвасшӑн.
Чӑваш Ене Германири пенсионер велосипедпа килсе ҫитнӗ.
74 ҫулти Альфред Мэр велосипедпа тӗнче тӑрӑх пуҫласа 10 ҫул каялла, пенси ҫулне ҫитсен, тухса кайнӑ. Унччен арҫын шкулта ӗҫ тата физкультура учителӗ пулса ӗҫленӗ.
Велосипедпа Германи арҫынни Европӑри ҫӗршывсем тӑрӑх нумай ҫӳренӗ, Аляскӑра, Кӑнтӑр тата Ҫурҫӗр Америкӑсенче пулнӑ.
Ҫурла уйӑхӗнче арҫын Питӗре ҫитнӗ. Унтан Мускава, Чулхулана ҫул тытнӑ, «Ылтӑн ункӑ» туризм маршручӗпе ҫаврӑннӑ, Хусан хыҫҫӑн Шупашкара килнӗ. Тӑван тӑрӑхне вӑл Турци урлӑ каясшӑн.
«Кун пек уҫӑ кӑмӑллӑ ҫӗршыва курман эпӗ. Кунта хама килти пекех туятӑп темелле. Ҫынсем ырӑ кӑмӑллӑ, уҫӑ чунлӑ. Паянхи лару-тӑрура вӗсем ҫавӑн пек пулни мана тӗлӗнтерет», — тенӗ ҫулҫӳревҫӗ.
Чӑваш Енри йӑрӑ та вӑр-вар ҫынсем хӑвӑрт сӳтсе ҫӑмхаламалли хӑна ҫурчӗсем тумалли конкурса хутшӑнма пултарӗҫ.
Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, конкурса Раҫҫейӗн Экономика аталанӑвӗн министерстви ирттерет.
Глэмпинг, кэмпинг тата модульлӗ отельсем хӑпртса лартас ӗмӗтлисене ҫавӑн йышши хӑна ҫурчӗсен кӑшкарне туяннӑ тӑкакӑн 50 процентне патшалӑх хысна шучӗпе саплаштарӗ.
Чӑваш Енре тараватлӑх элчине (республикӑн влаҫ органӗсен официаллӑ порталӗнче амбассадор тенӗ) палӑртнӑ. Ҫав ҫын — Евгений Шуваев шеф-повар, фермер тата усламҫӑ.
Тараватлӑх элчисем ҫӗршывӑн 75 регионӗнче туризм пӗрлешӗвӗсене аталантарӗҫ.
Асӑннӑ хастарсен тӗллевӗ — туристсен шухӑш-кӑмӑлне улӑштарасси. Сӑмахран, хрантсуссен паштечӗ вырӑнне чӑвашсен ФуаГра паштечӗпе паллаштарасси, Крымри устрицӑпа Карелинчи форель ҫинчен каласа кӑтартасси...
Евгений Шуваев 15 ҫул каялла Чӑваш Енрен тухса кайса ҫӗршывӑн тӗрлӗ регионӗпе паллашнӑ, 2016 ҫулта тӑван тӑрӑха таврӑнса кунта туризма аталантарма тӗллев лартнӑ. Пӗлтӗр вӑл сысна ӗрчетме тытӑннӑ. Унран прошутто (итальянсен ветчини) тата лардо (итальянсем сысна ҫӑвӗнчен хатӗрлекен апат) хатӗрлет.
Чӑваш Енре Таджикистанри туристсене кӗреҫҫӗ. Нумаях пуомасть Душанбере пирӗн республика делегацийӗ пулнӑ. Вӗсем икӗ ен килӗштерсе ӗҫлес ыйтӑва сӳтсе явнӑ.
Пирӗн тӑрӑх медицина туризмӗпе усӑ курма сӗнет. Чӑваш Ене, сӑмахран, С.Н. Федоров академик ячӗллӗ куҫ микрохирургине килеҫҫӗ. Вӑл учреждени — Раҫҫейри еррсе пыракан офтальмологи центрӗсенчен пӗри.
Президент перинаталь центрӗнче ЭКО мелӗпе сипленеҫҫӗ. Унти тухтӑрсем ача-пӑчаллӑ пулайман ҫемьесене пулӑшаҫҫӗ.
Республикӑн стоматологи поликлиникинче CAD-CAM мелӗпе шӑл лартаҫҫӗ, нейромышца стоматологийӗпе усӑ кураҫҫӗ.
Чӑваш патшалӑх культурӑпа ӳнер институчӗ туризм енӗпе специалистсене вӗрентсе кӑларассине малалла аталантарса пырасшӑн. Ҫывӑх вӑхӑтра вӑл Раҫҫейӗн туризмпа сервис патшалӑх университечӗн ҫӗнӗ вӗрентӳ программисемпе усӑ курма пуҫлӗ.
Асӑннӑ университетӑн ректорӗ Александр Федулин тата проректорӗ Евгений Родионов Шупашкарта пулнӑ, килӗштерсе ӗҫлес ыйтусене сӳтсе явнӑ.
«Эпир бакалавриат тата вӑтам професси пӗлӗвӗ парасси пирки калаҫрӑмӑр. Ҫӗнӗ набора ҫитес вӗренӳ ҫулӗнчен уҫасшӑн», — пӗлтернӗ Александр Федулин.
Чӳк уйӑхӗн 25-мӗшӗнчен пуҫласа раштав уйӑхӗн 2-мӗшӗччен пирӗн республикӑра отрасльсем хушшинчи «Чувашия туристическая» (чӑв. Туризм Чӑваш Енӗ) пӗрремӗш форум иртӗ.
Унта вырӑнти хӑй тытӑмлӑх органӗсем хӑйсен маршручӗсемпе 9 лапамра паллаштарӗҫ: «Чӑваш Ен – реабилитаци центрӗ», «Нумай сӑнлӑ Чӑваш Ен», «Промышленность туризмӗ», «Чӑваш Ен ачасен куҫӗпе», «Туризм валли кадрсем», «Аслӑ Атӑл», «Хуласен туризм вӑй-халӗ», «Агротуризм» — «Ял туризмӗ» тата «Регионсенчи туризма аталантарма турист картти».
Ҫитес ҫул республикӑна ытларах ача курса ҫӳрӗ. Вырӑнти туроператорсем 3-4-мӗш классем валли туризм маршрутне хатӗрлеҫҫӗ.
ЧР экономика аталанӑвӗн министрӗн ҫумӗ Лариса Рафикова пӗлтернӗ тӑрӑх, автобуспа каймалли экскурси программи пулӗ. Ачасене кафере пӗр хутчен ҫитермелле, музея илсе каймалла. Интерактивлӑ пайӗ те пулӗ.
Самах май, Чӑваш Ен ача-пӑча туризмне аталантарас тӗлӗшпе сӑнав проектне хутшӑнать. Кӑҫал 5-9-мӗш классем республикӑна курса ҫӳреҫҫӗ. Ҫулталӑк вӗҫлениччен 3178 ача турҫулҫӳреве кайӗ.
Чӑваш Енри паллӑ вырӑнсемпе ачасемпе ҫамрӑксене паллаштармалли турсем ирттерме пуҫлассине эпир унччен пӗлтернӗччӗ-ха.
Иртнӗ канмалли кунсенче 5-9-мӗш классенче вӗренекен 90 ача Куславкка районӗнче пулнӑ. «Туризм тата хӑнасене йышӑнас индустри» проектпа килӗшӳллӗн йӗркеленӗ ҫулҫӳрев вӑхӑтӗнче ачасем Куславккара вырнаҫнӑ Николай Лобачевский математикӑн музей-ҫуртӗнче пулса курнӑ, тӗвӗсемпе тата понипе сӑн ӳкерӗннӗ, страуссене апатлантарнӑ.
Кайран вӗсем Сӑр тата Хусан хӳтӗлев чиккисене тунисен историйӗпе, тӗнчипе паллӑ Николай Бичурин пурнӑҫӗпе паллашнӑ.
+17.3 °C