Шупашкар арҫынни машинӑпа питӗ пысӑк хӑвӑртлӑхпа ҫӳреме юратнӑ. Куншӑн унӑн 200 ытла штраф пухӑннӑ. Пӗтӗмпе - 126 пин тенкӗлӗх.
Арҫынна штрафсене 5 кун хушшинче тӳлесе татмалли пирки асӑрхаттарнӑ. Ҫавӑн пекех ӑна Раҫҫейрен тухма чарассине, транспорт рулӗ умне лармалли ирӗке чикӗлессине каланӑ. Анчах арҫын хӑнк та туман. Вӑл каланӑ тӑрӑх, руль умӗнче урӑх ҫын ларнӑ.
Юлашкинчен приставсем машинӑна арестленӗ, ӑна сутма тӑратнӑ. Укҫипе вара штраф парамӗсене татнӑ.
Ҫак кунсенче ҫанталӑк шӑрӑх тӑрать. Кун пек чухне вӑрманта пушар тухас хӑрушлӑх питех те пысӑк. Ҫавна май вӑрмансене кӗме чараҫҫӗ.
Иртнӗ эрнере Чӑваш Енри вӑрмансенче канма пуҫтарӑннӑ ҫынсене 40-шер пин тенкӗ штраф ҫырса панӑ. Вӗсем палатка лартсах, кӑвайт чӗртсех вӑрманта канас тенӗ. Пушарпа кӗрешмелли ятарлӑ режим вӑхӑтӗнче вара вӑрманта кӑвайт чӗртме юрамасть. Мангалпа та усӑ курма юрамасть. Асӑннӑ режима пирӗн тӑрӑхра ака уйӑхӗн 10-мӗшӗнчех йышӑннӑ.
Йӗркене пӑсакан уйрӑм ҫынсене 40-50 пин тенкӗ чухлӗ штрафлаҫҫӗ, должноҫри ҫынсене — 60-90 пин тенкӗ, организацисене — 600 пинрен пуҫласа 1 миллион тенкӗ таран.
Вӑрманта пушар курсан 8 (8352) 40-24-00 диспетчер службине е Вӑрман хуралне 8-800-100-94-00 телефон номерӗсемпе пӗлтермелле.
Шупашкар районӗнчи пӗр ял тӑрӑхӗн пуҫлӑхӗ ӗҫ машинипе харпӑр хӑйӗн тӗллевӗпе усӑ курнӑ. Ҫакна прокуратура тӗрӗслев ирттерсен тупса палӑртнӑ.
Йӗркене пӑснӑ пуҫлӑх тӗлӗшпе административлӑ ӗҫ пуҫарнӑ. Ӑна штраф тӳлеттернӗ. Сӑмах май, куншӑн нумайран та 500 пин тенкӗх штраф хураҫҫӗ. Текех унашкалли ан пултӑр тесе Шупашкар район администрацийӗн пуҫлӑхӗ тӗлӗшпе те представлени ҫырнӑ.
Паянтан республикӑра пушарпа кӗрешмелли уйрӑм режим пуҫланнӑ. Вӑл ятарлӑ хушу тухиччен вӑйра пулӗ.
Паянтан вӑрманта тата ун ҫывӑхӗнче кӑвайт чӗртме, ҫӳп-ҫап ҫунтарма юрамасть. Ҫавӑн пекех вӑрман, ял хуҫалӑх пӗлтерӗшлӗ ҫӗрсен ҫывӑхӗнче типӗ курӑк ҫунтарнишӗн явап тытма тивӗ.
Куншӑн ахаль ҫынсене - 20 пин таран, должноҫри ҫынсене - 60 пин таран, организацисене 800 пин таран штраф тӳлеттерме пултараҫҫӗ.
Ыран иртекен Патшалӑх Канашӗн сессийӗнче самакун сутакансене ҫирӗпрех явап тыттарас ыйтӑва пӑхса тухӗҫ. Ӑнлантару ҫырӑвӗнче палӑртнӑ тӑрӑх, РФ КоАПӗн 14.17.1-мӗш статйи алкоголь тата спирт пур апат-ҫимӗҫ продукцине кӑна пырса тивет. Ку статьяна пӑссан 30-50 пин тенкӗ штраф тӳлеттереҫҫӗ. Анчах штраф хурас тесен 30 пин тенке яхӑн тӑракан экспертиза тумалла.
Хальхи вӑхӑтра сӑмакун сутнӑшӑн 15-2 пин тенкӗ штраф тӳлеттереҫҫӗ. Депутасем вара спиртлӑ апат-ҫимӗҫшӗн кӑна мар, сӑмакун сутнӑшӑн та РФ КоАПӗн 14.17.1-мӗш статйипе килӗшӳллӗн штраф тӳлеттермелле тӑвасшӑн.
Шупашкарта пурӑнакан хӗрарӑм кӳршисене сӑмахпа хӑртнӑшӑн судра явап тытнӑ. Ӑна административлӑ майпа айӑпланӑ.
Ҫакӑ паллӑ: пӗлтӗрхи ҫурла, авӑн тата юпа уйӑхӗсенче 47 ҫулти хӗрарӑм аппӑшӗпе йӑмӑкне, 27-ри тата 30-ти хӗрарӑмсене, подъездра пӗрре мар сӑмахпа кӳрентернӗ. Лешсем ҫакна видео ӳкернӗ.
Судра 47-ри хӗрарӑм айӑпне йышӑннӑ. Ӑна 3 пин тенкӗлӗх штраф тӳлеттерме палӑртнӑ.
Шупашкарта пурӑнакан 36 ҫулти арҫын ывӑлӗн класс ертӳҫине сӑмахпа хӑртса пӗтернӗ. Куншӑн ун судра явап тытма тивнӗ.
Прокуратура пӗлтернӗ тӑрӑх, ывӑлӗ 9-мӗш класра вӗренет. Авӑн уйӑхӗнче шкул ачисем хирӗҫсе кайнӑ. Кун хыҫҫӑн пӗрин ашшӗ вӗрентекен патне шӑнкӑравланӑ. Ун чухне вӑл 30 ҫул ӗҫлекен педагога ят-сумне, чысне пӗтерекен сӑмахсем каласа пӗтернӗ. Ку сӑмахсене класри ытти ача та илтнӗ.
Арҫынна куншӑн 3500 тенкӗлӗх штрафланӑ. Суд йышӑнӑвӗ вӑя кӗмен-ха.
Патӑрьелти ачасемпе спорт шкулӗн директорне 120 пин тенкӗлӗх штрафлама йышӑннӑ.
Следстви тата суд палӑртнӑ тӑрӑх, 2020 ҫулхи пуш-ака уйӑхӗсенче хӑйӗн машинине служба транспорчӗ валли уйӑрнӑ бензина янӑ. Ҫапла вӑл 425 литр бензин тӑкакланӑ. Патӑрьел районӗн администрацине пӗтӗмпе 17,5 пин тенкӗлӗх. Ҫав ҫулах кӗркунне директор ӑмӑртӑва хутшӑнакансене апатлантарма укҫа кирлӗ тесе ӗҫтешне каланӑ. Документсене хӑех хатӗрленӗ, алӑ пуснӑ - лешсем укҫа илнӗ имӗш. Чӑннипе вара илмен. Директор укҫана хӑйӗн тӗллевӗпе усӑ курнӑ.
Суд приставӗсен федераллӑ службин Чӑваш Республикинчи управленийӗ хыпарланӑ тӑрӑх иртнӗ уйӑхра республикӑра 85 автомобиле арестленӗ.
Ҫак ӗҫе суд приставӗсем ҪҪХПИ ӗҫченӗсемпе пӗрле йӗркеленӗ. Машшинсене республикӑн тӗп ҫулӗсем ҫинче те тытса чараҫҫӗ, ял-хуласенче те. Вӗсене тӗрлӗ штрафсене тӳлесе татманшӑн арестлеҫҫӗ.
Сӑмахран, ведомство каласа панӑ тӑрӑх, нумай пулмасть Шупашкар районӗнче пӗр водителе тытса чарнӑ. Ун тӗлӗшпе 76 штраф ҫырса панӑ иккен, анчах 1976 ҫулта ҫуралнӑ арҫын вӗсене тӳлемен. Мӗнпурӗ 105 пин пухӑнса кайнӑ. Ҫав шутра штрафа шыраса илес ӗҫшӗн тӳлесси те. Тепри, 1997 ҫулта ҫуралнӑскер, 26 штрафа тӳлесе татман.
Приставсем водительсене штрафа тӳлесе татма ыйтнӑ, анчах лешсем хирӗҫ пулнӑ. Ҫавна пула транспорта штрафстоянкӑна илсе кайма тивнӗ. 10 кун хушшинче штрафсене тӳлесе татмасан вӗсен машшинисене сутса штрафсене шыраса илме ирӗк пур.
Муркаш районӗнчи Ярапайкасси ял тӑрӑхӗн администрацийӗнче ӗҫлекен хӗрарӑма суд тунӑ. Вӑл ӗҫ вырӑнӗпе усӑ курнӑ. Ӑна 50 пин тенкӗлӗх штрафланӑ.
2020 ҫулхи чӳк уйӑхӗнче вӑл ял тӑрӑхӗн пуҫлӑхӗн тивӗҫӗсене пурнӑҫланӑ. Ун чухне вӑл палӑка юсама тата Иштерек ялӗн хапхине ҫӗнетме строительство организацийӗпе килӗшӳ алӑ пуснӑ. Тепӗртакран вӑл ӗҫе йышӑнни пирки акт алӑ пуснӑ. Хӑй вара ӗҫсене вӗҫлеменнине пӗлсех тӑнӑ. Ҫапла организацие 88 пин тенкӗ куҫнӑ. Ку ял тӑрӑхӗн администрацине ҫавӑн чухлӗ тӑкак кӳнӗ.
+8.3 °C