Чӑваш Енри паллӑ та сумлӑ тележурналиста, сценариста, поэта, драматурга, Марина Карягинӑна Чӑваш автономи облаҫне йӗркеленӗренпе 100 ҫул ҫитнине халалласа кӑларнӑ медальпе чыслама йышӑннӑ. Хушӑва республика Элтеперӗ Олег Николаев юпа уйӑхӗн 20-мӗшӗнче алӑ пуснӑ.
Марина Карягинӑна наградӑлама тӑратас тесен пӗри, ҫӳллӗ шайра витӗм кӳме пултаракан ҫын, ҫавна хирӗҫ пулнине Фейсбукра пӗр вӑхӑтра хытах сӳтсе явнӑччӗ.
Ҫак йӗркесен авторне Чӑваш халӑх сайчӗн редакторӗ Николай Плотников пӗлтернӗ тӑрӑх, Марина Карягина хӑй хирӗҫ пулсан та ун пултарулӑхне, тӳрӗ чунлӑхне хаклакансем ҫине тӑнӑ. Кирлӗ хутсене Чӑваш Енри Таврапӗлӳҫӗсен пӗрлешӗвӗ урлӑ ятарласа хатӗрленӗ.
Чӑваш таврапӗлӳҫисен пӗрлешӗвӗн хисеплӗ председателӗ Виталий Станьял республика Элтеперӗ Олег Николаев патне шӑрҫаланӑ. Вӑл Марина Карягинӑн «республикӑшӑн тунӑ ӗҫӗсем халӑх умӗнче сумлӑ та курӑмлине, вӑл талантлине, хӑшӗ-пӗрисем пек вылянса ҫӳренине йышӑнманнине» палӑртнӑ.
Паян Чӑваш Ен Элтеперӗ Олег Николаев Раҫҫей Президенчӗн Чӑваш Республикинчи йышӑну пӳлӗмӗнче ҫынсене харпӑр хӑй ыйтӑвӗсемпе йышӑннӑ. Ку хутӗнче сакӑр ҫын хӑйсене кӑсӑклантаракан ыйтусемпе пырса ҫитнӗ.
Етӗрне тӑрӑхӗнчен килсе ҫитнӗ Владимир Веселов ялти халӑхӑн пӑшӑрханӑвӗ пирки хыпарланӑ. Вӑл Ильин тӑвӗ пирки сӑмах пуҫарнӑ. Асӑннӑ территорие Олег Николаев комплекслӑ аталантарма палӑртни ҫинчен пӗлтернӗ. Тыл ӗҫченӗсене чыс туса унта монумент тума та плана кӗртсе хӑварнине пӗлтернӗ. «Ӗҫсене комплекслӑ пурнӑҫласан, республикӑра пурӑнакансене анчах мар, ытти кӳршӗллӗ халӑха та вӑл тӗле килсе курма аван пулӗ. Ялти халӑх валли ҫӗнӗрен те ҫӗнӗ условисем йӗркеленесси никама та иккӗлентермест», – тесе ҫырнӑ республикӑн влаҫ органӗсен официаллӑ порталӗнче.
Нумай хваттерлӗ ҫурт-йӗре тытса тӑракан управляющи компанисене хурлакансем час-часах тупӑнни пирки республикӑн Правительствин авӑн уйӑхӗн 23-мӗшӗнче иртнӗ канашлура сӑмах хускатнӑ. Республика Элтеперӗ Олег Николаев унта каланӑ тӑрӑх, вӗсенчен хӑшӗсем пирки вӗҫӗмех ҫӑхавсем килеҫҫӗ. Ҫавӑнпа та управляющи компанисен ӗҫ-хӗлне тишкермелле.
«Нумай хваттерлӗ ҫурт-йӗре тытса тӑрасси, ҫурта тӗплӗн юсасси пирки ыйтусем нумай. Вӗсене республикӑн Строительство, архитектура тата ҫурт-йӗрпе коммуналлӑ хуҫалӑх министерствин тата Ҫурт-йӗр инспекцийӗн сӑнаса йӗркелесе тӑмалла. Управляющи компанисемпе ҫынсен хушшинче ҫыхӑну уҫӑ та пуриншӗн те ӑнланмалла пулмалла. Ҫавӑн чухне ыйтусем вырӑнтах татӑлӗҫ», — тенӗ республика ертӳҫи.
Олег Николаев хушӑвне шута илсе Чӑваш Енӗн Патшалӑх ҫурт-йӗр инспекцийӗ онлайн-ыйтӑм ирттерет. Унта хутшӑнас тесен https://nk.cap.ru/poll/110 каҫӑпа кӗрсе регистрациленмелле.
Сӑр тата Хусан хӳтӗлев чиккисене чавнӑранпа 80 ҫул ҫитнӗ май Чӑваш Енре медаль ҫирӗплетме палӑртнине Чӑваш халӑх сайчӗ пӗлтернӗччӗ. Халӗ чи лайӑх медаль эскизне хатӗрлемелли конкурс ирттерессине пӗлтереҫҫӗ. Паян республикӑн Министрсен Кабинечӗн ларӑвӗ иртнӗ. Унта медаль эскизне хатӗрлесси пирки калаҫнӑ. Конкурса Чӑваш Ен Элтеперӗн Администрацийӗ ирттерӗ.
Сӑмах май, совет халӑхӗн ӗҫри паттӑрлӑхне халалласа ҫитес ҫул пирӗн республикӑра палӑк лартӗҫ. Монумент федераци тӗллевӗллӗ пулӗ тесе пӗлтернӗ республика Элтеперӗ Олег Николаев.
Юсав ӗҫӗсем вӑраха тӑсӑлнине пула Вӑрнарти 1-мӗш шкулта вӗренекенсем авӑнӑн 1-мӗшӗнче парта хушшине ларайман. Ӗҫе вӗҫлес тесе подрядчике улӑштарнӑ. Вӑрнартан лайӑх хыпар ҫитнӗ – ачасем юпан 19-мӗшӗнче парта хушшине ларайӗҫ.
Шкулта 1-мӗш тата 2-мӗш хутсенче сӗтел-пукан вырнаҫтараҫҫӗ. Ӗҫ хӑвӑртрах вӗҫлентӗр тесе ачасен ашшӗ-амӑшӗ те пулӑшать. «Вӑрнар шкулӗ – мӗнле ӗҫлеме юраманнине кӑтартакан тӗслӗх. Кун пек тӑрлавсӑрлӑх урӑх пулмалла мар. Мерӑсем йышӑннӑ», - ҫапла пӗлтернӗ ЧР Элтеперӗ Олег Николаев Инстаграмри страницинче.
Палӑртмалла: хальлӗхе кӗҫӗн классем 1950-мӗш ҫулсенче хӑпартнӑ зданире вӗренеҫҫӗ, аслӑ классем – дистанци мелӗпе.
Паян Чӑваш Ен Правительство ҫуртӗнче Чӑваш Ен Элтеперӗ Олег Николаев «Раҫҫей почти» акционерсен обществин Атӑл тӑрӑхӗнчи макрорегионӗн директорӗпе Александр Вакуленкӑпа тӗл пулнӑ.
Александр Вакуленко Раҫҫей почтин республикӑри управленийӗн пуҫлӑхӗн тивӗҫӗсене пурнӑҫлакан Максим Ладиловпа паллаштарнӑ. Шӑпах ун пирки вӑл регионти филиалӑн пуҫлӑхӗ пулмалли кандидат тесе каланӑ.
Ведомствӑн ҫӗнӗ ертӳҫи почта тытӑмӗнче чылай ҫул ӗҫленӗ. 2006 ҫултанпа Максим Ладилов Раҫҫей почтин Чӑваш Енри управленийӗнче директорӑн операци управленийӗ енӗпе ӗҫлекен ҫумӗ пулса тӑрӑшнӑ.
Чӑваш Ен Элтеперӗ Олег Николаев республикӑри мӑнаҫлӑ пулӑмсемпе тата ҫынсемпе ятарлӑ хэштегсем кӑтартса тӗнче тетелӗнчи халӑх ушкӑнӗсенче мӑнаҫланма чӗнсе каланӑ. Республика Элтеперӗн Инстаграмри странцинче #ВместеГордимся #ПерлеМухтанатпар хэштегсемпе усӑ курма сӗннӗ. Телефонти айсарӑмра чӑваш саспаллийӗсем пуррисем (ун пек шрифтпа усӑ курма паян нумайӑшӗ пӗлет пулӗ), пирӗн шухӑшпа, #ПӗрлеМухтанатпӑр тесе ҫырма пултараҫҫӗ.
Олег Николаев пирӗн тӑрӑх мӑнаҫланмалли пулӑмсемпе пуяннине палӑртнӑ. Сӑмахне ҫирӗплетме вӑл темиҫе тӗслӗх илсе кӑтартнӑ. Сӑмахран, Хусанта иртнӗ марафонта ылтӑн медале ҫӗнсе илнӗ Алина Прокопьева. Экологи нимеҫисем канмалли кунсенче Йӑлӑмра чӑрӑш хунавне лартнине те асӑннӑ.
Паян Атӑл леш енче «Вӑрмана упрар» пӗтӗм ҫӗршыври акци иртнӗ. Унта студентсем, «Симӗс хула» экологи организацийӗн пайташӗсем тата ыттисем хутшӑннӑ.
Шупашкар вӑрман хуҫалӑхӗн Йӑлӑмри 22-мӗш кварталӗнче икӗ гектар ҫине 10 пин хыр хунавӗ лартнӑ.
Хальхи вӑхӑтра 2010 ҫулхи пушарта ҫунса кайнӑ лаптӑкран 95 процентне ҫӗнӗрен чӗртсе тӑратнӑ.
Йӑлӑмра паян пулнӑ Чӑваш Ен Элтеперне Олег Николаева Шупашкар вӑрман хуҫалӑхӗн директорӗ Александр Воробьев хунав туса илеҫ ӗҫ епле пынипе паллаштарнӑ. Республика ертӳҫи теплица тума сӗннӗ. Ҫӗнӗлле ӗҫлеме пуҫласан хамӑра ҫеҫ, ытти региона та хунавпа тивӗҫтерме пултарӑпӑр тесе шухӑшлать вӑл.
Авӑнӑн 13-мӗшӗнче Чӑваш Ен Элтеперӗн суйлавӗ пулчӗ. Кӑшӑлвируса пула вӑл виҫӗ куна тӑсӑлчӗ, маларах пуҫланчӗ.
Чӑваш Енри юрист Сергей Ванюков суйлав саккуна пӑсса иртнӗ тесе ӗнентересшӗн. Вӑл каланӑ тӑрӑх, суйлава маларах пуҫӑнма юранине регионти саккунра палӑртман. Ҫавна май юрист ЧР Аслӑ судне республикӑри Тӗп суйлав комиссийӗ тӗлӗшпе административлӑ тавӑҫ тӑратнӑ.
Аса илтерер: суйлава килнисен 75 проценчӗ Олег Николаевшӑн сасӑланӑ. Халӗ вӑл ЧР Элтеперӗн пуканне йышӑннӑ.
Паян Чӑваш Енӗн экономика аталанӑвӗн тата пурлӑх хутшӑнӑвӗсен министрӗн ҫумӗ пулма 39 ҫулти Денис Спирина шаннӑ. Ҫапла вара экономика министрӗн ҫумӗсем халӗ тӑваттӑн: Инна Антонова, Екатерина Кузьмина, Ирина Крылова тата Денис Спирин.
Денис Спирин — Чӑваш Ен Элтеперӗ Олег Николаев пуҫарнипе авӑн уйӑхӗнче ирттернӗ «Ертӳҫӗсен команди» республикӑри конкусра ҫӗнтернӗ пилӗк ҫынтан пӗри. Пӗр вӑхӑтра вӑл «Мегаполис» банкӑн правленийӗн председателӗ пулнӑ, кайран «Анастасия» тата «Динас» предприятисен гендиректорӗнче ӗҫленӗ. Аслӑ пӗлӗве Шупашкарти коопераци институтӗнче, Питӗрти патшалӑхӑн экономика университетӗнче, Мускаври гуманитарипе экономика институтӗнче илнӗ.
+13.3 °C