Чӑваш Енре юлашки вӑхӑтра кӑшӑлвируспа чирлекен нумайланнӑ. Кун пирки ЧР Элтеперӗ Олег Николаев телеграм-каналӗнче пӗлтернӗ. Иртнӗ эрнере 31 ҫынна пульницӑна вырттарнӑ.
Стопкоронавирус.рф сайт хыпарланӑ тӑрӑх, авӑнӑн 11-17-мӗшӗсенче пирӗн республикӑра 312 ҫын кӑшӑлвируспа чирленӗ. Авӑнӑн 4-10-мӗшӗсенче вара 202 тӗслӗх пулнӑ. Ҫулла вӗҫӗнче 90 ҫыннӑн кӑшӑлвирус пулнине палӑртнӑ.
Чӑваш Енри кашни муниципалитетрах «Добро.Центр» (чӑв. Ырӑ.Центр) волонтерсен пӗрлешӗвӗсем уҫӑлмалла. Кун пирки Чӑваш Ен Элтеперӗ Олег Николаев Нимелӗхе аталантармалли канашӑн ларӑвӗнче палӑртса хӑварнӑ.
Паянхи кун пирӗн республикӑра 56 пин волонтёр шутланать иккен.
«Ырӑ.Центрсем» уҫӑлни нимелӗхе урӑх шпя куҫарма пулӑшасса шанаҫҫӗ.
«Нимелӗхӗн мӗнпур енне аталантарса пымалла, унпа пӗрлех ҫӗнӗ проектсем шухӑшласа кӑлармалла», — тенӗ республика ертӳҫи Олег Николаев.
Суд приставӗсен службинче ертӳҫӗ пуканне ҫӗнӗ ҫын йышӑннӑ. Унпа паян ЧР Элтеперне Олег Николаева официаллӑ майпа паллаштарнӑ.
Суд приставӗсен Чӑваш Енри службине Сергей Резник ертсе пырӗ. Вӑл кӑҫалхи ака уйӑхӗнченпе ҫак ведомство пуҫлӑхӗн тивӗҫӗсене вӑхӑтлӑха пурнӑҫланӑ. Унччен вара ку пукана Денис Борисов йышӑннӑ пулнӑ.
Республикӑра автоклубсем пурри пирки унччен сайтра хыпарланӑччӗ. Правительство ҫуртӗнче иртнӗ канашлура ЧР Элтеперӗ Олег Николаев кӑҫал тата ҫитес ҫул тепӗр 10 автоклуб туянасси пирки пӗлтернӗ.
Палӑртмалла: кӑҫал Элӗк, Ҫӗрпӳ, Ҫӗмӗрле районӗсенче виҫӗ автоклуб ӗҫлеме тытӑннӑ. Вӗсем – ПАЗ автобуссем ҫинче. Автоклубсем пулӑшнипе 80 ытла мероприяти йӗркеленӗ. Унччен автоклубсем Патӑрьел тата Канаш районӗсенче кӑна пулнӑ.
Канашлура Элтепер районсенче культура объекчӗсене ҫӗклени, юсаса ҫӗнетни пирки те каланӑ.
Ҫитес вӑхӑтра патшалӑх служащийӗсем валли награда ҫирӗплетӗҫ. Вӑл «Чӑваш Республикинчи патшалӑх граждан службинче лайӑх ӗҫленӗшӗн» уйрӑм паллӑ пулӗ. Хальхи вӑхӑтра Элтеперӗн ҫак хушӑвне сӳтсе яваҫҫӗ, вӑл коррупципе кӗрешекен экспертиза витӗр тухать.
Элтепер администрацийӗ хыпарланӑ тӑрӑх, кунашкал награда 6 регионта пур: Мари Элте, Удмуртире, Мордва Республикинче, Чулхула, Самар тата Пенза облаҫӗсенче.
Палӑртмалла: республикӑра 1,5 пине яхӑн патшалӑх служащийӗ шутланать.
Авӑн уйӑхӗн 1-мӗшӗнче ЧР Пуҫлӑхӗ Олег Николаев И.Я.Яковлев ячӗллӗ ЧППУн ҫӗнӗ ректорӗпе Игорь Кожановпа тӗл пулнӑ. Вӗсем шкулсенче кадрсем ҫитменни пирки калаҫнӑ.
Палӑртмалла: 2020 ҫулта 3-мӗш курс студенчӗсене ӗҫлеме ирӗк панӑ. Игорь Кожанов каланӑ тӑрӑх, студентсем шкулсенче ӗҫлеме пуҫланӑ. Анчах вӗсен, ытти специалистпа танлаштарсан, ӗҫ укҫине ӳстерекен коэффициент ҫук.
Хальхи вӑхӑтра 85 яхӑн студент шкулта ӗҫлет. Олег Николаев ӗҫ укҫине ӳстерекен коэффициента тусан тата нумайрах студента шкула илӗртме май пуррине палӑртнӑ. Ҫавӑн пекех Элтепер тӗллевлӗ вӗренекен студентсем сахаллине каланӑ. 138 абитуриент валли квота пур, анчах вӗсенчен 20-шӗ кӑна вӗренет.
Авӑн уйӑхӗн 14-мӗшӗнче 12 сехетре ЧР Элтеперӗ Олег Николаев каллех тӳрӗ лини ирттерӗ. Хальхинче вӑл нейросетьсем пулӑшнипе иртӗ. Кунашкал тӳрӗ лини унччен пулман.
Ыйтусене маларах Патшалӑх пулӑшӑвӗсен порталӗнче хӑварма, «Контактра» халӑх тетелӗнчи пост айӗнче ҫырма юрать. Эфир вӑхӑтӗнче колл-центр ӗҫлӗ. Унта ҫак номерпе шӑнкӑравлама пулать: 8 (8352) 565-100.
Тӳрӗ эфира «Контактри» «Чувашская Республика» ушкӑнра, Олег Николаевӑн телеграм-каналӗнче, Наци телекуравӗпе кӑтартӗҫ. Ҫавӑн пекех Нацрадиопа та итлеме май пур.
Паян, Пӗлӳ кунӗнче, Сӗнтӗрвӑрри хулинчи «Коновалово» микрорайонта ҫӗнӗ шкул алӑкӗсене уҫнӑ. Ӑна ял территорийӗсене комплекслӑ аталантармалли программӑпа килӗшӳллӗн хута янӑ.
Шкул виҫӗ хутлӑ, унта 375 ача вӗренме пуларать. Вӑл Ломоносов урамӗнче вырнаҫнӑ пӗлӳ ҫурчӗ вырӑнне пулӗ. Унти ҫуртӑн 51 проценчӗ кивелнӗ.
Паян шкула уҫма ЧР Элтеперӗ Олег Николаев тата ытти тӳре-шара ҫитнӗ. Пӗлӳ кунӗнче ачасем ҫӗнӗ шкулта парта хушшине ларнӑ.
Чӑваш Ен Элтеперӗ Олег Николаев Пӗлӳ кунӗпе саламланӑ.
«Сирӗнтен кашниех – Республикӑмӑр пуянлӑхӗ, унӑн малашнехи ӑнӑҫлӑ аталанӑвӗн шанӑҫӗ. Шӑпах эсир, хаклӑ тусӑмӑрсем, кӑштах вӑхӑтран Тӑван ҫӗршыва аталантарас ӗҫе тивӗҫлӗ тӳпе хывакансем пулатӑр.
Тарӑн пӗлӳ илме ӑнтӑлни, пуринпе те кӑсӑкланни тата пурне те пӗлме тӑрӑшни сире паллӑ ҫитӗнӳсемпе ӳсӗмсем тата ҫӗнтерӳсем тума пулӑшса пырасса шанса тӑратӑп», — тенӗ вӑл саламра.
«Звениговский» СПК председательне Иван Казанкова «Чӑваш Республики умӗнчи тава тивӗҫлӗ ӗҫсемшӗн» орден медалӗпе чысланӑ. Хушӑва ЧР Элтеперӗ Олег Николаев ҫурлан 25-мӗшӗнче алӑ пуснӑ.
Кӑҫал Республика кунӗнче Ҫӗнӗ Шупашкарта предприятин филиалӗ уҫӑлнӑ. Унта аш-какай тирпейлеҫҫӗ. Ҫавӑн пекех унта булка таврашӗ, кондитер ҫимӗҫӗсем туса кӑларакан цех хута ярасшӑн.
Иван Казанков - 81 ҫулта. Вӑл Тутарстанри Элкей районӗнчи Сиктӗрме ялӗнче ҫуралнӑ.
+28.3 °C