"Про Город" сайтри сӑн

Шупашкарта икӗ ача ашшӗне, 29 ҫулти арҫынна, пӗр эрне ытла шырани пирки пӗлтернӗччӗ. Аса илтерер: вӑл чӳк уйӑхӗн 28-мӗшӗнче килтен тухса кайнӑ та таврӑнман. Арӑмӗ ун патне шӑнкӑравланӑ, мессенджерсенче ҫырнӑ, анчах лешӗ хуравламан. Тӑванӗсем кун пирки полицие пӗлтернӗ, арҫынна нимеҫӗсем те шыранӑ.

Арҫынна раштав уйӑхӗн 6-мӗшӗнче, паян, тупнӑ. Шел те, вӑл чӗрӗ мар. Унӑн виллине ҫӗнӗ кӑнтӑр районӗнче тупнӑ. Следовательсем кун тӗлӗшпе следстви умӗнхи тӗрӗслев ирттереҫҫӗ. Ӗҫ-пуҫа уҫӑмлатма судпа медицина экспертизи ирттерме палӑртнӑ.

Арҫыннӑн арӑмӗ тата икӗ пӗчӗк ачи тӑлӑха юлнӑ.

Инкеклӗ лару-тӑру министерстви тунӑ сӑн

Паян ир-ирех, ҫур ҫӗр иртни 3 сехет те 40 минутра, Шупашкарти Чапаев урамӗнчи 5-мӗш ҫуртӑн 1-мӗш корпусӗнчи пӗр хваттерте пушар тухнӑ. Ҫулӑм залра алхасма тытӑннӑ, сӗтел-пукана ярса илнӗ.

Ҫав самантра килте хваттере тара илнӗ хӗрарӑм, унӑн 3-ри ачи тата иккӗмӗш сыпакри йӑмӑкӗ пулнӑ. Ҫулӑм тухнине курсан вӗсем ӑна хӑйсем тӗллӗн сӳнтереймен, урама тухсан пушарнӑйсене чӗннӗ.

Пушара сӳнтернӗ чухне подъездран 5 ҫынна урама кӑларнӑ. Тӑваттӑмӗш хутра пурӑнакан 1 ҫулти ачана тухтӑрсен пулӑшӑвӗ кирлӗ пулнӑ. Сӗрӗмпе наркӑмӑшланнӑскере пульницӑна илсе кайнӑ.

Пушар розеткӑран тухнӑ тесе шутлаҫҫӗ. Унта тӳрех темиҫе прибора чикнӗ-мӗн, ҫав шутра – гирлянда та.

winter-fishing.ru сайтри сӑн

Ҫанталӑк сивӗ тӑрать пулсан та ҫӑлавҫӑсем асӑрхаттараҫҫӗ: Сӑр ҫинче пӑр ҫӳхе-ха. Анчах хӑшӗ-пӗри ҫакна шута илмест. Ку вара инкек патне илсе ҫитерет.

Паян Чулхула облаҫӗнчи Васильсурск патӗнче, Сӑр ҫинче, пилӗк пулӑҫ пӑр айне кайнӑ. Вӗсем пурте – Чӑваш Ен ҫыннисем.

Паян 17 сехет те 40 минутра Воротынец облаҫӗнчи ҫӑлавҫӑсем патне шӑнкӑрав ҫитнӗ: Сӑр ҫинче икӗ арҫын путаҫҫӗ иккен. 48 ҫулти арҫынна ҫӑлма май килнӗ, унӑн 80-ри ашшӗ вара, шел те, вилнӗ.

Тепӗр сехетрен ҫӑлавҫӑсем тепӗр виҫӗ арҫынна ҫӑлма кайнӑ, вӗсем те путма тытӑннӑ. Вӗсене пурне те ҫӑлнӑ, ҫыран хӗррине илсе тухнӑ. Тухтӑрсем палӑртнӑ тӑрӑх, пулӑҫсем шӑнса кӳтнӗ.

http://tavan-en.ru сӑнӳкерчӗкӗ

Шупашкар районӗнчи Кӳкеҫре пурӑнакансене хулана каякан 162-мӗш маршрутпа ҫӳрекен транспорт тулли пулни тата ҫул укҫи кӗтмен ҫӗртен хакланни пӑшӑрхантарать.

Асӑннӑ поселокра пурӑнакансенчен пӗри ӗнер «Народный контроль» (чӑв. Халӑх тӗрӗслевӗ) портала ҫыру шӑрҫаланӑ. Унта вӑл ирхи ҫиччӗре «маршруткӑсем» лӑк тулли пулнине пӑшӑрханса пӗлтернӗ. Мера йышӑнма ыйтнӑ. Порталта палӑртнӑ тӑрӑх, ыйтӑва Чӑваш Енӗн Транспорт тата ҫул-йӗр хуҫалӑхӗн министерстви хуравлӗ.

Тӗнче тетелӗнчи халӑх ушкӑнӗсенчен пӗринче кӳкеҫсем ҫул укҫи хакланнине пӗлтереҫҫӗ. Шупашкара Кӳкеҫрен кайма унччен 22 тенкӗ (карттӑпа — 20 тенкӗ) тӳлеттернӗ пулсан, халӗ карттӑллисен 25 тенкӗ, укҫан татӑлакансен 23 тенкӗ кӑларса хума тивет.

https://uslugio.com/cheboksary сӑнӳкерчӗкӗ

Сайт туса панӑ та укҫа тӳлемен. Шупашкарти организацисенчен пӗрин ертӳҫи ҫавӑн пек хӑтланнӑ. Хӑйӗн патӗнче ӗҫленӗ ҫынсенчен пӗрне вӑл ӗҫ укҫи тӳлемесӗр тарӑхтарнӑ. Лешӗ аптӑраса тӑман. Йӗрке хуралҫисенчен пулӑшу ыйтнӑ.

2017 ҫулхи утӑ уйӑхӗнчен пуҫласа 2018 ҫулхи ҫӗртме уйӑхӗччен шалу парӑмӗ 100 пинтен иртнӗ. Тӗпчевҫӗсем шухӑшланӑ тӑрӑх, пуҫлӑхӑн укҫа тӳлеме тупри пулнӑ.

Саккуна пӑснӑ пуҫлӑх тӗлӗшпе РФ Следстви комитечӗн Чӑваш Енри органӗсем пуҫиле ӗҫ пуҫарнӑ. Ӗҫ укҫине ик уйӑх ытла тӳлемесен РФ Пуҫиле кодексӗн 145.1 статйин 2-мӗш пайӗпе килӗшӳллӗн явап тыттарма юрать.

Сайт тӑвакан тата ӑна сарас енӗпе ӗҫлекен организаци пуҫлӑхӗ тӗпчевҫӗсем пуҫиле ӗҫ пуҫарнӑ хыҫҫӑн шалӑва йӑпӑр-япӑр тӳлесе татнӑ.

Алькешри Болгарстрой урамӗнчи канализаци ҫӑлне ача кӗрсе ӳкнишӗн «Водоканал» ӗҫченне штрафланӑ.

Аса илтерер: пӑтӑрмах кӑҫалхи ҫӗртме уйӑхӗн 14-мӗшӗнче пулнӑччӗ. Ҫулталӑк та 10 уйӑхри ача урама амӑшӗпе тухнӑ. Асли хыҫҫӑн утса пыраканскер канализаци ҫӑлне, 3 метр тарӑнӑшне, персе аннӑ. Ача хытах суранланман-ха. Пульницӑра тухтӑрсем тӗрӗсленӗ хыҫҫӑн ӑна киле янӑ.

Пӑтӑрмах хыҫҫӑн тӗпчевҫӗсем яваплине шырама пикеннӗ. Канализаци ҫӑлне хупманшӑн «Водоканал» предприятин ӗҫченӗ айӑплине палӑртнӑ.

Уҫӑ ҫӑла ҫын ӳкесрен карта тытса хупламалла пулнӑ тесе арҫын тӗлӗшпе пуҫиле ӗҫ пуҫарнӑ. Вӑл унччен судпа айӑпланманнине, йӑнӑша йышӑннине, ачана сӑтӑр кӳнине саплаштарнине шута илсе суд ӑна 7 пин тенкӗ штрафланипе ҫырлахнӑ, пуҫиле ӗҫе чарса лартнӑ.

http://mchs.cap.ru сӑнӳкерчӗк. Ҫӗрпӳ районӗнчи Янтушри инкек

Ҫулӑм чӗлхи вӑрӑммине пурте пӗлеҫҫӗ. Ӗнер, раштав уйӑхӗн 2-мӗш каҫхине, Ҫӗрпӳ районӗнче пӑрусем чутах шар курман.

Вут-ҫулӑм Елашри йывӑҫ витере алхасма пуҫлани ҫинчен пушарпа кӗрешекенсене 18 сехет те 30 минутра систернӗ. 40 пӑрӑва витерен кӑларнӑ. Йывӑҫ вите вара ҫунса кӗлленнӗ.

Раҫҫейӗн Инкеклӗ ӗҫсен министерствин Чӑваш Енри тӗп управленийӗнче пӗлтернӗ тӑрӑх, пушар сӳнтерме 4 единица техникӑпа усӑ курнӑ. Вут-ҫулӑм мӗн сӑлтавпа алхасма пуҫланине ҫӑлавҫӑсем палӑртӗҫ.

Раҫҫейӗн Инкеклӗ ӗҫсен министерствин Чӑваш Енри тӗп управленийӗнче кӑҫал пирӗн республикӑра 1473 пушар тухнине пӗлтереҫҫӗ. Вут-ҫулӑма пула 69 миллион ытла тенкӗлӗх шар курнӑ. 64 ҫн пурнӑҫе татӑлнӑ, 91-шӗ суранланнӑ. 143 ҫынна ҫӑлма май килнӗ.

moygorod-online.ru архивӗнчи сӑнӳкерчӗк

Красноармейски районӗнчи Еншик Чуллӑ ял тӑрӑхӗн пуҫлӑхӗ служба машини рулӗ умне ӳсӗрле ларса ҫул ҫинче пӑтӑрмаха ҫакланнине Чӑваш халӑх сайчӗ пӗлтернӗччӗ. Аса илтерер: Авари юпа уйӑхӗн 16-мӗшӗнче «Ҫӗрпӳ – Красноармейски – Кӳлҫырма» ҫул ҫинче пулнӑ. Еншик Чуллӑ ял тӑрӑхӗн пуҫлӑхӗ служба машини рулӗ умӗнче чухне (ку пӑтӑрмах ӗҫ вӑхӑтӗнче пулман)хирӗҫ килекен ҫул ҫине тухса кайнӑ. унта вӑл КамАЗпа ҫапӑннӑ.

Ӗҫри машинӑпа усӗрле инкеке лекнӗ хыҫҫӑн хайхи пуҫлӑха явап тыттарнӑ. Унран та ытларах — Еншик Чуллӑ ял тӑрӑхӗн пуҫлӑхӗ пулнӑ ҫын халӗ текех вӑл должноҫе йышӑнмасть ӗнтӗ. Чӑваш Ен прокуратурин пресс-службинче пӗлтернӗ тӑрӑх, машинӑна вара пуҫлӑх хӑйӗн шучӗпе юсаттарнӑ.

visitvolga.ru сӑнӳкерчӗкӗ

Шупашкарти музейсенчен пушар хӑрушсӑрлӑхӗн правилине пӑсаҫҫӗ. Ҫапла пӗтӗмлетнӗ прокуратура тӗрӗслевӗ вӑхӑтӗнче.

Надзор органӗ Чӑваш наци музейӗнче, К.В. Иванов ячӗллӗ Литература музейӗнче тата Чӑваш тӗррин музейӗнче пулнӑ. Ҫак учрежденисем «Чӑваш наци музейӗ» хысна учрежденийӗн тытӑмӗнче шутланаҫҫӗ.

Пурне те асӑрхакан прокурорсем музейсенче вӑл е ку кӑлтӑка самай тупса палӑртнӑ. Хӑш-пӗр учрежденире пушар хӑрушсӑрлӑхӗ пирки асӑрхаттаракан тытӑмсем ӗҫлемеҫҫӗ иккен, саппас алӑксем ыррӑн уҫӑлса хупӑнмаҫҫӗ тата ытти ҫитменлӗх те тупӑннӑ.

Тупса палӑртнӑ кӑлтӑксемшӗн «Чӑваш наци музейӗ» хысна учрежденийӗн тӗп инженерӗ ячӗпе административлӑ ӗҫ пуҫарнӑ. Чӑваш наци музейӗн пуҫлӑхӗ ячӗпе асӑрхаттару хучӗ шӑрҫаланӑ.

Алексей Радченко тунӑ сӑн

Паян, раштав уйӑхӗн 2-мӗшӗнче, Шупашкарти ҫӗнӗ кӑнтӑр районӗнче ҫамрӑк арҫын ҫӳллӗ хутран ӳксе вилнӗ. Вӑл васкавлӑ медпулӑшу киличчен сывлама пӑрахнӑ.

Ку инкек Гастелло урамӗнчи 9-мӗш ҫуртра пулнӑ. 20 ҫулти арҫын 17-мӗш хутран ӳксе вилнӗ. Ку пӑтӑрмах пирки паян Шупашкар хула администрацийӗнче иртнӗ планеркӑра Пӗрлехи диспетчер службин пуҫлӑхӗн ҫумӗ Сергей Герасимов пӗлтернӗ.

Ку хыпара «Ҫыхӑнура» форумра сӳтсе явакансенчен пӗри ҫырнӑ тӑрӑх, ҫамрӑк арҫын кӳршӗ ҫуртра пурӑннӑ.