Кӑҫал ҫурла уйӑхӗнче ЧР Элтеперӗ Михаил Игнатьев Раҫҫейри кӗпӗрнаттӑрсен витӗм танлаштарӑмӗнче списокра 33-мӗш пулнӑ. Халӗ, юпа уйӑхӗнче, ҫӗнӗ танлаштарӑм хатӗрленӗ. Кун пирки Политика тата экономика коммуникацийӗсен агентстви пӗлтерет.

Хальхинче Михаил Васильевич икӗ йӗрке аяларах аннӑ, 35-мӗш вырӑна йышӑннӑ. Ҫапах Элтепер «Вӑйлӑ витӗм» ушкӑнрах юлнӑ.

Танлаштарӑмра кам 1-мӗш вырӑнта пулнине тавҫӑрма йывӑр мар. Ҫак ертӳҫӗ унччен те «Питӗ вӑйлӑ витӗм» ушкӑнра малти йӗркене йышӑннӑ. Вӑл – Мускав хулин мэрӗ Сергей Собянин.

Юпа уйӑхӗн 4-7-мӗшӗсенче Шупашкара Раҫҫейри хуласенчи 100 ытла мэр килӗ. Ҫывӑх тата инҫет ют ҫӗршывсенчи элчесем те ҫитӗҫ. Чӑваш Енӗн тӗп хулинче Еврзири вырӑнти влаҫсен Конгресӗ иртет.

Ӑна Пӗтӗм тӗнчери «Пӗрлештернӗ хуласем тата вырӑнти влаҫсем» организацин Евразири уйрӑмӗ ООНпа, Шупашкар хула администрацийӗпе пӗрле йӗркелет. Шупашкара ҫитнӗ хӑнасем хуласен аталанӑвӗ пирки калаҫӗҫ, Еврази уйрӑмӗн Канашӗн ҫӗнӗ йышне, вице-президентне, президентне суйлӗҫ.

Мероприятин тӗп спикерӗсем Пӗтӗм тӗнчери «Пӗрлештернӗ хуласем тата вырӑнти влаҫсем» организацин президенчӗ Паркс Тау, ООН программин ертӳҫи Татьяна Хабарова, Пӗтӗм тӗнчери «Пӗрлештернӗ хуласем тата вырӑнти влаҫсем» организацин Евразири уйрӑмӗн президенчӗ Ильсур Метшин тата Жорди Паскаль, Ламин Аббад координаторсем пулӗҫ.

Чӑваш Енри ҫынсен прависене хӳтӗлекен уполномоченнӑй Надежда Прокопьева, ачасен прависене хӳтӗлекен уполномоченнӑй Елена Сапаркина, усламҫӑсем прависене хӳтӗлекен уполномоченнӑй Александр Рыбаков канаш йӗркеленӗ. Кун пирки вӗсем паян калаҫнӑ.

Ҫак канаш уполномоченнӑйсене вӑйлӑрах, тухӑҫлӑрах ӗҫлеме, информаципе тата опытпа ылмашӑнма май парӗ.

Виҫӗ упономоченнӑй тӗл пулсан хӑйсен ӗҫӗнчи ҫивӗч ыйтусем тавра та калаҫнӑ. Кайран пӗтӗмлетӳ тунӑ: кӑҫал тӑваттӑмӗш кварталта пӗрле ӗҫ саккунӗн ыйтӑвӗпе «ҫавра сӗтел» ирттерме йышӑннӑ.

Леонид Волков экс-полпред

Чӑваш Енӗн Раҫҫей Президенчӗ ҫумӗнчи полномочиллӗ представителӗ пулнӑ Леонид Волкова кӑштах айӑпсӑр тесе йышӑннине, ун хыҫҫӑнах ӑна тытса чарнине Чӑваш халӑх сайчӗ пӗлтернӗччӗ.

Паян Чӑваш Енӗн Аслӑ сучӗ Волковпа ҫыхӑннӑ ӗҫе пӑхса тухнӑ. Унта пирвайхи инстанцири суд экс-полпреда следстви изоляторне хупмалла тунине тишкернӗ. ЧР Аслӑ сучӗ унчченхи суд йышӑнӑвӗпе килӗшнӗ. Ҫапла вара Леонид Волкова следстви изоляторӗнче тытӗҫ.

Леонид Волкова хӑйне хӑй преми парса хыснана тӑкак кӳнӗ тесе айӑпласшӑн. Тӑкака вӑл, Александр Белов журналист пӗлтернӗ тӑрӑх, тахҫанах саплаштарнӑ. Унтан та ытларах — айӑплав енӗ палӑртнӑ суммӑран ытларах та тавӑрса панӑ. Апла пулин те Леонид Волковпа ҫыхӑннӑ пӑтӑрмах паян та вӗҫленмен-ха...

Чӑваш Енӗн Патшалӑх Канашӗнче ӗнер пуҫлӑхсем ылмашнӑ. Ҫук-ха, спикер мар. Парламентри партисенчен пӗрин, «Пӗрлӗхлӗ Раҫҫей» фракцин, ертӳҫине улӑштарнӑ. Асӑннӑ партин депутачӗсен лидерӗ пулма Альбина Егоровӑна шаннӑ. Вӑл — парламентӑн ертӳҫин ҫумӗ.

Альбина Егоровна — Шупашкар районӗнчи Апаш ҫынни. Унтах пурӑнать. Шупашкар район администрацийӗнче чылай ҫул ӗҫленӗ. Унта вӑл район администрацийӗн пуҫлӑхӗн пӗрремӗш ҫумӗнче те тӑрӑшнӑ.

«Пӗрлӗхлӗ Раҫҫей» партин фракцин ертӳҫинче малтан Вячеслав Рафинов пулнӑччӗ. Сӑмах май, вӑл та — Шупашкар район ҫынни.

«Социаллӑ политика енӗпе ӗҫлекен комитет ертӳҫи пулнӑ май унта та ӗҫ ҫитет. Отставкӑна яма хам ыйтрӑм», — пӗлтернӗ Вячеслав Рафинов Александр Белова журналиста.

ЧР Элтеперӗ Михаил Игнатьевӑн малашне ҫӗнӗ канашҫӑ пулӗ. Аса илтерер: 2016 ҫулта вӑл хӑйӗн патне 28 ҫулти Роман Караулова илнӗччӗ. Роман «Холдинг КиПиКАй» тулли мар яваплӑ обществӑн директорсен канашӗн председателӗ пулнӑ. 2017 ҫулта Элтепер хӑйӗн канашҫине паллӑ вырӑс рокерӗн ывӑлне, «Черный обелиск» ушкӑн лидерне Владимир Крупнова суйланӑ.

Малашне ҫак тивӗҫе Кабадзе Георгий Изалмерович пурнӑҫлӗ. Хушӑва паян Михаил Игнатьев алӑ пусса ҫирӗплтенӗ.

Ӗнер пирӗн республикӑра Раҫҫейри пекех Пӗрлехи сасӑлав кунӗ пулчӗ. Ун вӑхӑтенче вырӑнти хай тытӑмлӑх органӗсене хушма суйлав иртрӗ. Ҫавӑн вӑхӑтӗнче 82 мандат валли депутат суйларӗҫ. Суйлав иртмен муниципалитетсем те пулчӗҫ. Вӗсем — Шупашкарпа Ҫӗнӗ Шупашкар хулисем тата Элӗк районӗ.

Чӑваш Енӗн Элтеперӗ Михаил Игнатьев правительство пайташӗсемпе тунтикунсерен ирттерекен паянхи канашлура суйлав ыйтӑвне те хускатнӑ. ЧР Тӗп суйлав комиссийӗн ертӳҫи Александр Цветков унта пӗлтернӗ тӑрӑх, 82 мандатран 81-шне «Пӗрлӗхлӗ Раҫсей» парти пайташӗ йышӑннӑ. Тепринче — нихӑш парти те тӑратман кандидат. Александр Цветков шухӑшланӑ тӑрӑх, ҫакӑ республикӑра социаллӑ пурнӑҫпа политика тытӑмӗнче стабиллӗх хуҫаланнине пӗлтерет.

Паян, авӑн уйӑхӗн 9-мӗшӗнче, Шупашкарта пенси реформине хирӗҫ митинг иртнӗ. Ӑна Хусанкай ячӗллӗ культура керменӗ умӗнче 14 сехетре йӗркеленӗ, вӑл 2 сехете тӑсӑлнӑ.

Малтан хастарсем Чапаев скверӗнчен Республика тӳремӗ таран утма, тӳремре митинг ирттерме палӑртнӑ. Уведомление хула администрацине те янӑ, анчах тӳре-шара ку вариантпа килӗшмен, митинга Хусанкай ячӗллӗ культура керменӗ умӗнче ирттерме сӗннӗ.

Сӑмах май, оппозици пенси реформине хирӗҫ ирттерекен митингсем паян Раҫҫейӗпех йӗркеленнӗ. Шупашкар – ку акцие ирттерме ирӗк илнӗ хуласенчен пӗри.

Ҫӗршыв Президенчӗ Владимир Путин Игорь Комарова Атӑлҫи федераллӑ тӑрӑхӗн полномичиллӗ представителӗ пулма шаннӑ. Кун пирки «РИА Новости» агентство хыпарлать.

Игорь Комаров М.В. Ломоносов ячӗпе хисепленекен Мускав патшалӑх университетӗнче экономиста вӗреннӗ, 1987-1992 ҫулсенче ҫар хӗсметӗнче тӑнӑ. 2002 ҫулччен банк тытӑмӗнче, ертӳҫӗ должноҫӗсенче вӑй хунӑ, ун хыҫҫӑн «Норильский никель», «Ростех» тата «АвтоВАЗ» предприятисенче карьера тунӑ. 2013-2014 ҫулсенче Игорь Анатольевич Федераллӑ космос агентствин ертӳҫин ҫумӗ пулнӑ, 2014-2015 ҫулсенче Пӗрлештернӗ ракета-космос корпорацийӗн гендиректорӗ пулса ӗҫленӗ. 2015 ҫулта «Роскосмос» директорне ларнӑ. Кӑҫалхи ҫӗртме уйӑхӗнче «Энергия» ракета-космос корпорацийӗн директорсен канашне суйланнӑ. Тепӗр уйӑхран ӑна Раҫҫей ӑслӑлӑхпа вӗренӳ министрӗн ҫумне лартса хунӑ.

Палӑртса хӑвармалла, унччен Атӑлҫи федераллӑ тӑрӑхӗн полномичиллӗ представителӗ Михаил Бабич пулнӑ, ӑна ҫурла уйӑхӗнче Раҫҫейӗн Беларуҫри посолне лартнӑ.

Паян Чӑваш Ен Элтеперӗ Михаил Игнатьев Чӑваш Енӗн Патшалӑх Канашӗнчи политика партийӗсен тӑватӑ фракцийӗн представителӗсемпе тата РФ Патшалӑх Думин депутачӗсемпе тӗлпулнӑ.

Калаҫӑва РФ Патшалӑх Думин депутачӗсем: Валентин Шурчанов (РФКП рескомӗн пӗрремӗш секретарӗ), Олег Николаев («Тӗрӗслӗхшӗн Раҫҫей» партин регионти уйрӑмӗн ертӳҫи), Чӑваш Республикин Патшалӑх Канашӗн депутачӗ, «Пӗрлӗхлӗ Раҫҫей» партин ертӳҫин Дмитрий Медведевӑн регионти йышӑну пӳлӗмӗн ертӳҫи Николай Николаев, РЛДП фракцирен суйланнӑ Константин Степанов —хутшӑннӑ.

Тӗлпулӑва уҫнӑ май Чӑваш Ен Элтеперӗ Михаил Игнатьев депутатсене политика тӗлӗшӗнчен тӗрлӗ шухӑшлӑ пулсан та республика ырлӑхӗшӗн пӗрле тухӑҫлӑ ӗҫлесе пынӑшӑн тав тунӑ. ЧР влаҫ органӗсен официаллӑ порталӗнче пӗлтернӗ тӑрӑх, саккунсем, нормӑпа право акчӗсене йышӑннӑ чухне яланах пӗр-пӗрин сӑмахне итлеме тата илтме тӑрӑшнине каланӑ.