ШӖМ тунӑ сӑн

Паян ирхи 9 сехет ҫурӑра Шупашкарти К.Иванов урамӗнче Пӗрремӗш хула пульници умӗнче 83 ҫулти старике машина ҫапса кайнӑ. Вӑл светофор пулман вырӑнтан, «зебра» патӗнче, ҫул урлӑ каҫма тӑнӑ.

«Лада Ларгус» рулӗ умӗнче ларнӑ 44 ҫулти водитель каланӑ тӑрӑх, ватӑ арҫын малтан чарӑннӑ, унтан тӑрук ҫул ҫине тухнӑ.

Старике, ку инкек пульница умӗнче пулнӑ пулсан та, васкавлӑ медпулӑшупа Шупашкарти васкавлӑ медпулӑшу пульницине илсе кайнӑ.

Владимир Осипов экс-минитср (сулахайри), Юрий Арлашкин (сылӑмри). "Руль умӗнче" проталтан илнӗ сӑнӳкерчӗк

Чӑваш Енӗн Транспорт министерствинче шырав ирттернӗ. Ӗҫ пӳлӗмӗсенчи документсене, серверсене тата телефонсене илсе кайнӑ.

CHEB.ru пӗлтернӗ тӑрӑх, право хуралӗн органӗсенче ӗҫлекенсем иртнӗ эрнери кӗҫнерникун транспорт министрӗн ҫумне Юрий Арлашкина тытса чарнӑ. Хӑшӗ-пӗри шухӑшланӑ тӑрӑх, транспорт пайӗн ирӗк паракан тата конкурс процедурисен секторӗн заведующине те тытса чарма пултарнӑ. Ыйтса пӗлнӗ хыҫҫӑ иккӗшне те каялла янӑ имӗш. Теприсем шухӑшланӑ тӑрӑх, вӗсенчен кӳнтеленрен евӗр ыйтса пӗлме пултарнӑ.

Маларах асӑннӑ ҫӑлкуҫа ведомствӑра Юрий Арлашкин ӗҫрех, шырав ирттерни пирки илтмен тесе пӗлтернӗ.

Кӗҫнерникун транспорт министрӗпе Максим Петровпа тӳрӗ эфир иртмелле пулнӑ. Анчах ведомство унччен темиҫе сехет маларах техника сӑлтавне пула тӳрӗ эфира ирттереймесси пирки хыпарланӑ.

ҪҪХПИ тунӑ сӑн

Паян ҫӗрле Етӗрне муниципаллӑ округӗнче ватӑ хӗрарӑм машина айне пулса вилнӗ. 66-ри хӗрарӑм Никиткино ялӗнче пурӑннӑ.

ҪҪХПИ пӗлтернӗ тӑрӑх, ку инкек «Никольское - Ядрин - Нурӑс» ҫул ҫинче ҫур ҫӗр иртни 2 сехет те 15 минутра пулнӑ. Хӗрарӑм ҫул хӗррипе пынӑ, тӗттӗмре ҫутатакан хатӗр пулман. Ун ҫине «Форд» пырса кӗнӗ. Вӑл ҫав вырӑнтах вилнӗ.

ШӖМӗн лини ҫинчи пайӗн сӑнӳкерчӗкӗ

Атӑлта пӗр арҫын сӗрекепе пулӑ тытнӑ. 1987 ҫулта ҫуралнӑ арҫынна транспорт полицейскийӗсем ака уйӑхӗн 2-мӗшӗнче асӑрханӑ. Вӗсем юханшыв тӑрӑх рейда тухнӑ. Ку хыпара Шалти ӗҫсен министерствин Атӑлҫи федераци округӗнчи Транспорт ҫинчи управленийӗн пресс-служби хыпарланӑ.

Браконьер сӗрекепе тӗрлӗ йышши 20 пулӑ тытма ӗлкӗрнӗ. Унӑн пуллине тата сӗрекине туртса илн.

Хальхи вӑхӑта тӗрӗслев пырать, пуҫиле ӗҫ пуҫарассипе пуҫармассине палӑртӗҫ.

shumer.cap.ru сӑнӳкерчӗкӗ

Ҫӗмӗрле район администрацийӗн пуҫлӑхӗнче ӗҫленӗ Лев Рафинов тӗлӗшпе пуҫарнӑ пуҫиле ӗҫ суд чарса лартнӑ. Анчах вырӑнти прокуратура кун пек йышӑнупа килӗшесшӗн мар иккен.

Лев Рафинов ӗҫ вырӑнӗпе усӑ курнине сакӑр тӗслӗх тупса палӑртнӑ. Тӗпчевҫӗсем шухӑшланӑ тӑрӑх, 2018 ҫулхи раштав уйӑхнчен пуҫласа 2019 ҫулхи раштав уйӑхӗччен вӑл тӑлӑх ачасене валли Ҫӗмӗрлере 7 хваттер сутас пирки килӗшӗве алӑ пуснӑ. Анчах хваттерсем пушар хӑрушсӑрлӑхӗ, санитари норми тата ытти енчен саккун ыйтнине тивӗҫерсе тӑман. Тӑкак виҫи 9,5 миллион тенкӗпе анлашнӑ. Рафинов ҫавна тӗпчев пынӑ вӑхӑтах саплаштарнӑ. Ун пурлӑхне те арестленӗ.

Районти суд пуҫлӑх пулнӑ ҫыннӑн ӗҫне тимсӗрлӗх статья ҫине куҫарнӑ, пуҫиле ӗҫшӗн явап тытарма вӑхӑт иртсе кайнӑ тесе ӗҫе хупса хунӑ. Вырӑнти прокуратура кун пек йышӑнупа килӗшесшӗн мар, вӑл приговор тӗлӗшпе ҫӑхав ҫырасшӑн.

"Про Город" сайтри сӑн

Паян Вӑрнар муниципалӑ округӗнче Кивкассипе Пуканкасси ялӗсен хушшинче апат-ҫимӗҫ тиенӗ Газель аварие лекнӗ. Вӑл ҫулран пӑрӑнса кювета чӑмнӑ.

Ҫакна курнӑ ҫынсем каланӑ тӑрӑх, грузовик водителӗ тепӗр машинӑпа ҫапӑнас мар тесе руле пӑрнӑ та кювета чӑмнӑ. Машина ҫаврӑнса ӳкнӗ. Водитель шар курман. Вырӑна Росгварди, ҪҪХПИ инспекторӗсем ҫитнӗ.

grozny-inform.ru сайтри сӑн

Архангельск хулинче пирӗн ентеше тытса чарнӑ. Вӑл ҫынна вӑрлама тӑнӑ тесе шутлаҫҫӗ.

43 ҫулти ҫак арҫын судпа унччен те айӑпланнӑ. Ун чухне ҫынна вӗлернӗшӗн тӗрмере ларнӑ. Хальхинче вӑл 22-ри хӗре тапӑннӑ. Следстви версийӗ тӑрӑх, вӑл ун патне пынӑ, сумка йӑтса пулӑшма ыйтнӑ. Унӑн пилӗкӗ ыратать-мӗн.

Хайхискерсем подъезда кӗнӗ. Унта вара арҫын хӗре лифта сӗтӗрсе кӗнӗ, хӑйӗн хваттерне илсе кӗме хӑтланнӑ. Юрать-ха, кӑшкӑрашнине участковӑй илтнӗ, вӑл пулӑшма ҫитнӗ.

Халӗ арҫынна татса чарнӑ. Следовательсем ӗҫе малалла тишкереҫҫӗ.

Андрей Чибисӑн телеграм-каналӗнчи сӑн

Ӗнер Мурманск облаҫӗн кӗпӗрнаттӑрне Андрей Чибиса 42 ҫулти Александр Б. ҫӗҫӗпе тапӑннӑ. Кун хыҫҫӑн тӳрене операци тунӑ, вӑл халӗ реанимацире.

Андрей Чибис – пирӗн ентеш. Вӑл 1979 ҫулта Шупашкарта ҫуралнӑ. 2001 ҫулта Шупашкарти коопераци техникумӗнче вӗреннӗ. Мурманск облаҫӗн кӗпӗрнаттӑрӗнче вӑл 2019 ҫултанпа ӗҫлет.

Ӗнер Мурманскри «Строитель» культура ҫуртӗнче кӗпӗрнаттӑр халӑхпа тӗл пулнӑ. Ҫавӑн хыҫҫӑн тапӑннӑ та ӑна Александр, хырӑмӗнчен ҫӗҫӗпе чикнӗ. Хураха Росгварди ӗҫченӗ ураран персе амантнӑ, Александра тытса чарнӑ.

Ҫак арҫын йӗрке хуралҫисене каланӑ тӑрӑх, вӑл Чибиспа куҫа-куҫӑн тӗл пулса калаҫса курман, ҫывӑх пулман, анчах темшӗн ӑна килӗштермен. Унччен вӑл ҫын сывлӑхне ҫӑмӑл сиен кӳнӗшӗн явап тытнӑ пулнӑ. Халӗ следстви малалла пырать.

Инкеклӗ лару-тӑру министерстви тунӑ сӑн

Инкеклӗ лару-тӑру министерстви ака уйӑхӗн 2-3-мӗшӗсенчи сводкӑпа паллаштарнӑ.

Акан 2-мӗшӗнче 23 сехетре Елчӗк муниципаллӑ округӗнчи Аслӑ Елӗкре йывӑҫ ҫурт ҫуннӑ. Юрать-ха, инкекре аманнисем пулман.

Ака уйӑхӗн 3-мӗшӗнче Шупашкар муниципаллӑ округӗнчи Хурӑнлӑх ялӗнче 2 хутлӑ ҫурт ҫуннӑ. Вӑл 83 ҫулти арҫыннӑн пулнӑ. Пушар 200 тӑваткал метр лаптӑк ҫинче алхаснӑ. Шел те, ҫурт йӑлтах ҫунса кӗлленнӗ. Ҫӑлавҫӑсем пушара кӳршӗ ҫуртсем ҫине куҫма паман.

vladtime.ru сӑнӳкерчӗкӗ

Йӗпреҫ тӑрӑхӗнче почта уйрӑмне ертсе пынӑ ҫын тӗлӗшпе пуҫиле ӗҫ пуҫарнӑ.

Канашри почтамта пӑхӑнса тӑракан почта ҫыхӑнӑвӗн уйрӑмӗсенчен пӗрин пуҫлӑхӗнче тӑрӑшнӑ хӗрарӑм сутма панӑ таварпа тата ӑна сутса тунӑ укҫапа хӑй пӗлнӗ пек хуҫаланнӑ. Вӑл 200 пине яхӑн тенке хӑйӗн кӗсйине пӗтӗрсе чикнӗ.

Пуҫиле ӗҫе тӗпченӗ май хӗрарӑмӑн килӗнчен полицейскисем 150 пин тенкӗ укҫа илсе тухса кайнӑ, ӑна шар курнӑ ене тӑкака саплаштарма панӑ.

Пуҫиле ӗҫе Йӗпреҫ районӗнчи суда ярса панӑ.