Прокуратура архивӗнчи сӑн

Комсомольски районӗнче Кӗтне юханшывӗнче пулӑ нумай вилнине палӑртнӑ. Унта 3 пин ытла пулӑ виллине шута илнӗ.

Прокуратура тата Росрыболовство шыва тата пулӑ виллине тӗрӗсленӗ. Пӗтӗмлетӳ паллӑ: юханшывра шыва варалакан япаласем ытлашши нумай. Тӑкака шутланӑ хыҫҫӑн прокуратура ҫутҫанталӑка сыхлас саккуна епле пӑхӑннине хак парӗ.

Пирӗн ентешӗмӗрсем – Роман Сергеев тата Михаил Елисеев – «Казачок» нумай сериллӗ фильмӑн авторӗсенчен пӗрисем пулса тӑнӑ. Асӑннӑ фильма халӗ Псков облаҫӗнче ӳкереҫҫӗ. Унта Алексей Кравченко, Георгий Дронов, Владимир Епифанцев паллӑ актёрсем те выляҫҫӗ.

«Казачок» – ҫамрӑксем валли ӳкерекен нумай сериллӗ фильм. Сюжет тӑрӑх, Мускавра пурӑнакан шкул ачине, Степана, ашшӗ-амӑшӗ тӑна кӗтмелле тесе асламӑшӗ патне яла яраҫҫӗ. Вӑл унта ҫӑла кӗрсе ӳкет аваллӑха ҫакланать. Стёпа хӑйӗн ҫав вӑхӑтра пурӑннӑ тӑванӗсемпе палалшать, 1612 ҫулта пулса иртнӗ пулӑмсене хутшӑнать.

Маларах асӑннӑ Романпа Михаил – Хаваслисемпе тавҫӑруллисен клубӗн ертӳҫисем. Унччен вӗсем «Тайна пропавшей деревни» камит сериалӗн сценарисчӗсем пулнӑ. Ҫав ӗҫӗн премьерине «ТНТ» телеканал утӑ уйӑхӗнче кӑтартнӑ.

t.me/pro_cheby сӑнӳкерчӗкӗ

Виҫӗмкун, ҫурла уйӑхӗн 7-мӗшӗнче, Шупашкарта йӗрке хуралҫисем шурӑ тӗслӗ «Хендай Солярис» автомобиле хӑваланӑ.

Машинӑна ирхи 6 сехетре Октябре 50 ҫул урамра ҫул-йӗр инспекторӗсем чарӑнма ыйтнӑ. Вӑл вара тарма пикеннӗ. Ҫав вӑхӑтра светофорӑн хӗрлӗ ҫутине те пӑхӑнман, кӗрсе кайма юраман йӗр ӳкерсе хунине те пӑхса тӑман. База проездӗнче инспекторсем машинӑна хӑваласа ҫитсе чарса лартнӑ-лартнах. Машинӑран тухма килӗшменрен йӗрке хуралҫисен чӳрече кантӑкне ватма тивнӗ.

Водителе ӳсӗрле руль умне ларнӑшӑн унччен правасӑр хӑварнӑ иккен. Водитель правине вӑл ҫӗнӗрен илме экзамен тытман.

Пӑтӑрмах хыҫҫӑн пуҫтах водитель тӗлӗшпе йӗрке хуралҫисем 17 протокол ҫырнӑ.

"Про Город" сайтӗнчи сӑн

Паян ирхине Елчӗк районӗнче «Ладӑн» вунтӑваттӑмӗш моделӗ ҫул ҫинчен тухса кайса юпана пырса тӑрӑннӑ. Руль умӗнче полици тытӑмӗнче ӗҫлекен 40 ҫулти арҫын пулнӑ. Ӑна, аманнӑскере, пульницӑна илсе ҫитернӗ. Салонра, телее, урӑх никам та пулман.

Халӗ Шалти ӗҫсен министерствин ӗҫченӗсем ӗҫ-пуҫа уҫӑмлатаҫҫӗ. Авари мӗншӗн пулнине тӗпчеҫҫӗ.

cap.ru сӑнӳкерчӗкӗ

Етӗрне районӗнче пурӑнакан Анна Яковлевна Симукова ҫурлан 8-мӗшӗнче 102 ҫул тултарнӑ. Вӑл - вӑрҫӑ ветеранӗ, фронта хӑйӗн ирӗкӗпе кайнӑ.

Анна Яковлевна Днепропетровск облаҫӗнче 1921 ҫулта ҫуралнӑ. Медсестрана вӗренсе тухсан Киеври ҫар госпиталӗнче ӗҫленӗ. Вӑрҫӑ пуҫлансан госпитале Ҫӗпӗре эвакуациленӗ. 1943 ҫулта вара Анна Яковлевна фронта кайнӑ.

Пулас упӑшкипе Исай Симуковпа варҫӑ хыҫҫӑн паллашнӑ. Анна Австрире командировкӑра пулнӑ. Венгрире салтакра пулнӑ Исай вӗсем патне госпитале лекнӗ. Анна Киева таврӑнсан Исай ӑна шырама пуҫланӑ. Тупсан ҫамрӑксем пӗрлешнӗ.

1953 ҫулта мӑшӑр Исайӑн тӑван тӑрӑхне, Етӗрне районӗнчи Мӑн Шӗмертене, таврӑннӑ.

medartby.ru сайтри сӑн

Улатӑрта 8 ҫулти арҫын ача пиҫсе кайнӑ. Ӑна пульницӑна илсе ҫитернӗ. Тухтӑрсем палӑртнӑ тӑрӑх, унӑн ӳчӗ самай пиҫсе кайнӑ, сиенленнӗ лаптӑк 1-2-мӗш степеньпе танлашнӑ.

Мӗн пулса иртнӗ-ха? Ҫурла уйӑхӗн 8-мӗшӗнче каҫхине вӗсем тусӗсемпе «Стрелка» микрорайонта ҫунакан шӗвекпе усӑ курса кӑвайт чӗртме тӑнӑ. Ҫулӑм вара арҫын ачан тумтирӗ ҫине куҫнӑ.

Палӑртмалла: ҫулталӑк пуҫланнӑранпа республикӑра 932 пушар пулнӑ, вӗсенче 38 ҫыннӑн пурнӑҫӗ татӑлнӑ.

Стратегиллӗ сесси вӑхӑтӗнче

Чӑваш патшалӑх университечӗн культура керменӗнче паян стратегиллӗ сесси ирттерчӗҫ — Чӑваш Республикин медиахолдингне мӗнле хатӗрлессине сӳтсе яврӗҫ.

Мероприятие тӗрлӗ ҫынсене йыхравланӑ: общество хастарӗсене, экспертсене, МИХсенче ӗҫлекенсене тата культура, ӑслӑлӑх, вӗрентӳ ӗҫченӗсене. Стратегие сӳтсе явакан сесси тӑватӑ сӗтел тавра пухӑнса ӗҫлерӗ. Кашниех медиахолдинг тӑвас ӗҫре мӗн ҫине тимлӗх уйӑрмаллине палӑртрӗ. Пӗрисем республика тулашӗнчи чӑвашсен пурнӑҫне ҫутатма ыйтрӗ, теприсем МИХсемпе халӑх хушшинче шанӑҫа ӳстерме сӗнчӗҫ, виҫҫӗмӗшсем холдинг ӑсталанин усси мӗн тери лайӑх пулни ҫинчен каласа пачӗҫ. Тухса калаҫакансем Татмедиа холдинга йӗркеленӗ чухне те, «Хыпар» издательство ҫурчӗ хӑйӗн ҫунатти айне чӑвашла тухакан пӗтӗм республика кӑларӑмӗсене пухнӑ чухне те ҫак ӗҫ ыррине кӑна кӑтартрӗ тесе пӗтӗмлетрӗҫ.

Цифра аталанӑвӗ, информаци политики тата массӑллӑ коммуникацисен министерстви хӑйне пӑхӑнакан мӗнпур кӑларӑмсене пӗр холдинга пухас шухӑшлӑ пулас. Ку ыйтӑва малалла сӳтсе явӗҫ, тӗрлӗ сӗнӳсемпе усӑ курӗҫ. Холдинг йӗркеленӗ хыҫҫӑн унта мӗнпур район хаҫачӗ, чӑвашла та вырӑсла та тухакан кӑларӑмсем кӗрӗҫ.

Малалла...

ria.ru сайтран илнӗ сӑнӳкерчӗк

Юлашки вӑхӑтра такси хакӗсем ӳссе кайнине асӑннӑ транспортпа усӑ куракансем сисрӗҫ ӗнтӗ. Кун пек лару-тӑру ҫӗршывӗпех. Юлашки вунӑ ҫулта ун пекки пулман.

Росстат пӗлтернӗ тӑрӑх, таксипе ҫула тухсан пӗр километр кайма ҫул укҫи ҫӗртме уйӑхӗнче 32 тенкӗ те 53 пуса кайса ларнӑ.

Хак хӑпарнин сӑлтавӗ темиҫе. Пӗрремӗшӗнчен Раҫҫее хирӗҫле санкцисем йышӑнсан автомобиль хакӗ ӳснӗ.

Иккӗмӗш сӑлтавӗ — иртнӗ ҫул вӗҫӗнче такси водителӗсене ОСАГОна турттаракансен тарифӗпе илме хистекен саккун йышӑнни.

Экспертсем такси хакӗ ҫывӑх вӑхӑтра 30 процент таран ӳсессине систереҫҫӗ.

cap.ru сӑнӳкерчӗкӗ

Чӑваш Енре туристӑн цифра профильне йӗркелеме палӑртаҫҫӗ. Кун пирки республика Элтеперӗ Олег Николаев «Мегафон» компанин регионти уйрӑмӗн ҫӗнӗ директорӗпе Антон Перцевпа тӗ пулсан сӑмах хускатнӑ.

Компани ҫынсем ӗҫлеме тата канма ытларах ӑҫта тухса ҫӳренине геоданнӑйсем тӑрӑх пӗлсе тӑрать. Ятарлӑ тытӑм сим-картӑсен информацийӗ тӑрӑх ҫапла пӗтӗмлетет. Асӑннӑ сим-карттӑ хӑш компанин пулни пӗлтерӗшлӗ мар.

«МегаФон» пухнӑ информаципе усӑ курса республикӑн транспорт тата туризм ифраструктурине аталантарма аван.

t.me/pro_cheby сӑнӳкерчӗкӗ

Шупашкарти аэропортра самолётсене лартмалли радиотехника тытӑмне тӗрӗслекен самолёт вӗҫсе ҫӳрет. Сывлӑш ҫулӗн управенийӗн самолёчӗ пирӗн патра темиҫе кун ӗҫлӗ.

«Ан26» лаборатори самолёчӗ аэронавигаци тытӑмне тӗрӗслет, ятарлӑ оборудование вӑл кирлӗ пек йӗркелӗ.

Сӑмах май каласан, паянхи кун Шупашкарти аэропорта юсасси малалла пырать. Ӗҫе вӗҫлесен вӑл хитререх те, пассажирсемшӗн меллӗрех те пулӗ.