cap.ru сӑнӳкерчӗкӗ

Ӗнер, ҫурла уйӑхӗн 13-мӗшӗнче, Улатӑр лесничествинче вӑрман ҫунма пуҫланӑ. Кун пирки пушарнӑйсене 18 сехетре пӗлтернӗ.

Ҫулӑм тухнине Эйпеҫ тӑрӑхӗнче вӑрман инспекторӗ асӑрханӑ. Пушара ҫур сехетрен сӳнтернӗ. Ҫулӑм 0,1 гектар ҫӗр ҫинче алхаснӑ. Телее, вӑл вӑрман хуҫалӑхне тӑкак кӳмен.

Халӗ пушар мӗне пула тухнине тӗпчеҫҫӗ.

t.me/pro_cheby каналтан илнӗ сӑнӳкерчӗк

Чӑваш Енре пурӑннӑ арҫын укҫа выляса илнӗ те тӑван тӑрӑхӗнчен тухса кайнӑ.

Владимир Макаров ятлӑ арҫын лотерейӑпа 4 миллион та 769 пин те 8 тенкӗ выляса илнӗ. Ҫавӑн хыҫҫӑн вӑл тӑван тӑрӑхран тухса кайма шут тынӑ. Унӑн ывӑлӗсем Мускав ҫывӑхӗнче пурӑнаҫҫӗ иккен. Арҫын та унта кайма тӗллев лартнӑ. Ҫемье виҫӗ пӳлӗмлӗ хваттер туяннӑ, сӗтел-пукан туяннӑ. Халӗ Владимир тата унӑн арӑмӗ Мускав облаҫӗнче тӗпленнӗ.

wikimapia.org сайтри сӑн

Шӑрӑх кунра, паллах, шывра чӑмпӑлтатас килет. Анчах унта инкек пуласси те инҫех мар.

Ҫурла уйӑхӗн 12-мӗшӗнче Красноармейски районӗнчи Танӑш ялӗ ҫывӑхӗнчи пӗвере ҫамрӑк путса вилнӗ. Инкеклӗ лару-тӑру министерстви пӗлтернӗ тӑрӑх, вӑл 2006 ҫулта ҫуралнӑскер пулнӑ.

Палӑртмалла: ҫулталӑк пуҫланнӑранпа Чӑваш Енре 28 ҫын путса вилнӗ. Вӗсенчен 8-шӗ – 18 ҫула ҫитмен ачасем.

Инкеклӗ лару-тӑру министерстви тунӑ сӑн

Вырсарникун, ҫурла уйӑхӗн 13-мӗшӗнче, 14 сехет ҫурӑра Йӗпреҫ районӗнчи Шуркасси ҫывӑхӗнчи уй-хирте ACROS 530 комбайн ҫунма тытӑннӑ. Вӑл – 2011 ҫулта туса кӑларнӑскер.

Комбайн вырӑнти агрофирмӑн пулнӑ. Уйра тырӑ вырма тухнӑскер тӑрук ҫунма пуҫланӑ. Ӑна икӗ пушар техники сӳнтернӗ.

Халӗ комбайн мӗншӗн ҫунма пуҫланине тата инкек мӗн чухлӗ тӑкак кӳнине шутлаҫҫӗ.

Ку эрне мӗнле пулӗ? Синоптиксем мӗн калаҫҫӗ? Паян ҫӗрле ҫумӑр ҫукаланӑ. Ҫапах тӑпрара нӳрӗк сахал-ха.

Эрне варриччен сывлӑш температури 23-28 градус пулӗ. Кӗҫнерникунпа эрнекун шӑрӑхланӗ – 28-33 градус таран ҫитӗ.

Канмалли кунсенче ҫанталӑк каллех уҫӑлтарӗ. Шӑматкун вырӑнӑн-вырӑнӑн ҫумӑр ҫӑвӗ. Малталӑха пӗлтернӗ тӑрӑх, ҫитес кунсенче каҫсерен 8-9 градус кӑна ӑшӑ пулмалла.

izvmor.ru сайтри сӑн

Мӑкшӑ Республикин пуҫлӑхӗ Артем Здунов тӳре-шарана иномаркӑсем туянма чарнӑ. Паллах, ку – ӗҫпе ҫыхӑннӑ чухне кӑна.

Вӑл Телеграм-каналӗнче пӗлтернӗ тӑрах, нумаях пулмасть ют ҫӗршывра туса кӑларнӑ машина туянмашкӑн саккас вырнаҫтарнине асӑрханӑ. Ҫакна пуҫлӑх ҫийӗнчех пӑрахӑҫлаттарма хушнӑ. Артем Здунов Владимир Путинпа пӗр пулса малашне ведомствӑсене хамӑр патра туса кӑларнӑ машинӑсене кӑна туянма ирӗк панӑ.

Палӑртмалла: ҫурла уйӑхӗн 3-мӗшӗнче Раҫҫей Президенчӗ Владимир Путин тӳре-шаран иномарка туянма юраманни пирки каланӑ.

medrussia.org сайтри сӑн

Ӗнер, ҫурла уйӑхӗн 13-мӗшӗнче, Елчӗк районӗнче «Комсомольски – Елчӗк – Пӑва» ҫул ҫинче 59 ҫулти мопедист машина кустӑрми айне пулса вилнӗ.

11 сехет тӗлнелле ҫак арҫын тӗп ҫул ҫине тухнӑ. Анчах вӑл машина килнипе килменнине лайӑх пӑхман ахӑртнех. Ҫав вӑхӑтра ҫулпа сӗт турттаракан машина пынӑ. Мопедист та, водитель те пӑрӑнас тесе хӑтланнӑ. Анчах… Шел те, 59 ҫулти арҫын вилмеллех суранланнӑ. Ҫакӑ паллӑ: унӑн мопедпа ҫӳреме ирӗк паракан документсем пулман.

21.мвд.рф сӑнӳкерчӗкӗ

Шупашкар хулинче пурӑнакан 49 ҫулти хӗрарӑм авиабилет туянас тесе ултавҫӑсен аллине ҫакланнӑ.

Хӗрарӑмӑн хӗрӗ тахҫантанпах ют ҫӗршывра пурӑнать иккен. Амӑшӗ ун патне кайса курас тенӗ. Авиабилет сутакан тӗрлӗ интернет-сайтсене тишкернӗ хыҫҫӑн хак илӗртекен пӗлтерӗве асӑрханӑ. Асӑннӑ ҫӑлкуҫ менеджерӗсемпе ҫыхӑннӑ хыҫҫӑн лешсем ӑна билет туянассипе ҫыхӑннӑ ыйтусене «Телеграма» кӗрсе сӳтсе явма сӗннӗ.

Ҫула тухмалли куна тата вӑхӑта кӑтартнӑ хыҫҫӑн хӗрарӑма билет хакне тӳлеме сӗннӗ. Банк картти ҫинчен 9300 тенкӗ касса кайнӑ хыҫҫӑн билет сутакансем хӗрарӑмпа ҫыхӑнӑва татнӑ.

"Канаш" хаҫатӑн халӑх ушкӑнӗнчи страницинчен илнӗ сӑнӳкерчӗк

Чӑваш кӗнеке издательствинче нумаях пулмасть «Ҫӗр ҫинче мӗн вӑйлӑ? Что сильнее всего на свете?» сӑрласа илемлетмелли юмах пичетленсе тухнӑ. Ӑна икӗ чӗлхепе: вырӑсла тата чӑвашла — кун ҫути кӑтартнӑ. Юмаха вырӑсла Ольга Васильева куҫарнӑ, Екатерина Васильева художник кӑларӑма илемлетнӗ. Кӗнеке валли материалсене Ольга Федорова пухса хатӗрленӗ.

Сӑмах май май каласан, юмаха чӑваш пурнӑҫӗпе йӑли-йӗркине тӗпчекен Никита Романов этнограф Чӑваш Енри Муркаш районӗнчи Шарпаш ялӗнче 1951 ҫулта ҫырса илнӗ иккен. Ӑна Опраньох ятлӑ мучи каласа панӑ-мӗн.

Елена Нарпин страницинчен илнӗ сӑнӳкерчӗк

И.Н. Ульянов ячӗллӗ Чӑваш патшалӑх университечӗн преподавателӗн тата ҫыравҫӑн Елена Нарпин статйи Турцинче пичетленсе тухнӑ кӗнекере кун ҫути курнӑ. Кун пирки статья авторӗ халӑх тетелӗсенчен пӗринчи хӑйӗн страницинче хыпарланӑ.

«Чӑвашри репресси» ятлӑ статьяна Елена Нарпи Бюлент Байрам ӑсчахпа пӗрле ҫырнӑ. Ҫав ӗҫе Турцире тухнӑ «Тӗрӗк тӗнчинчи репресси» пичетлесе кӑларнӑ.

«Ку кӗнекере тӗрӗк чӗлхиллӗ чылай халӑхӑн синкерлӗ саманара шар курнӑ культура, тӗн, ӑс-хакӑл ҫыннисен пурнӑҫӗ сӑнарланнӑ. Кӗнекере 700 ытла страница, ӑна тӗслӗ ӳкерчӗксемпе илемлетнӗ, чаплӑ хут ҫинче пичетленӗ. Пирӗн халӑхӑн ХХ ӗмӗрти синкерлӗ шӑпин пӗр пайне ҫак кӗнекере ҫутатса паракан Бюлент Байрама чун-чӗререн тав тӑватӑп!» — тесе ҫырнӑ Елена Нарпи.