Чӑваш Енри агропромышленноҫ комплексӗн ветеранӗсем патшалӑх деятельне Семен Ислюкова халалласа палӑк лартма сӗннӗ. Ку сӗнӳпе вӗсем Шупашкар хула администрацине тухнӑ.
Палӑртмалла: Семен Ислюков республикӑна 1955-1985 ҫулсенче – 30 ҫул – ертсе пынӑ, Чӑваш АССРӗн Аслӑ канашӗн президиумӗн председателӗ, РСФСР Аслӑ канашӗн президиумӗн председателӗн ҫумӗ пулнӑ. Ӑна Ленин, Октябрь Революцийӗн тата ытти орденпа чысланӑ. Вӑл – Шупашкар хулин хисеплӗ ҫынни.
Халӗ «Уҫӑ хула» порталта сасӑлав пырать. Ӑна халалланӑ палӑк кирлӗ-и е ҫук-и – эсир те шухӑша пӗлтерӗр.
Кӑҫал Шупашкарта ултӑ ача пахчи тума палӑртнӑ. Паллах, кашнин валли ят кирлӗ пулӗ. Вӗсене халӑха суйлама май туса панӑ, ҫавна май «Уҫӑ хула» порталта сасӑлав ирттереҫҫӗ.
Ултӑ ача пахчи валли ятсем суйланӑ. Кашнинех пӗри – чӑвашла. Вӗсем ҫакнашкал: «Пӗрле», «Ачалӑх», «Ҫӑлтӑр», «Пӗлӳҫӗ», «Хӗвелпи», «Асам». Сасӑлав пуҫланни пирки ӗнер пӗлтернӗ. Анчах паян каҫӑпа кайсан темшӗн сасӑлама май ҫук, ӑна хупнӑ.
Палӑртмалла: кӑҫал «Радужный», «Алькеш», «Благовещенский», «Университет», «Солнечный», «НЮН 14 мкр» микрорайонсенче ача пахчи хута ярасшӑн.
Чӑваш Енре сехете Мускав вӑхӑтӗнчен 1 сехет куҫармалла-и? Ара, хӗлле час каҫ пулать, ҫулла вара ҫур ҫӗр иртни 2 сехетрех ҫуталать. Ку ыйтӑва ЧР Правительство сӳтсе явма пуҫланӑ, ҫавна май ыйтӑм ирттернӗ.
Сасӑлава 22 пин ытла ҫын хутшӑннӑ. Вӗсен 45 проценчӗ вӑхӑта куҫарнинче уссине курмаҫҫӗ. Тепӗр 37 проценчӗ сехет йӗппине куҫарттарасшӑн. Ыйтӑма хутшӑннисене 13 проценчӗ сезонра куҫарма сӗннӗ. Тепӗр 5 проценчӗшӗн пур-пӗрех-мӗн.
Аса илтерер: Чӑваш Ен Правительстви регионта сехете куҫарас ыйтӑва нумаях пулмасть сӳтсе явма пуҫланӑ.
Чӑваш Енӗн унчченхи Правительство ҫурчӗн шӑпине халӑхпа татса парӗҫ. Унпа епле усӑ курасси пирки сасӑлава хутшӑнма республикӑра пурӑнакансене сӗннӗ. Кун пирки Строительство, архитектура тата ҫурт-йӗрпе коммуналлӑ хуҫалӑх министерстви пӗлтерет.
Халӑх сасӑлавӗ «Контактра» халӑх ушкӑнӗн «Чӑваш Республики» пабликӗнче иртет.
Унччен Правительство ҫурчӗ пулнӑскерте Чӑваш патшалӑх университечӗн вӗренӳ корпусӗ йӗркелеме сӗннӗ е тата — ача-пӑча учрежденийӗ, сӑмахран, шкул. Коммерци структурисем валли е администраци ҫурчӗ евӗр те усӑ курма пулать. Ҫынсем хӑйсен вариантне те сӗнме пултараҫҫӗ.
1940 ҫулта хӑпартса лартнӑ ҫурт федераци пӗлтерӗшлӗ историпе культура палӑкӗ тата культура эткерлӗхӗн ҫурчӗ шутланнӑ.
Сирӗн раштав уйӑхӗн 31-мӗшӗнче, Ҫӗнӗ ҫулта, ӗҫлес килет-и? Ахӑртнех, ҫук. Анчах календарьте вӑл ӗҫ кунӗ шутланать.
РФ президенчӗн пресс-секретарӗ Дмитрий Песков раштавӑн 31-мӗшӗнче ӗҫлессипе ӗҫлемессине регионсене татса пама ирӗк панине каланӑ. Эппин, ЧР Элтеперӗ Олег Николаев Ҫӗнӗ ҫула канмалли кун тума пултарать. Ҫавна май вӑл Инстаграмри хӑйӗн страницинче сасӑлав ирттерет: раштавӑн 31-мӗшӗнче канмалла-и е ҫук-и?
Паянхи кун тӗлне унта хутшӑннисен 90 проценчӗ ҫак кун канасшӑн пулнине пӗлтерсе сасӑланӑ.
Thebiggest.ru сайтра хӑйне евӗр сасӑлав пуҫарнӑ. Унта хутшӑнакансен хӑйсене хӑш наци ҫынни тесе шухӑшланине пӗлтермелле. Сасӑлава ҫак йӗркесен авторӗ те хутшӑнчӗ. Хӑйсене чӑваш тесе палӑртнисем ҫак самантра – 1671 ҫын.
Сасӑлав страницинче кашни халӑх пирки кӗскен ӑнлантарса пани пур. Унта Раҫҫейре чӑвашсем 1,58 миллион ҫын пурӑннине пӗлтернӗ, тӗнчере – 1,6 миллион тенкӗ. Сайтра ҫырнӑ тӑрӑх, историлле тӑван ҫӗршывӗнче ҫак тӗрӗк этносӗн ҫурри пурӑнать, ытти пайӗ пӗтӗм ҫӗршыв тӑрӑх сапаланнӑ. Хӑй вӑхӑтӗнче чӑвашсем чӑн тӗне ӗненнӗ.
Сасӑлава хутшӑнас тесен ҫак каҫӑпа иртмелле.
Ҫӗнӗ Шупашкар хулин пуҫлӑхӗн ҫумӗ Андрей Леонтьев «Пӗрлӗхлӗ Раҫҫей» партирен тухма заявлени ҫырса панӑ. Ӑна вӑл партин регионти уйрӑмӗн секретарӗ ячӗпе Алена Аршинова ячӗпе шӑрҫаланӑ.
Раҫҫей Федерацийӗн коммунистсен партийӗн депутачӗ Александр Андреев пӗлтернӗ тӑрӑх, Ҫӗнӗ Шупашкарти депутат коммунистсен партине кӗресшӗн. Кайран вӑл республика парламентне парти списокӗпе суйланасшӑн.
Леонтьев Шупашкарта пурӑнать. Унӑн виҫӗ ача. «ГОССТРОЙ» тулли мар яваплӑ обществӑн гендиректорӗ. Чӑваш Енӗн Тӗп суйлав комиссийӗ пӗлтернӗ тӑрӑх, политика вӑрланӑшӑн, влаҫ пайташне кӳрентернӗшӗн, преступлени тума хатӗрленнӗшӗн айӑпланӑ. Халӗ айӑплавӗсене пӑрахӑҫланӑ.
Нумаях пулмасть «Пӗрлӗхлӗ Раҫҫей» парти Владимир Михайлов депутата партирен кӑларас ыйтӑва тишкерессине пӗлтернӗ. Политик ҫынсене пысӑк процентлӑ ссуда панӑ.
Авӑн уйӑхӗнчи суйлав хыҫҫӑн «Пӗрлӗхлӗ Раҫҫей» тата РФКП партисен Ҫӗнӗ Шупашкарти депутачӗсем хула пуҫлӑхӗ пулма «Пӗрлӗхлӗ Раҫҫей» партин регионти уйрӑмӗ сӗннӗ кандидатшӑн сасӑламан. Унта хула пуҫлӑхӗ пулма вырӑнти усламҫа Игорь Анакова суйланӑ. Унӑн ҫумӗ пулма Андрей Леонтьева шаннӑ.
«Раҫҫей йывӑҫӗ – 2020» конкурс паян, юпа уйӑхӗн 1-мӗшӗнче, вӗҫленнӗ. Унта Дагестанри авалхи платан ҫӗнтернӗ. Вӑл 39 пин те 82 сасӑ пухнӑ. Конкурса тӑратнӑ 12 йывӑҫ хушшинче чӑваш юманӗ те пулни ҫинчен Чӑваш халӑх сайчӗ темиҫе те пӗлтернӗччӗ.
Муркаш районӗнчи Ильинка вӑрман хуҫалӑхӗнче ӳсекен ватӑ юман иккӗмӗш вырӑн йышӑннӑ. «Ҫыхӑнура» порталта ҫырнӑ тӑрӑх, «влаҫсем пулӑшни те чӑваш юманне ҫӗнтерме пулӑшайман». Хӑш-пӗр ача пахчинче ӗҫлекенсем юманшӑн сасӑлама чӗнсе хӑйсен кӑмӑлӗпе урама та тухнӑ-мӗн. Тӗрлӗ МИХӑн тӗнче тетелӗнчи ушкӑнӗсенче юман пирки, сӑмах май, нумай пӗлтерчӗҫ. Апла пулин те пирӗн тӑрӑхри йывӑҫ иккӗмӗш вырӑнпа ҫырлахӗ. Уншӑн 25 пин те 720 ҫын сасӑланӑ.
«2020 ҫулхи Раҫҫейри йывӑҫ» пӗтӗм ҫӗршыври конкурса чӑваш юманӗ хутшӑннине эпир пӗлтернӗччӗ ӗнтӗ. Республикӑри чи ватӑ юманшӑн rosdrevo.ru сайтра сасӑлама пулать. Конкурсри унӑн номерӗ — тӑваттӑ. Конкурса ҫӗршывӑн тӗрлӗ регионӗнчи 12 йывӑҫ хутшӑнать.
«Контактра» халӑх ушкӑнӗнчи «Подслушано Чебоксары» (чӑв. Шупашкарта итленӗ) пабликра пӗлтернӗ тӑрӑх, пирӗн юманӑн тан мар кӗрешӗве тӳсме тивет. Юманшӑн пӗр сасӑ памассерен ыттисемшӗн 1 сасӑран пуҫласа 10 сасӑ таран хушӑнса пырать иккен.
Пабликра ҫырнӑ тӑрӑх, паян ирхи вунӑ сехетре ҫавна юриех тӗрӗслесе пӑхнӑ. Вӗсем компьютертан тата телефонтан сасӑланӑ. Юманшӑн сасӑланӑ май Дагестанри йывӑҫшӑн сасӑлани хушӑнса пырать иккен.
Паблик авторӗсем конкурса ирттерекенсене: «Сире намӑс мар-и?» — тесе ӳпкеленӗ.
«2020 ҫулхи Раҫҫейри йывӑҫ» пӗтӗм ҫӗршыври конкурса чӑваш юманӗ хутшӑннине эпир маларах пӗлтернӗччӗ. Аса илтерер: хӑватлӑ та мӑнаҫлӑ ҫак йывӑҫшӑн rosdrevo.ru сайтра сасӑлама пулать. Унӑн номерӗ — тӑваттӑ.
Юмана тӑван халӑхӑмӑр атте тесе каланӑ. Конкурса хутшӑнакан лаштра юман Муркаш районӗнчи Ильинкӑри вӑрман хуҫалӑхӗнче ӳсет. Унӑн ҫӳллӗшӗ – 24 метр, вуллин сарлакӑшӗ – 182 сантиметр. Вӑл 369 ҫулта.
Сасӑлав https://rosdrevo.ru/russian-tree-of-the-year/ сайтра иртет. Вӑл юпа уйӑхӗн 1-мӗшӗнче вӗҫленет. Хальлӗхе чӑваш юманӗ иккӗмӗш вырӑн йышӑнать.
+9.3 °C